【高登英雄世紀】Golden Heroes Universe　: 第二話

第二話

角色 : Ivan / 灰棍


「喂喂，大家過嚟睇下，有人影到香港有超級英雄係天空度閃過啊！Youtube有四五條片，真係好有型啊！」

係課室入面，班女同學既話題由啱啱過嚟既靚仔代課老師，又轉咗去近期最流行既香港英雄話題。只要學校裏面有咩流行，佢地就一定會講。雖然我唔知道下一次佢地既話題係咩，我唯一知既係個話題唔會係我，係其他人心入面，我好似從來都無存在過。






呢種隱形人既角色其實係生活上面都幾方便，由學校地下行到上四樓，唔會有人同你打招呼，唔會有人妨礙到你想做既事，唔會有老師記得你，但係亦都唔會有人關心你。


或者呢種不存在感都可以比我好似嗰位英雄咁，做一啲自己想做既事，唔需要有身份既束縛。講開嗰位英雄，其實由２０１２年開始就已經發生好多怪事，雖然末日無嚟到，但係係唔同地方裏面都有新聞報導有異象。好似上星期百幕達三角洲嗰度出現咗過千條無間斷既閃電，近半年又有好多澳門既高官比鎖鏈勒死，而且仲未捉到兇手，再加上上星期既六警員被傷害謎案。


搞到而家高登時事台變咗好似超自然討論區咁，不過講到最後，總會有一兩個巴打留言「樓價又唔會跌，其他人照常返工」。無錯，我亦都係照常比人無視。


係呢間學校生活好恐怖，每一個人都好似唔屬於呢一度。女學生想快啲放學搵佢地條仔，老師想放學返屋企煮飯，上堂想專心炒股，而學校最大勢力既黑社會　－　德字頭，成班仔食緊隻新興毒品　－　藍寶石，個個食到迷迷糊糊咁都無人理。佢地真係好嘈，我好討厭呢間學校。






通常我都會比其他人遲放學，第一個原因係我唔想同佢地有任何交流，但最主要既原因係我一定要去換走身上件校服，放咗學，我就唔再屬於呢度。


一般而言，我都會着返我件深灰色Hoodie，由第一次我見到美國Anonymous　既服裝，我就知道我係屬於佢地既一群。









但今日並唔止得我一個係更衣室。


我一路換衫既時侯一路聽到班好嘈既德字仔，我真係無心機理佢地嘈乜，而且黃昏到就快天黑，唔知點解我好唔鍾意天黑，好唔鍾意無光。


「點樣啊，係咪女仔就爭人錢唔使還啊？唔好以為我地見女仔就唔敢追數，你唔好咁天真」

一個德字頭既o靚仔一度恐嚇佢面前既女學生，一度索緊佢手上既藍寶石，樣貌亦開始變得迷迷糊糊。


「阿龍，做緊野你唔好食咁多啊，因住陣間比大佬知道，佢話過唔比啲細既 Hi 藍寶石　Hi 多過一袋架，死人架」嗰位MK既同學似乎表現唔到佢既氣勢。






「我屌佢老母啦德字頭，過多幾年我坐撚埋佢個位添呀，使撚受佢氣咩，多鳩餘，點啊小姐，你上次整到我大佬入咗院，而家搵唔到食，啲貨又無晒咁點計呀，係咪要出去跑數賠返比我呀，定還是你想而家比我執劑先呀？定其實你想我將你啲片派通街啊？」MK阿龍一路講一路貼近個女仔。


「龍哥，對唔住，我真係無晒錢，我上次已經比咗個神秘人比我嗰二十萬你，我真係無錢，我都唔知點解會有個神秘人出現，我真係唔知，你信我」　女學生亦不敢反抗。


新聞話上次六警係一個督察既屋企入面比神秘人襲擊，而個督察有傳聞就係同一個女學生有關係所以先比人偷襲，唔通就係我後面呢位女學生？唔通德字頭大佬就係嗰位受傷督察黃仲德？不過都唔出奇既，警黑一家親嘛。


其實以我隱形人既角色，一般嚟講我直接行出更衣室係無人會睇到我，所以我選擇掂行掂過，但可能嗰啲藍寶石既關係，我一經過佢地既身旁，阿龍就一手按住我個膊頭，呢一次係我人生第一次係學校有既存在感。


