[真人真事]那些年錯過的愛情: 中三２１
有一日放學經過我果層既特別輔導班，見到教我果班中文既MISS CHAN自己一個係入面。我就係走廊出面同佢揮個手，佢見到我後就笑住行出黎開門。
MISS CHAN：「子傑？咁凍仲唔返屋企？」佢以一把溫柔聲線問出
我：「未走住呀，我要等陳文單留完堂先落去打波」
MISS CHAN：「出面凍呀，入黎坐住等啦」
入到呢一班之後，我望住呢間特別輔導班用既房好似打完仗咁。電腦桌上既滑鼠線斷左，壁報板Ｄ紙又一地都係。連遮光用既廉都比人破壞到無晒。最ON9係校工見到呢班地下有垃圾都唔會主動入黎打掃。呢班人就好似比校長放遂左咁。望到呢堆野，就會諗到呢班黑社會既破壞能力到底有幾強。
我見MISS CHAN仍然專注做佢桌子上既野，見佢摺緊野我又好奇。我就坐係佢隔離望住佢
我：「MISS CHAN你摺緊咩？星星黎既？」
MISS CHAN：「子傑，我摺緊幸運星。」
我：「一定係送比男朋友啦！」我笑住同佢講
MISS CHAN：「我唔會回應你呢個問題！」佢對我笑左一笑
「係喎！聖誕禮物就送幸運星比思蓓！」我靈機一觸諗起
我：「MISS，不如你教我摺啦」
MISS CHAN：「無問題呀，你想用飲管定係用紙摺？」
我：「跟你啦，用紙」我是但答佢
MISS CHAN教左我好耐先摺到一粒，老師見我學咁耐都唔識就係到笑我，直覺話比我知無呢方面既天份。不過我都約左第二日再搵佢教我。希望能夠在短時間內學識摺幸運星。我走左之後就落左樓下搵啊單打左陣波，夜晚就同屋企兩老出左街食飯。當食完去拎車返屋企果陣，老豆無啦啦嘔返岩岩食Ｄ野出黎
老豆：「屌..又嘔既？」佢拎住張紙巾抹下個口
我：「又嘔？你呢排都有嘔咩？」
啊媽：「係呀，你老豆應該腸胃唔好啦」
我：「哦...有事記住睇醫生...」我真係一個不孝子
老豆：「你打波得啦，唔洗理我架啦」佢好明顯係到窒我
如果佢依家同我講呢句說話，我一定會笑住應佢：「屌，講呢Ｄ」
我：「我成日夜返屋企，比你同啊媽二人世界姐。反正家姐成日唔係屋企」我笑住同老豆講
老豆：「咁益我呀？離停車場仲有一段路，岩岩嘔完有人揹我就好」
我：「上黎啦」我紮左個馬叫佢上黎
老豆：「你得唔得架，你揹完我唔好嘔係架車到呀」
我：「我係台灣都係咁揹你，黎啦」
承受住大約一百八十磅既人就到停車場果陣，老豆無啦啦同我講
老豆：「你都算乖架啦...生左個乖仔出黎真係好」
我：「我不嬲都乖架啦」我放返佢落地
老豆：「你係咪讀中三啦傑仔？簡好科未？」
一向工作忙碌既老豆唔記得我讀中幾係好正常既事。我都唔記得中三有選科呢個問題，係無意見情況下我就問有讀過書既老豆當年佢簡咩科。
我：「老豆，你以前中三簡咩科讀架？」
老豆：「我？調理同農務囉」佢好認真咁答
啊媽：「你講咩話？」佢笑住望住老豆講
「以前有呢Ｄ野讀架咩？？」當時我心想
直到一兩年之後係網上睇返，我先知道咩叫調理農務。
幾經辛苦學識摺左幸運星後，我就係學校附近一間文具店買左一個玻璃瓶。呢個玻璃瓶外型係小小既一個聖誕老人。我摺左一定數量就放晒Ｄ星星入去，希望呢份聖誕禮物思蓓會鍾意。至於啊希，佢係放聖誕假前既一日返學日子，終於將面書既交住由單身轉為交住中。交往對象：張權呢個仆街仔。
知道左呢個消息後，我就係聖誕節第一日放假當日約左思蓓出黎傾下計。當佢屋企有人，我地傾計既地方往往係佢屋企路口附近既天橋。但今次既地點我地約左係一條河上面，我地坐係呢條河旁邊，望住個夕陽傾計。
思蓓：「雖然好凍...但望住日落真係好靚」佢望住黃黃的天空講
我：「緊係啦...夕陽無限好...」我笑一笑講
思蓓：「卻是近黃昏...」佢唱起歌黎
我：「係啦，係呢個咁靚既天空下面，我想做Ｄ野」
思蓓：「你有咩想做呀羅二少？」佢笑住問我
我把銀包從褲子拿出來，然後再拎出入面啊希摺既二十蚊心心出黎。思蓓見我拎左呢個心心出黎，佢就無出聲望住我
我：「呢個心心既主人，應該唔再屬於我啦」我望住思蓓講
思蓓：「唔....」佢安靜住聽我講野
我：「有人同我講過，一個心只可送比一個人。依家果個人心入面已經有左第二個人。睇黎呢個心心冇必要再留係我銀包到」
思蓓：「點解？留低佢做紀念唔好咩？」
我：「有Ｄ野，送比一個人就夠，格硬留低都無意義」我笑左一笑講
思蓓：「咁呢個心心...你打算點處理呀...?」
我拎住呢個心心，掉左落條河到
思蓓：「做咩掉左落河？真係唔想留低佢？」佢望住條河問我
我：「感覺...話無左就無左...真係好突然」我想起啊希的話
思蓓：「點呀，今日咁多偉論發表架」佢面上笑左一笑
我：「廢話講完啦，依家我要搵一個女仔，接收我既心心」我微笑住講
思蓓：「你一定會搵到！」佢望住我講
我：「一定...一定會比我搵到...！希望呢個日子快Ｄ黎」
思蓓：「我都希望呢一日會出現」