[真人真事]那些年錯過的愛情: 中三０１
「屌，咁撚耐都未出黎既」老豆望住隻錶講
拗柴休息左幾日後就完全康復。一星期左右後，就係家姐返黎香港既日子。呢一晚我地成家人渣左架私家車去機場接佢。等左好耐終於見到家姐推住Ｄ野出黎，遠睇之下成個外表都成熟左好多，但其實外表變了，內在卻不變，佢依然是那一個愛惜家人的姐姐。家姐同老豆老母見面後就循例攬一攬，傾下兩句。
家姐：「肥傑，好耐無見」行去停車場果陣佢同我講
我：「...又講廢話，你都成熟左好多」我低住頭咁同佢講
家姐：「係咩？我買比你果對籃球鞋爛左未呀？」
我：「未爛，但係個鞋底蝕晒囉」
家姐：「第日買對比你啦！」
返到屋企幫家姐拎左Ｄ野出黎之後，我就開左個MSN出黎睇，發現啊單同啊希都有係我離線果陣傳個訊息比我
啊單：「屌，聽講教我地班中三其中一個班主任係天SIR」
啊希：「啊傑，開左學果日放學去唔去食野？」
我答應左離線既啊希後，就回覆在線上的啊單
我：「邊個係天SIR？」
啊單：「成日扮型溝學生妹，但係教書好撚嚴果個天SIR呀，第二個做我地班主任就係果個數學老野，咩撚野榮SIR」
我：「咁今年咪無得訓教？？」
啊單：「屌，早知中二大考考差Ｄ，入撚左特別輔導班佢算」
我：「就開學啦，睇下條友係咪真係咁嚴」
開學當日，回想起上年同啊君食早餐。依家只能夠係屋企自己一個食公仔麵，諗返同佢搞成咁又有小小唔開心。返到學校之後，岩岩好就係集隊時間，我行去自己條隊排左係最後。差唔多打鐘前，無啦啦有人係後面拍我膊頭，我望去後面，呢個人帶住眼鏡，身高大約矮我一個頭
「唔該，呢到係唔係3E班？」
身後呢個人帶住眼鏡，身高大約矮我一個頭。有一把蓬鬆既頭髮，佢著住一身運動服加上一把柔和既聲線，令人覺得係一個書生頖型既人。睇呢個人一身打扮都係出入精英班之地。無錯，呢個人係男仔黎。我無咁幸運有咁多女埋身
我：「精英班係3F呀，你再行去右面就見到」
男仔：「我3E呀，姐係呢到係3E？」
我：「係呀...未見個你既...轉校生？」
「係，我個名文竹。叫我啊竹或者全名都得」
我：「我叫啊傑。打撚左鐘啦，竹哥你企住我後面先」
打左鐘之後，我望去身後排隊的高FORM。望左一陣就見到啊嘉企左係中四既隊伍上面，仲比我見到啊MAY係第二條中四既隊伍入面。姐係，佢地兩個女仔都留左班。我仲望到啊嘉好似同啊洪一班。但係中五太遠就睇唔到了。我決定遲Ｄ再搵返啊魚同啊希出黎，比返份手信佢地。
上到班房後，搵左個位就同啊竹坐左係到傾計。啊單就同第二Ｄ人一齊坐。傾計之下發現啊竹又係大陸落黎讀書。但係聽佢把聲一Ｄ都唔似大陸學生。兩個班主任入左黎之後，搞左一陣野就開始自我介紹。後生靚仔溝死女果個叫天SIR，好老無咩頭髮果個就叫榮SIR。
天SIR：「今年我教你地班英文架啦，榮SIR就教你地數學。提一提大家，後日會有英文默書，大家準備下，唔合格會有獎勵」
聽到天SIR呢句，坐我同啊竹後面既啊山係後面叫我地
啊山：「喂，啊傑新仔，有無興趣出貓，聽講呢條友好嚴」
啊竹：「轉校第三日就要我出貓！？」
我：「出貓啦，斷估你英文都係廢到仆街架啦」
啊竹：「咁我陪你地啦」佢笑住應我地
小息果陣我同啊竹落左去籃球場打波，打左一陣啊單都黎埋。大家互相介紹下就識左大家。啊竹話自己係大陸唔知打咩校隊，點知射姿就好似小朋友推波咁，相當核突，技術又唔係特別好，不過絕對好過湯尼同啊金。不過佢又真係射得幾準，問左佢係大陸邊到落黎之後，我同啊單幫佢起左個名叫「江夏高比」。
差唔多上班房果陣，啊希就拎住個銀包係操場行出黎
啊希：「啊傑，記唔記得今日我約左你架？」
我：「記得呀，放學樓下門口等」
我地三個上樓梯果陣，啊竹就八掛問啊單
啊竹：「啊單，岩岩果個女仔邊個黎架？好靚喎」
啊單：「正呢，佢讀中五，籃球隊Ｄ人黎」
啊竹：「啊傑你就好啦，有個咁靚既女仔放學約你」佢笑住咁講
我：「普通朋友姐..哈」
上到去之後就聽天SIR講Ｄ溝女爛GAG。榮SIR就企埋一二邊係到陪笑，好明顯天SIR先係呢一班既大佬。天SIR仲規定自己班既女仔上堂唔洗紮頭髮，裙可以唔過膝頭。我地班女聽到之後就濕晒咁係到祟拜天SIR。佢同榮SIR係中三級既訓導主任，呢一級既大小事務都係佢地話事。聽佢同我地傾下計之後，無我地想象中咁嚴厲，只係教書上比較認真。
放學後，我去廁所整理下頭髮就落左去搵啊希。啊希見我黎左之後就笑左一笑，然後慢慢行出門口。大家行去食野既途中，講下大家發生左Ｄ咩事。佢又講下返工有咩經歷比我聽。最後我地又係去左食M記。我買左野食之後，大家就一邊食一邊傾。食緊果陣，我拎左個心心鎖匙扣出黎
我：「啊希，我買左台灣手信送比你」我怕羞地講
啊希：「哇...同用錢摺果個心心又係一樣架喎...都係紅色...好靚呀」佢拎上手不斷摸
我：「嗯...呢個鎖匙扣希望你用得著啦」
啊希：「啊傑...多謝你先...咁耐無見..你有冇野想同我講？」佢拎住個鎖匙扣講