「o靚仔，你係度做乜野？你聽到乜野？」阿龍將手上最後一小包既藍寶石都索入個鼻。







佢既身型高我起碼一個頭，而且佢經常練泰拳，肌肉結實得好緊要。但唔知點解呢一刻我留心唔到，我剩係望到夕陽照射落嚟既影，我比人按住既影。


我記得細細個嘅時侯，屋企人好少同我講野，身邊每一個人都好似活係自己嘅世界入面。佢地只會對我做到嘅結果有要求，但係對我完成嘅過程完全不聞不問，唔會理中間嘅過程有幾咁痛苦。


每當我唔開心我就會去中環碼頭，慢慢咁望住太陽消失，望住自己嘅影一齊消失。


我好疑惑究竟我嘅存在係咪都會同自己個影一樣，因為人嘅光源消失而令到自己唔再存在。


係呢一刻，開始喪失理志嘅阿龍用左手掐住我條頸。佢嘅口水好似糖漿嘅質感從佢口流出。眼球嘅虹膜縮細到好似得返瞳孔一樣。






我開始懷疑佢食嘅係咩毒品，但佢隻手越掐越緊，我亦都開始感覺到呼吸困難嘅滋味。


阿龍忽然間張大佢個滿怖糖漿口水既口，一下咬落去我隻耳仔。


「啊！！」

無論我點反抗，我都推唔開發緊癲嘅阿龍，可能今次係我第一次感到死亡，呢一刻我腦海裏只有一個想法：


「如果我嘅前半生活得從來都無存在過，咁我下半生就要活得比人多一倍嘅生命！」






靈魂好似聽到呢句說話嘅感召，我見到我地下上面嘅影係阿龍嘅手上偷走出嚟。影好似係度拎緊啲咩，係地下上面嘅爛玻璃？


夕陽就快消失嘅時候係最光猛嘅，我發覺整個更衣室都被照射成金黃色，唯獨是我個影，佢投射咗係一個無可能存在嘅角度上，將玻璃瞄準阿龍隻右耳，一下插落去。


阿龍痛到即刻放開咗我，我書包入面嘅開信刀拋跌落地下，我個影居然即刻接住。


「嘿，今次嘅存在感唔錯」我忍唔住偷笑咗一下。


把開信刀係動漫節買，我專登將佢磨到好利，因為我認為總會有一日我會用到佢嚟了結自己既生命，但最終，我用咗嚟幫我增加多一次生命。


影子用開信刀快速咁界斷阿龍嘅手筋腳筋。


「發生咩事，點會咁樣架？」

見到阿龍倒地，阿龍嘅朋友諗都唔諗轉身就走。我同影子仲未得閒理會佢既離開。


阿龍係傷口流出黎既血有點怪，比陽光照射後會有閃爍既藍色，好似充滿住細細粒藍色既砂糖。唔通呢個就係藍寶石既副作用？


倒地既阿龍突然間眼神變得更凌勵，對住我好似smile.jpg既笑容，牙齒變成尖狀而且係透明藍色。佢被界既傷口爆出同藍寶石一樣質感既尖柱，四肢變成依靠尖柱支撐，爬係地上。


我心諗，大獲喇。


我一手捉住學生妹，拉住佢準備離開更衣室，影子開始向呢隻藍寶石怪物進攻。但每一下既割傷，都令到隻怪物生更多尖柱，變得越黎越大隻。


影子抵抗唔住，當我同女學生衝落樓梯時，隻怪物已經跑到去我地後面，一打將我地兩個掃低，佢手上既尖柱已經分裂到變成三隻尖柱既爪，將我地由四樓一下掟到落地面，


影子係地面將我地兩人個一手拖起，雖然死唔去，但仍然感覺到衝擊既痛。不過，我見到更慘既情況，陽光已經完全消失，我既影都跟隨消失，開信刀跌咗係地上。


學校離市中心有一段路程，我襯住隻怪物仍然落緊樓梯時同女學生一齊奔跑。


「如果有咩事，我會留低阻住隻怪獸，你一路跑去旺角搵人求救就得架喇！」

我雖然咁講，但其實我知道我獨自面對隻怪物只有死路一條。

開心既係，女學生向我點一點頭：


「多謝你，灰色衫既英雄」


開心既時光過得特別快，當我地逃跑到去球場既時侯，係漆黑既夜空上面，閃過一度藍色既光，隻怪物從我地既頭頂繞過，跳咗係我地面前，估唔到我會預言中。


「你去求救啦，我要係我既存在史入面做一次英雄！」


我將書包拋向怪獸既右邊然後向住右邊奔跑，而女學生就往後逃走。


當怪物追住我既時侯，我知道差唔多宣佈死亡，無幾耐，佢將我整個人禁低，係咪差唔多可以宣布，呢個就係活多兩倍既結果？


忽然，一道雷電從天上面打落嚟，打中我面前既怪物


第二話完