香港戰場: 城大篇‧11.龍岡軍
11.龍岡軍
團隊：林志剛、李顯明、周偉峰、何明發、李佩欣、黎德文、陳佳賢、伍少國、夏理基、龍子維、余日明、余文詩
轟!
機槍堡一陣白煙，停止運作。
眾人挺槍前進，雖然連串爆炸，但附近仍沒有軍人活動，機槍堡也沒動靜。
「佢地守住荔枝角道而唔係彌敦道，」陳sir說，「即係話呢條係佢地主要道路。」
夏理基站在路中間，望一望兩邊說：「一邊係深水埗警署，一邊落塘尾道、渡船街。」
伍少國續說：「渡船街可能唔係終點，佢地可能想落去柯士甸，佐敦道、民安隊總部附近其實有唔少地方可以泊車，或者有裝甲車泊係度。」
達達達達達達......
「嘩!」
嘭嘭嘭嘭嘭嘭嘭嘭!
機槍堡內有軍人爬起開槍掃射，看到的人爭相走避。從兩邊過馬路的林志剛、何明發、龍子維等人立即開槍還擊，殺死那軍人。
機槍向路中心發射，三個警察和帶着幾個學生，剛好從路中心過馬路。走在前面的學生率先倒下。陳sir和伍少國立即拉其他學生伏下，但夏理基中槍。
夏理基因側身對着機槍堡，死前還不知道發生甚麼事，一面錯愕的別過頭望着機槍堡，倒下。
一時大意，又死了三個學生和一個警察。
林志剛與何明發走去機槍堡，確認所有軍人死亡。
亂槍掃射後機槍已報廢。機槍子彈不適合步槍和手槍，也沒有拿走。兩人在軍人身上搜出小量適用的手槍子彈，其他物資大部份已炸毁。
眾人拿走死者身上的物資，繼續前進。突然，醫局街有幾個軍人走出來。
「別動!放下槍!」軍人喝道。
眾人立即舉起槍對峙。
「大哥，這些土包子殺了小李他們。」
「叫你們放下槍!懂不懂?」
「我們問你，」李顯明用普通話問，「為甚麼要殺沒犯事的人?」
「上頭指令，不聽話的人都要殺，寧枉勿縱!所有對抗的人都以犯人看待，你是不是找死?」
另一軍人道：「你們土包子不聽話就該死!這兒誰有權有錢，誰的話就有份量!你看政府支持誰?殺死你們政府不敢罵我一句，你呢?殺了我們看看政府怎樣對付你!」
「你們用槍指着政府軍就是犯法，快放下槍，可以饒你一命!我數三聲，一!」
「二!」
嘭!嘭!嘭!嘭!嘭!
眾人和軍人全場幾乎同時伏下，但槍聲仍不絕，轉眼幾個軍人被殺。
「喂，由後面入嚟啦!」龍岡中學外牆有學生伸出頭，招呼眾人進內。剛才的子彈原來是從中學射出來的。
眾人拿走政府軍的裝備，經過龍岡小徑，進入學校。經過一場場戰鬥，還生存的人包括城大學生林志剛、李顯明、周偉峰、何明發與李佩欣，警員陳sir、伍少國，又一城加入的龍子維，與及又一村遇上的余日明、余文詩父女。
曾經二十幾人的隊伍，到達龍岡中學時只餘下十人。
守在操場的是幾個鄰近的居民，見學生帶人進來，即開門讓路。學生引領眾人走到一間課室，課室的桌椅圍着牆壁，像聖誕聯歡會時一樣，裡面有幾個老師、學生。
「嘩，好攰!」眾人放下裝備，都坐在課室一邊位息。
「我係呢間學校嘅老師，沈多聞，」戴眼鏡的男老師道，「呢班係我嘅學生，仲有其他班守住樓上幾層。」
「我係陳sir，帶住佢地由又一城走到呢度。」陳sir說。
沈多聞皺一皺眉：「咁遠路?你地想去邊度?」
陳sir答：「首先會去西九紀律部隊宿舍，睇下究竟發生咩事，到目前為止我地仲未掌握香港究竟點解搞成咁。你地全日守係度?」
