[真人真事]那些年錯過的愛情: 小學06

打左籃球一段日子之後，學校就搞左一個閃避球比賽，比賽目的係想融合全日制同下午班呢五班人。比賽就定左係下星期進行，即係大家有一個禮拜既時間練習。由於我同啊靜啊君唔同班，我個班又無咩熟人叫我玩，所以呢啲圍威喂活動我唔打算參加。 

　　小息期間，我想搵啊君吹下水，準備落操場搵佢之際，有人擋住左係班房門口叫我。 

「傑傑~~」　一把女仔聲叫著 

　　大家唔好諗到我呢個肥仔咁多女性緣，擁有呢把女仔聲音既係一個男仔，佢叫啊宗。六年級小小年紀已經留住好多鬍鬚，面上有副眼鏡，同我一樣都係肥肥地，但高我好多。由於佢講野那那地，又成日痴埋啲女仔到，所以佢比我地班叫佢做基佬。 

「傑傑~你有無去圖書館睇金庸啊？」基佬宗問 





　　啊宗問既問題永遠都係九唔搭八，所以我地答佢既問題都係九唔搭八咁應佢。我就講返一句大內密探零零發入面李力持講既對白回應佢　：「做咩姐你。」 

基佬宗：「耶，你又做咩姐。我黎問你玩唔玩下個星期果個閃避球比賽啊昨」 
我：「唔玩啊，走開啦。」 
基佬宗：「耶，全級得我地班唔夠人昨，差兩個昨，求下你啦~」 

　　係基佬宗把嗲聲苦苦哀求之下，過左幾分鍾我就答應左佢。由於差兩個人，所以我就叫埋我呢班入面既老死－啊江一齊玩。於是我地就約埋今日放學一齊練習下。 

　　放左學之後，咁岩係學校門口撞到啊君。我同啊君講左我參加左比賽既事，之後啊君就同我講 





「啊靜都有份wo ，唔怪得你又玩啦~」啊君微笑住講 
我：「下，啊靜都有份啊，咁我要努力啲先得。」 

　　聽到啊君既說話，我就決定一陣要努力練習，下星期比個好印象啊靜。同啊君道別左後，過左大約十五分鍾左右，我就黎到約定既地點。但我只係基佬宗同啊江企係到。 

基佬宗：「好啦，人齊啦，開始啦~」 

　　望晒周圍都係得我地三個，正常應該有七至八個人落場。 

啊江：「喂，其他人呢屌你？」





　　望晒周圍都係得我地三個，基佬宗就解釋左點解我地得三個人。原來我地班既人唔想同基佬宗一齊比賽，所以基佬宗就搵左同佢最熟果五個女仔，再搵我同啊江湊腳。咁既陣容睇黎下個星期都係輸到仆街，估唔到又要係啊靜面前柒一次。 

啊江：「我地得三個人有咩做？」 
基佬宗：「唔知啊，是但拎個波傳下啦。」 

　　結果今日我地三個都無練過野，由於啊江係學校足球隊，佢開頭用隻腳踢下個波，玩玩下我地三個就變左踢足球。我同基佬宗就跟住啊江踢。踢到天黑就返屋企。 

　　係呢一日之後，我地三個就無再出黎練，唔係，踢波先岩。下個禮拜既事就聽天由命。 

　　轉眼間，聽日就係閃避球比賽。由於啊靜聽日有份落場，佢太緊張訓唔著，所以今晚我就同啊靜係電話到傾計。 

啊靜：「唉...點算啊。聽日好驚比個波打中。」 
我：「唔洗驚WO，有我係到」我笑住咁講 
啊靜：「打你個班就好啦，你班咁多女仔。比波打中應該無咁痛。」 




我：「講到我個班好易嬴咁，等我嬴你啦。」 
啊靜：「啊傑，我地玩樣野丫。」 
我：「好啊，玩咩先但係？」 
啊靜：「聽日如果你果班嬴左冠軍，我就鍚你一啖。好唔好啊？」佢細細聲咁講 

　　我聽到本來好開心，但諗諗下又好似有啲唔對路。 

我：「想就想...但鍚完咪會有bb囉...」 

　　啊靜聽到之後笑左差唔多一分鍾。唉，其實你地唔好怪我果陣又柒左，我果時只係睇得太多TXB膠劇，比啲膠劇灌輸左一個錯誤既想法。聽到啊靜笑我咁耐，我心入面已經不斷屌緊林峰。唉，今次真係樣衰。啊靜笑完之後就同我解釋左一輪，我先明白佢笑咩。 

啊靜：「夜啦唔傾啦，早啲訓啦傻佬。」 
我：「嗯...好啦，你都訓啦傻婆。」 

　　收線之後，聽到啊靜叫我傻佬之後我成個人醒晒，而且啊靜又話嬴左有得比佢錫一啖。屌，聽完之後今晚仲洗訓咩。於是我個腦就不停回想同啊靜講電話既內容，一直係到諗，點解佢岩岩會咁講野？點解佢會叫我傻佬？我叫完佢傻婆之後佢有咩感覺呢？ 





　　諗下諗下，我就訓著左...