[真人真事]那些年錯過的愛情: 中一０１

入左呢間中學之後，全部新生都要係籃球場排隊。我見到呢間學校，心入面第一個反應　「咩撚野學校黎...」

　　我地集隊既籃球場，地下全部都係一條條裂痕，你行個都有機會仆街個Ｄ地下黎。學校外牆有裂痕之外，仲有一個個圓形既黑色印。當時既我，並未意識到呢啲究竟係咩黎。 

　　集隊第一件事緊係望下有咩女仔比較吸引。但我四圍望之下，冇一個及得上啊靜同啊喬既樣，可能佢地兩個本身個樣似中學生，身材又好。所以我對呢班女仔都無咩興趣。 

　　迎新日呢日冇咩特別，都係大家一班中一仔玩下低能遊戲又一日。中學第一個認識既朋友係一個男仔，佢叫啊威。一個由大陸落黎香港讀書既學生，由於大家取笑佢帶有大陸口音，大家都唔願意接納佢。係大家冇朋友既情況下，我地就做左大家第一個朋友。 

　　今日迎新日好快就完左，呢間中學大部分人都係小學同一間一大堆朋友升上黎，所以我無主動同佢地傾計，佢地亦都有自己既小圈子。我亦都對中學生活，失去原來既期望。 





　　放學自己一個行返屋企，突然之間鈴聲響起。咦，啊君喎。 

我：「喂？」

啊君：「啊傑...我係呢到一個朋友都無啊...好唔開心...」 
我：「我都係啊，返左一日只係識左一個朋友，你呢？」 
啊君：「一個都冇...不如我轉去你學校好冇？」 
我：「下...得唔得架？」 
啊君：「今晚我問下我老豆啦...我好想同你一齊。」 
我：「一齊？？」 




啊君：「我指...讀書啊！！　唉，收線啦唔傾啦！」 

　　就係呢一日，我開始發現我同啊君既關係古古怪怪咁，但又講唔出係啲咩，總知同以前感覺唔同左。 

　　係呢日之後，就係中學一連串既暑期補課班。我對讀書呢樣野冇咩動力同興趣，所以上堂我都係同啊 
威傾計。由於佢大我地正常中一生幾年，所以佢見識比我多。上堂果陣，佢成日會分享大陸發生既事比我聽，例如小學畢業渣電車去拎證書，炸下牛屎等等。 

　　當然，係返暑期補課班呢幾日，我依舊會同啊君用SMS聯絡。啊靜呢排失蹤左之後，我唯一熟既傾訴對象得啊君一個，我地搵大家既次數比以前更加多。 

　　呢幾日放左學之後，我都會行返小學附近既個條河。睇下係個到會唔會撞到啊靜，就算見唔到佢，呢個地方都充滿住好多我同佢既回憶。於是我呢幾日放學就係條河附近坐，睇下啊伯釣魚。悶既時候，我會SMS啊靜 





「最近點呀？」　「中學環境好唔好？」　「好掛住你啊」 

　　雖然我信息一日sd幾個出去，但相信佢都睇唔到。打電話又唔通，SMS，MSN，EMAIL。所有搵到啊靜既方法我都試個，但就咩消息都無。問啊君又話唔知。依家既感覺好無助，佢就好似消失左係我世界咁，永遠唔會再出現。 

　　啊靜...到底你去左邊...？