沈多聞答：「係，朝頭早如常返學，點知突然有槍聲同警車聲，之後警察叫我地唔好離開。十一點幾個陣就開始亂，出面有好多槍聲，有政府軍衝入嚟以搵犯人為名殺人，我地夾手夾腳殺咗佢，之後就拎武器自衛。d街坊平時都識嘅，走入嚟避難，點知軍方話懷疑係犯人又要衝入嚟。如是者衝咗幾次，到下晝三點幾啦佢地又嚟幾個，今次就係出面整個機槍堡，之後你地就嚟。」
陳sir問：「呢段期間有無咩消息，新聞有無講咩野?」
沈多聞說：「一直都無講，只係重覆話搜犯人，叫所有人唔好出街。我地試過打去教署、教協、教聯同埋其他教育組織，無人話到俾我地知發生緊咩事，同埋幾時安全。」
陳sir問：「你地呢度有幾多人?如果要離開嘅話有幾多個肯跟?」
沈多聞遲疑一下：「中午走咗大半，都係確認屋企有人或者有家長嚟接走，而家大約有一百人係度，但係如果要走，肯走嘅人數暫時答唔到，要睇下各人意願。暫時我地武器同食物都足夠，佢地未必肯走。」
陳sir道：「肯唔肯走係個人嘅選擇，但我地要同佢地講清楚，走同唔走會面對嘅事。我地由又一城過嚟，有好多野仲未搞清楚，想再去其他地方睇睇咩情形。」
「咁好啦，我地叫各班嘅人過嚟，」沈多聞轉身指派學生，「你地幫手叫其他班同街坊，五分鐘後派代表去禮堂，傾留係度定係跟陳sir離開。」
眾人隨着沈多聞到學校禮堂，各班學生、老師、市民也派代表到場。
「呢位係陳佳賢警司，佢地帶住一班市民嚟我地呢度，」沈多聞介紹，「根據陳sir所講，政府軍係外面殺無犯事嘅人，但背後嘅動機仲未搞清楚。而家陳sir想去其他地方搵更多資料，想請我地一齊出去，所以而家問各位意見。」
附近的居民，中年女子鄭麗嫻問道：「點解我地要跟佢走?留係度起碼暫時安全，出到去都唔知會點。」
沈多聞答：「呢樣就係我叫大家嚟嘅原因，大家可以自由選擇走定唔走，無人可以強逼任何人走定係留。出去係危險，呢樣係肯定嘅，但學校食物有限，始終有食晒嘅一日，如果到時先走，唔知夠唔夠人互相保護去另一個安全地方。所以走定留，大家都考慮清楚。」
市民王子計問：「學校仲有幾多食物?」
站在一旁的校工答：「唔多啦，我諗只係夠兩三日，就算你地返屋企拎野食，呢度人多都唔會捱到好多日。小食部，你估飯堂咩，捱過三日算好彩囉。」
「三日之後會係點大家都唔知，附近有幾間食肆，可以去搵野食，」沈多聞道，「如果到時仲係咁惡劣嘅話，都應該可以捱多陣，前提係d野食仲未畀人搶晒。」
陳sir說：「我知道大家好難抉擇，留係度暫時安全，唔想走嘅唔好勉強。不過如果想走嘅，請要有心理準備，呢次係博一鋪，搵到事件真相就最好，但亦好可能係發現真相之前就死咗。我地嚟嘅時候有二十幾人，而家得番幾多有眼見。」
「真相真係咁重要咩?」一個老師問，「值得我地搵條命去冒險?」
陳sir答道：「重唔重要好睇個人，如果你覺得唔值嘅就留係度，覺得唔想死得不明不白嘅，可以跟我一齊去。但我要提你地，一隊軍隊要攻入學校易如反掌，只要用裝甲車就可以輕易撞爛道鐵閘，我認為呢個只係時間問題，唔好諗住留係學校就唔使同軍隊駁火。」
現場一陣騷動，好明顯說中了某些人的心底所想。
