[真人真事]那些年錯過的愛情: 中三５９
今天我們一如以往到醫院探病，當我們看見老豆時，只見他臉上插滿喉管，對話時連基本的說話也有困難。啊媽見到老豆一日之間變成咁樣，就去左醫生到詢問情況。
啊媽：「醫生？點解佢今日變成咁？琴日仲好地地架」佢指著老豆的病床說
醫生：「病人情況惡化得好快...依家連呼吸都有問題。估計癌症已經擴散左去肺」
姑姐：「咁....佢仲可以挨到幾耐？」
醫生：「應該一星期啦，你地要做定心理準備」
醫生講完後便立即離開。啊媽聽到後就喊著說
啊媽：「之前仲話有兩個月...點解咁快....」
姑姐：「我扶你出走廊坐陣先啦...啊傑你睇住你老豆」
佢地兩個出左去，我就坐左係老豆病床旁邊同佢傾計。雖然聽到壞消息，但我仍然裝作輕鬆
老豆：「傑仔，佢地出去做咩？咁耐既」
我：「可能買野比你食掛...依家你辛唔辛苦？」
老豆：「屌唔太辛苦姐...好撚彩入左黎醫院，無啦啦連呼吸都有困難，吊住條命先」佢笑著說
我：「唉...快Ｄ出院同我捉象棋啦」我握著老豆的手說
老豆：「你依加玩埋我果份，自己同自己捉棋先練到野」佢笑著說
我：「係咪架？我真係會試架喎」
老豆：「屌，你試下啦返屋企，自己同自己玩住先，我好快返屋企同你捉架啦」
我：「嗯，你出到黎一定輸比我」我苦笑著說
老豆：「憑你？好，等我出到黎就接受你挑戰」
我：「一言為定啦」
過左幾日後，我地探病入病房果陣竟然見到老豆係到睇馬經。看樣子似乎十分精神
家姐：「爹，做咩今日咁精神呀？」
老豆：「哦...你地今日咁早黎既？難得地三個一齊出現喎」佢笑著說
啊媽：「家姐今日放假咪黎探你囉...你今日見點呀？」
老豆：「今日好精神呀，咩機都唔洗用！睇黎可以好快出院」
我們一家人傾左一陣計之後就有一大堆親戚入左黎探病，令到本身無咩野講既我正式坐埋一二邊聽老豆同親戚傾計。老豆同呢批親戚傾完之後又有第二批親戚入黎，我見咁多人就同家姐出左去走廊坐一陣。
家姐：「唔..肥傑，係到坐陣先啦。你老豆依家招呼緊Ｄ親戚都唔得閒理我地」
我：「嗯...今日佢好似幾精神」
家姐：「希望係咁，我落樓下買Ｄ野飲，陪唔陪我？」
我同家姐落左去飲下野傾下計，直到探病時間結束前十分鐘先返上去病房。今次入到病房，就見到老豆一批好朋友黎左。探病時間差唔多完果陣，老豆就同家姐講
老豆：「記住照顧你啊媽同你細佬」
家姐：「得架啦，放心交比我」家姐笑著說
老豆同家姐講左幾句後，就瞪大眼睛看著我說
老豆：「喂，你有冇野想同我講？」
我：「下...無呀...」一大堆朋友圍在病床面前，我什麼也說不出口
老豆：「真係無？無機會架啦喎」
我：「無呀...」
老豆：「屌，我係到果陣你又唔講。你係咪想等我走左先講呀」老豆激動地說
老豆係咁多人面前罵左我幾句之後我就坐埋左一邊唔出聲。去到離開病房果陣，老豆便捉著我的手說
老豆：「岩岩我語氣重左，SORRY」
我：「無野喎...我地走先啦」
老豆：「嗯..聽日見啦」
離開病房果陣，我企左係病房門口回望左幾次老豆。老豆知道我望左佢幾次，就揮手叫我快點離去。啊爹今日比之前精神好多，但感覺總是怪怪的。夜晚凌晨兩點，啊媽的手提電話傳來音樂和振動。我看著啊媽接完電話後，雙眼中的眼淚不斷流出
我：「唔係有Ｄ咩事呀...？」
啊媽：「醫院打黎話你老豆神智不清，叫我地立即去醫院」
我同啊媽換過衫褲後便立即上的士，到達醫院時，已經是凌晨三點。
我地去到病房後，醫生便立即告訴我們老豆的情況
醫生：「岩岩佢係到大叫，騷擾其他病人訓教，我地打比你就係想你地黎睇住佢」
啊媽：「唔該晒醫生...」
我地行左去老豆床邊後，佢仍然係到講其他野。仿佛看不到我同啊媽一樣，啊媽和我摸一摸老豆的手後，發現竟然冰冷得像雪櫃一樣。
啊媽：「喂，你認唔認得我呀？」佢望著老豆說
老豆：「認得，你係我老婆」
我：「咁你認唔認得我呀？」我握著老豆的手說
老豆：「你咪傑仔囉」
「奇怪了？老豆一切正常，到底出了什麼問題？」
過左十分鐘，老豆係病房大叫左一下
啊媽：「喂，咩事呀？」佢拍一拍老豆
老豆：「我見到我老豆，佢帶住我同老母去飲茶」佢捉著媽媽說
「天啊，爺爺死了十多年了。點解老豆會突然咁講？難道這是離開前的先兆嗎？」
啊媽：「你冷靜Ｄ先，我會陪住你」媽邊喊邊攬著老豆說
最後，我同啊媽一直坐到天光先離開醫院。確保老豆訓著左之後，啊媽先肯跟我走。由於我地成晚係醫院照顧老豆，所以回到家後我們便立即訓覺。張開眼睛後才發現已經係下午三點。我的電話上更有幾個未讀訊息，我睇完訊息便立即叫醒啊媽
我：「啊媽...姑姐話老豆就黎唔得啦...」
「嗚...嗚...」 媽在床上傳出哭泣聲
我：「唔好再喊啦...起身啦...」我輕拍著媽的膊頭說
啊媽：「嗯...你出去等我十分鐘啦」佢在床上說
收到這個訊息後，其實最傷心的不是我這個兒子，而是與老豆相處三十年的媽媽.