[真人真事]那些年錯過的愛情: 中二１１
「啊傑訓左未？我係啊希」
啊希竟然無啦啦SMS我？於是我拎起電話回覆佢
我：「未，做咩？」當時無心情，女神搵我都唔想應
啊希：「唉…我同男朋友嗌左交…想搵人陪下我傾計」
我：「你男朋友同你嗌交…！？」
啊希咁樣講令我諗起，今日輸波之後，啊希同一個打籃球隊既師兄企埋左一二邊傾計。唔通果個師兄就係佢男朋友？但我仲未熟悉晒全部師兄既名，所以唔知佢叫咩名。
我：「佢係我地學校打籃球隊架？」
啊希：「下…你又知…?!」
於是，我就同啊希講左，今日輸完波見到佢同個男仔係個隱蔽地方傾計呢件事，佢認左果個係佢男朋友，但係唔肯同我講發生咩事。最後我陪佢傾到夜晚一點左右先訓教。
啊希：「夜啦，快Ｄ訓啦，多謝你同我傾下閒計」
我：「唔緊要啦，反正我心情都唔太好」
啊希：「聽日見，記住唔好同人地講我地今日傾到咁夜呀」
我：「哦…好啦」
我唔知Ｄ女仔做咩唔想比人知我同佢地傾過計，但係啊希叫到我唯有照做。第二日返學，由於打完學界同太夜訓，我朝早返到課室就訓左教，直至去到食飯先有人叫醒我。
啊金：「喂，咁訓得既你，痴線架」
我：「…咁快食飯啦？」我伸個懶腰
當我收拾桌上既書本，有人拍我隔離個走廊窗，我位坐到係因為反光令我睇唔到係邊個黎。由於我坐門口位，坐係到就開到個窗，我開左之後竟然見到啊希渣住個銀包
啊希：「喂，一齊食LUNCH啦」
我：「唔係掛！？」我以為自己未訓醒
啊希：「係呀出黎啦」佢對住我微笑
我同啊金出左去之後就同啊希行左落地下，當我同啊希諗住行出學校門口，啊金就行左去小食部。
啊希：「喂，你又去邊呀？」
啊金：「你唔係靜係約啊傑昨咩？」
啊希：「一齊啦，有咩所謂」
於是我地三個就一齊去食...M記。食野果陣都係啊金同啊希講野多，我唔習慣係第二個人面前同啊希講野。所以一邊食就一邊玩手機GAME。
當我接近食完，收到一個訊息
「唉，同啊希食都唔叫埋我！心痛」訊息來自啊嘉
我Keep住玩電話無理佢既同時，啊嘉又傳左個訊息黎
「喂喂，應我啦，掛住玩電話」
啊希：「做咩呀？有人搵你？」
我：「無呀，食完不如返去打波呢」
啊金：「好呀，反正我都想減肥」
我地三個返到學校之後就去左球場打波，打左一陣就見到啊嘉自己一個行埋黎。
啊嘉：「啊希，你同啊傑咁FD架咩？」佢好假咁笑住問
啊希：「今日無人同我食咪搵佢囉..」
啊嘉：「咁我聽日可唔可以同你地食架？」
「我屌，呢條女煩撚到...」 呢個時候，啊單既出現救左我一命
啊單：「喂，係咪差兩個人鬥波？」 佢同一個同班同學行埋黎
啊嘉：「鬥波？好呀，你叫咩名？」
啊單行左過黎細細聲同我講 「喂，呢條女咁柒，邊撚個黎架」
我做左一個伸利既表情比啊單睇，佢笑住係到講「唔，明白晒」
啊單：「唉，快Ｄ分隊啦，就黎上堂」
Lunch time打完波之後，我返到去課室都係訓教。直到放學我又比啊金叫醒左，諗住同啊金落籃球場打波，點知比班中一雞搶左黎打全場。我地諗住唔打籃球打排球，點知望去排球場見唔到啊樂，反而見到啊天同一個唔識既師兄用腳控住個排球。
啊天：「喂，想省尻邊個？」
第二個師兄：「著黑色底打波果個中一仔啦，個樣咁撚串」
啊天：「得啦，好耐無踢，比我試下中唔中」
排球場同籃球場既距離相差好遠，如果咁都踢得中人一定需要相當好既射術。啊天係籃球隊主力加上足球隊外援，省尻中一仔呢Ｄ野真係難佢唔到，佢一出腳，就踢中左籃球場著住黑色底衫果個中一仔，呢球踢中左佢隻腳，半邊腳跪左係地下。
呢個時候，啊俊無啦啦係籃球場方向走出黎大叫，「邊個又踢個波埋黎呀？？」
「我屌，啊俊混左入班中一仔入面既」 我同啊金講
第二個師兄又拎左排球隊第二個排球，準備向啊俊起腳
師兄：「我屌你老母！」呢一叫好大聲
「砰」一聲，呢球射出去比啊俊避開左，個波應聲撞落岩岩暑假翻新完既牆到，白色既牆又多左一個黑色印出黎。呢個時候，汪SIR就出左黎。
