【高登英雄世紀】Golden Heroes Universe　: 第八話 (一)

第八話（一）
角色：電光、Lucy、？、？？、？


讀白：電光


https://www.youtube.com/watch?v=G7qlcz8xsy4






係半島酒店既電梯，我地被困住。我同一位啱啱認識既少女感受到電梯強烈既震動，電梯急速下降。此際間，我再次將時間停頓，將時間破壞。印象中，少女被我帶離電梯，我亦好好咁處理咗殘肢，但其他既事，我完全記唔起...


「　哥哥，我好驚，我好痛好想返屋企，好掛住你，你快啲嚟救我」

一個少女既啜泣聲影響咗我既夢，我見到一穿着華麗既公主拼命捉着另一位佢稱呼為哥哥既男孩，但最終被數個穿着奇特既成年人分開，公主被帶到上直昇機。悲慘既惡夢令我慢慢從睡覺入面驚醒...


當我再次有意識，係一個又再令我驚訝既場境。我赤裸咁瞓係自己既床上面，而係我身旁同樣赤裸既女孩，就係電梯入面既少女。





我點樣都醒唔起我地兩個點樣返嚟，更醒唔起我地兩個點解除衫。我只知道呢一刻，我唔願意起來，因為嗰位少女緊緊咁抱住我既身體，頭躺係我既胸口，默默咁痛哭。


佢一定發咗個好慘既夢，可能呢個夢，發咗好多年，好似發咗整個人生...


我發覺腰間有種不知明既痛，我摸一摸，我腰上面被紗布包紥過。左腰有好似被刀劏開既血跡。我再檢查整個身體，好在其他地方，以及最重要既地方仍然原好。起碼我知道，我無因為強姦呢位少女而做過某些切除手術。


可能我剛才太驚自己唔見咗小弟弟，反應有啲過大，少女突然醒來，我地四目交投，我而家先睇清楚佢有好特別既綠色眼睛，佢好似係我眼入面睇到我既故事，佢着咗迷定咗望住我雙眼。






我從來未試過對住一個少女有咁尷尬既感覺，我唔夠膽起身，一來我怕我某啲部位貼到佢騎住我既屁股，二來我從來都未試過被咁認真既眼凝視過，我既心跳慢慢加快，心跳聲大到好似會連佢都感覺到。我地兩個鼻尖貼鼻尖，互相凝望咗大約兩分鐘，完全沒有郁動，連眼都唔敢眨。


「　多謝你　」

少女吻着我既額頭，我咁大個人從來未試過呢種咁特別既感覺，即使同任何女性...


少女呢個動作，令我有點失控，我唔小心再破壞時間，周圍既環境再次變成強烈既色彩，但我仍然可以將注意力放係少女身上。可能我潛意識話我知，我想永遠留住呢一刻...

然後，少女無再同我講任何說話。我尷尬咁同佢背對背自己着好自己既衫。我仍然醒唔起我既傷口，噚晚所有既事。






佢好似準備離開我既屋企，我連佢既名都唔知道，我好清楚，如果佢走咗，我無可能再遇到佢，可能呢個係藉口，但至少我都想知噚晚既事，我受既傷，同埋... 我地會唔會再見...


我追出門口，但去到大堂已經無咗佢既身影，我經過會所、泳池，通通都唔見佢。最後落到大街，我開始有啲着急。我急步咁走勻附近既街道，但係都無發現，我開始後悔當初點解唔勇敢啲叫佢留低，或者我地至少可以食個午餐。


無辦法既情況之下，我唯一可以做既就係唔比時間流逝 …


「　我可以知道你叫咩名嘛？」我最終找到佢，我有點喘氣咁突然咁出現係佢面前。


「　當我答你既時侯，我就叫做　Lucy　」

我承認我被佢深綠色既眼睛吸引住。我追隨住佢既腳步，一直在佢身旁。






佢好似無自己既目的地，但我地二人一直由紅磡走到尖沙嘴搭船，到灣仔再上地鐵，最後嚟到中環地鐵站，中途我地仍然無任何溝通。


我地乘搭地鐵，由灣仔出發往上環方向。中途見到既陌生人有點古怪，或者係，今日成日既氣氛都好古怪。去到中環站，地鐵門打開，有一堆淨係着住麻布連頭套既衫，雙腳無穿上鞋既人走入車箱，不論車頭定還是車尾都可以見到佢地。雖然我覺得好有問題，但Lucy 仍然無任何舉動，所以我選擇繼續留低。


地鐵門一關上，其中一個穿麻布衫既人拉咗緊急剎車制。地鐵行咗唔夠一米被強行終止。原先地鐵上既乘客有啲驚訝，有一個中年婦人破口大罵：「　你班陷家剷係咪食飽飯無屎痾啊？係度玩地鐵你有無病啊？」婦人一路指住拉手制既麻布衫人，無發現佢其他既同伴已經開始注視住佢。


婦人非常憤怒，將指住既麻布衫人既頭套一下除低，佢當堂驚咗一跳。該人被剃光頭，但頭上面長滿住細細既藍寶石刺，佢擰轉頭用無虹膜既眼神望住婦人，但婦人知道知得太遲，成班麻布人好似喪屍咁無靈魂既步伐走向婦人，身邊既乘客即刻尖叫走避。


婦人的手腳被捉着，被除下頭套既麻布人猛開婦人既嘴，自己亦猛大口部貼着婦人的嘴。那麻布人最後從口伸出一支長長的藍寶石尖柱刺進婦人的喉嚨，穿透她的後腦。






當其他乘客跑向我們近車尾的車箱，我和Lucy 才察覺有異樣，但這一刻我們無人能離開車箱...


第八話（一）完