衝動性.行為: 第五節

為給予法團主席和曾生一個良好印象，我較預約時間早到十分鐘到達飯店。只是，剛進飯店便已經見到曾生和一個年約六十歲的男人在閒談，我在想那個人便是法團主席。
 
「阿詹！到左啦？呢度呀！」曾生向我揮手，並示意我找個位置坐下。「同你介紹，呢位就係美麗花園既法團主席施永熊主席。」
 
「你好，施主席！你叫我阿詹就得啦，今日第一日返工，以後要多多指教。」我伸出右手示好。
 
「有咩指唔指教呀，屋苑既管理就靠晒你地啦！」
 
施主席的外表和談吐果真如中原地產老闆施永青有八分相似，他外表溫文儒雅，談吐有禮，不像我以前接觸過的主席一樣，以為自己高高在上，其實只是一個以權謀私自私自利的人。
 




剛入行時的我想不明白，那些高層或管業經理究竟在辦公室內幹什麼，有事就交給我們去處理，我們堅守屋苑守則辦事而被人投訴，經理則「冷手執個熱煎堆」出來放寬條例，賣人情給住客補數，我年青時在想經理這個職位其實不太難做，最重要的便是懂得分配工作。
 
只是，現在的我清楚知道，作為一個經理要比其他同事有更豐富的工作經驗，熟悉香港的法律法規，而更重要的便是替公司找多點生意，亦即投標屋苑的管理工作。
 
以我所知，美麗花園的管理合約，正由曾生一手促成。
 
「阿詹，第一日返工，對美麗花園有咩意見呀？」施主席問。
 
「幾好呀，我今日行過屋苑既設施房同公眾範圍，大致上我對屋苑都已經有初步既認識同理解。」
 




「我地後日就會舉行法團會議，到時再介紹你俾其他委員認識，佢地個個都好好人，希望將來大家合作愉快啦！」
 
「係啦，總之有咩就攞出黎講，施主席一定會同我地諗掂佢既！」曾生說。
 
「明白，咁後日既會議有冇咩重要議題要講？我好好預備一下。」
 
施主席搖頭嘆氣道：「其實今次出黎同曾生食飯，主要都係想問下你地管理公司既意見，法團啱啱收到屋宇署寄黎既驗樓通知書，黎緊我地好快就要做大維修……而且屋苑既儲備都已經用得七七八八，我諗係時候要加管理費啦！」
 
「我今早睇過屋苑只有百多萬盈餘，我諗加管理費係一件無可避免既事，再講，幾年前香港實施最低工資，保安同清潔既員工薪金都大幅上升，就算要加管理費我地都大條道理。」
 




施主席閉上雙眼，思忖了一下道：「明白既，我地都已經撐左幾年唔加管理費，而家都係時候調整一下啦。阿詹，可唔可以同我收集一下附近屋苑既管理費資料，到時我地響會度攞出黎傾，俾其他委員過目。」
 
「當然可以，冇問題！呢個係我既工作，我下午返管理處就處理。」
 
「阿詹，大維修係屋苑管理既一個重大項目，你有咩需要就出聲，我地公司有好多同事做支援。」
 
「好，唔該曾生！」
 
因為香港樓宇日漸失修殘舊，為減少人命傷亡，政府於2012年6月起立例強制被屋宇署指定的屋苑進行驗樓程序，無可避免的是業主將為此需繳付龐大維修金額，對部分年長退休業主做成一定壓力。
 
只是，即使我已經有接近十年物業管理經驗，可是對於大維修，我的經驗可以說是零，畢竟過去工作的地方大多是新落成的屋苑，對於大維修的整體運作，我是毫無頭緒。
 
接著的整整一小時午餐時間，雖然曾生和施主席二人說話風趣幽默，可是我的腦海裡已經被大維修所纏繞著，真正吃龍肉也無味。
 
午飯過後，我便急不及待的回到管理處，為後日的會議埋首準備。