【高登英雄世紀】Golden Heroes Universe　: 第四話

第四話
角色：電光，????

究竟我瞓咗幾耐？個頭又開始痛，嗰種痛就好似腦袋不斷擴大，大到連頭骨都裝唔到，即將要爆裂嘅感覺。

但我諗，我個頭痛點都唔及我隔離呢位小姐，因為佢已經比人肢解到我都分唔清楚佢手同腳嘅部分。
呢度似係半島酒店級數嘅豪華酒店房，唔好問我點解知，因為通常我都會同唔同女伴上去呢種地方“開餐”，我呢種意大利回流嘅高材生就係有一種吸引無知港女嘅魅力。

但唔好誤會，我 “開餐” 嘅意思只係用下體同女性嘅小隧道交流，而瞓係我隔離嘅屍體同我完全無關（應該係）。雖然高登一講起英雄只會諗起死靈，但坦白講，我其實都係一個英雄。只係我噚日用完我嘅異能就失去咗知覺，最後就係呢個場境醒返。





今次醒返嘅場景有啲令我驚訝，我未見過被肢解咗仍然可以咁可愛嘅少女，而且，我未見過屍體。

「搞乜 x 野...」

當我真係清醒嘅時候，身上嘅藍色恤衫畀血染成富藝術感嘅紫紅色，牆上面染上一點點嘅血跡。

對着床上位可人兒剩返嘅死人頭，我諗如果佢唔係咁不幸被殺，我地或者可以再嚟一次轟轟烈烈嘅性愛。


酒店房門門鎖忽然被扭開「House Keeping！」





當我仍然滿足緊自己嘅好奇心，研究緊少女嘅假眼睫毛嗰時，酒店服務員突然將門打開，我同酒店服務員兩個四目交投，

呢一瞬間，整個世界時間停頓起嚟，無錯，呢個就係我嘅異能，就同某部分日本電影嘅題材一樣，唔同嘅係，當時間停頓之後，整個世界既色彩變得比平時明顯鮮艷，好似增加咗螢幕兩三倍嘅對比度。

因為光線滯留咗係呢個空間，每樣物件都會獨自用唔同頻率閃爍，所有物質都會呈現液體甚至氣體狀態，

如果我想同實物接觸，就必須將專注力放係嗰個物件上，否則成個世界都好似鬼魂咁捉唔住。







最大嘅問題係，每當我集中注意力，我腦內就會增加壓力，輕微時會流鼻血，重則即時昏迷，就好似噚晚一樣，我仲未記起噚晚發生過咩事。


「各位，以下落嚟嘅時間就睇我呢位時間嘅破壞者- 電光表演」


殺人係我承受唔到嘅後果，我要係限時內清理好現場，好似從來都無出現過屍體，只要挨得過一星期無人發現，警察就好難發現我曾經存在過。


首先，我需要大垃圾膠袋，行李箱，毛巾，乾淨嘅男裝衣物，全新床單，兩支紅酒，用過嘅condom，五萬蚊現金，萬潔靈同一支玫瑰。


以上嘅物品全部係街上面唔難攞，但你唔好問我個用過嘅condom 邊度嚟，我係唔會答你。






集齊物品後，我返到酒店房，

我將破碎嘅屍體逐件放入黑色垃圾膠袋，將紅酒倒走半支，然後將剩餘嘅倒係床上面同淺係牆上。將另外一支都開埋，放係枱面。


將condom 掛係電視機頂， 將五萬蚊現金放係枱頭，然後寫咗一張便條：


「親愛嘅清潔服務員，我知道妳一定是一個美女，我亦知道昨晚的紅酒害我玩得過火了，我知道要清潔房入面嘅紅酒污漬一定係好痛苦嘅事，所以我想鼓勵你，以下的現金全都是你的，是獎勵你辛苦咁清潔。

拜托你，我和女伴都是知名的明星，如果事件比狗仔隊發現，我們將會很慘，拜託你慢慢將這裏清潔好，如有需要，這支萬潔靈應該可以將污漬清理好，

我偷偷將女伴的玫瑰取了一支，希望你今天可以愉快咁工作。」






我將玫瑰穿係便條上面，換上係廣東道偷走嘅名牌西裝就將垃圾袋放入行李箱，離開房間。臨走前，我細細啖咁錫咗酒店服務員一下，而家先發覺，原來佢都係一位靚女嚟，或者下次我地有機會係酒店房見面。


雖然剛才嘅行動非常成功，但係異能已經透支使用，我用毛巾蓋着，一下從口鼻噴出液體，時間又回復正常。


幸運之神仍然係我身邊，當我走入電梯時，又遇到一個非常年輕嘅美女同我單獨乘搭呢部電梯，雖然佢個樣睇起上嚟有啲驚慌...





「 一節新聞報導，





警方收到可靠線報，係旺角麥花臣球場上發現早前襲擊六名警員嘅疑犯，現正派出飛虎隊追捕，呼籲市民遠離該地區。

今日下午３時，石硤尾公園的滑梯設施突然變成黃金，市民紛紛帶着工具將黃金鑿走。直至４時警方將現場封鎖及呼籲市民將鑿走的黃金交還政府，如被發現將等同盜竊案處理。

調查人員仍然在聖安德烈堂教堂調查昨日被不明強光照射事件，牧師表示呢個係大天使已經降臨人間嘅啟示，係神要世人遠離惡魔既意思。

浩賢金融主席陳浩賢太平紳士表示，願意捐贈10億為香港大學研發治療腦癌藥物。

呢節新聞報導完。」

第四話完