汪SIR：「喂，做咩一邊踢波一邊講粗口？！」
啊天：「琴日輸左波唔開心，發洩下情緒姐」
汪SIR：「你又有咩解釋呀，啊銘」佢叫啊天旁邊既師兄
啊銘：「溫書溫到悶，落黎解下悶」佢好風趣咁答汪SIR
我：「喂，無野睇啦，落去打波啦」我叫啊金
啊金：「陪我買野飲先啦」
當我地落到去小食部，見到啊俊坐左係到叫我地
啊俊：「我屌你，你地知唔知岩岩我差Ｄ死撚左呀！」佢好急咁講
啊金：「我地知啦，做咩你又會無啦啦同Ｄ中一打波架」
啊俊：「屌，琴日睇撚完籃球學界咪想打下波囉，依家出去打啦不如」
我：「是但啦，反正我無野做」
啊俊：「得啦，我有個ＦＤ都想打，同我同班既」
呢個時候，比啊金更大份身型既人出現係我地面前。呢個肥仔好有禮貌飲住野咁自我介紹，佢叫自己做豬皮。後來，識落先知豬皮人如其名，佢個人外形同個腦都好撚豬。
我地出到去學校附近一個球場之後，打左半個鍾左右就有幾個著住校服既人黎挑機。
其中一個：「有無興趣三打三？」
我一望呢條友既校服，我認得同基佬宗著果件校服一樣，姐係代表呢幾個人同啊君同一間中學。
「年紀好似同我地差唔多喎，不如打完問下佢地識唔識啊君同Leo」我心諗
我:：「好呀，開波啦」
我同啊俊同豬皮一隊，啊金就係出面食花生。雖然豬皮唔識打波，但係對住呢三條排骨，豬皮只係識射籃底都屈左佢地機。我地贏左之後，呢三條排骨又話要打多場，最後都係同一個命運。當佢地想走，我就決定走埋去問佢地野。
我：「喂大佬，你地識唔識Leo？」
佢地：「唔識呀」
我：「你地唔係籃球隊架咩？」
佢地：「唔係呀」
屌，唔怪得呢三條排骨咁撚屎波。自從係啊君個網誌睇到有Leo安慰佢之後，我就諗啊君講果個Leo係咪就係佢學校籃球隊問佢拎電話果個男仔。今日見到啊君學校D人都無收穫，我就決定今晚去MSN問基佬宗。
自從上年係體育館睇完啊君打友誼賽之後，我一直都無見過基佬宗。直到我升中二果個暑假去練網上加入既籃球隊，係路上撞到基佬宗著住一件同上次唔同既校服。而且咁耐無見覺得佢MAN左，於是我就同佢傾左一陣計，得悉佢係學校比人排斥，學校又無咩同學同佢玩。所以佢係中一升中二既暑假就轉左去啊君果間中學到讀。
當晚食完飯之後，我就係MSN問基佬宗
我：「你知唔知邊個LEO呀？同你同級既」
基佬宗：「應該知，係咪打籃球果個呀？」
我：「係呀，佢同啊君熟唔熟架？」
基佬宗：「等我幫你收下料先！遲Ｄ話你知」
點知呢一等，已經過左半個月。呢半個月入面，啊希果班女籃輸左學界之後，就決定休息半個月再練，所以啊希同我講，當女籃練返波就順便叫我一齊返去練。甲組學界輸左之後，我無去到籃球隊練習，只係同啊俊，豬皮，啊單打下街波過日子。然而，我差唔多日日都會上啊君個網誌到睇佢返學放假有咩特別事發生。點知呢一日，竟然係佢日誌比我見到
「與你的第一天！永遠記住這感覺！」
呢個就係日誌第一行，之後內容全部都係今日佢同呢個男仔發生咩事，呢個男仔點樣係學校向佢表白，啊君自己有幾開心之類。呢個男仔就係Leo，佢叫啊頌。睇住啊君既網誌，我竟然自自然然流左少少眼淚出黎。
「點解？我明明唔鍾意啊君架，我唔係只係當佢只係好兄弟，好朋友架咩？」
我望住網誌既留言，差唔多有十幾個人係到祝福佢地兩個。我熜左個電腦，自己一個人返左睡房，諗住早Ｄ訓等自己咩都唔好再諗，點知呢一晚，我真係訓唔著。一直以黎，我唔知道我對啊君既感覺係點，我唔清楚自己既想法，但呢一晚，我終於知道羅子傑對啊君既感覺，可惜，我知道得太遲了。
當啊君鍾意我，我無去在意。但當我發現自己對啊君既感覺，啊君卻離我而去。
呢一晚，我係床到拎張柀蓋住自己，已經唔知自己喊左幾耐。我心入面只係諗住啊君果句說話
「反正你已經唔再係我當初認識既羅子傑...」
究竟係你變左...定係我變左...睇黎無一個正確既答案可以解答呢個問題...
我要快樂 我要能睡得安穩
有些人 不抱了才溫暖
離開了才不恨 我早應該割捨