「但我地要去邊度?」一個老師問。
「我只能講見步行步，首先會去西九紀律部隊宿舍，如果警察休息嘅應該會返去瞓覺，問佢地就會得知最新資訊，包括軍方部署。之後再向邊面走就睇情形。」陳sir答。
王子計再問：「出到去係咪你做領隊，有咩事邊個負責?」
陳sir答：「我地由又一城走過嚟，無話邊個做領隊，所有人為自己及身邊每一個人負責。而家唔係小學生去旅行，每個人都要互相照應、互相支持、互相依賴。就算係我，都要靠呢班學生做掩護，有幾次都係學生做決策。」
王子計續說：「無大佬，點帶隊呀?有起事上點算?我地條命交係咩人手上都唔知，叫我點信得過?」說罷有不少中年人點頭，場內一陣嘈雜。
林志剛按捺不住，站了起來：「咁你想點?你想有起事上嚟有人揹鍋?有咩差錯可以推晒落一個人身上?我地咁多個人，事前大部份人都唔識，但係為咗生存大家都要出聲提點，睇住其他人唔好畀任何一個人有事。就算我地死咗嘅同伴，死之前都掩護住我地。嚟到呢度我地死咗唔少人，但唔會追問責任，因為我地知道，而家係打仗，要為自己所做嘅事負責，為自己條命、隊友條命負責!我地所有人隨時都會死，所以行出呢個校門，就要百份百信任隊友，大家一齊帶隊，有起事上嚟大家一齊行動，而唔係企係度問點算，有人死咗要其他人負責!」
陳sir點頭：「我唔知呢度情況係點，但係兩軍對峙，自己有主見唔去做，要等一個人指揮先有下一步行動，往往會失去機會。跟住我地走，最重要嘅事唔係問責唔係睇邊個頭，而係用一切辦法救自己救同伴，令最多人生存。我希望一齊走嘅人都有呢種心態。而家有半個鐘畀大家考慮，我地先去休息一下，半個鐘後如果想跟我地走嘅，就去操場集合。」
眾人整理好裝備，在操場等學生街坊。不久，沈多聞老師和幾個學生走過來。
「你拎住呢個。」一個操不純正口音的女學生對一個高大男學生說。她的口音即時引起眾人警覺。
「呢位係張藍，係我個班嘅班長。」沈多聞見勢色不對，對眾人說，「個男仔叫陳明德，同其他同學都係我個班嘅，係咪有咩問題?」
「班軍人講過幾次講廣東話嘅都要殺，」黎德文答，「而且，所有軍人都係講普通話。」
何明發站起來：「我想問，同學呢幾日有無聽過咩傳聞?有無咩流言係新移民之間流傳?」
張藍一臉狐疑：「無呀，做咩咁問?唔通講廣東話就要死，講普通話嘅新移民唔使死?」
何明發說：「我只係好奇，佢地殺人有無咩準則?聽講佢地曾經過放老人家，但似乎好憎廣東話，連小朋友都唔放過。」
「種族滅絕?」黎德文皺眉，「但要做到咁，需要好大規模屠殺，以及好長時間思想改造，亦要完全控制傳媒，唔可以透露風聲，以免受到國際壓力。」
在場每個人都陷入沉思。這時，鄭麗嫻、王子計和幾個街坊、學生走過來。
鄭麗嫻道：「我地都係加入啦，與其坐係度等死，不如出去博一鋪。」
王子計向陳sir說：「對唔住，頭先冒犯晒。其實我地都係想知得更清楚。」
陳sir道：「唔緊要，香港人都未遇過呢d事，唔知點算係好正常。」
「你好，」一個眼鏡男說，「我叫唐蔭聰，係附近開電腦舖，以後多多指教。」
「你地叫我陳sir得啦，」陳sir道，「出到去就要大家合作，小組行動互相掩護，唔好自己走咗去。」
「知道。」眾人答。