米米蓮妖怪作品 -《再遇見到你》(長篇) (暫停刊): 第六十集 ~ 龜︰三個男人，我就只在乎佢。
第六十集 ~ 龜︰三個男人，我就只在乎佢。
「方家呢度件事留返俾我講丫。」
上集我同鳳初講過呢句，之後佢就讓返呢段情節俾我講。
咁好啦，而家就講吓方家呢邊先啦。
我離開咗七重妖塔之後，同幾位高手講聲再見就返咗去方家…
返到去之後，分別見過「低域」同西施嬸嬸…
講咗幾句我就走返去訓咗嚧。
點知第二朝一早起身，行到去後花園，見到僕人大嬸，佢就同我講︰
「…夫人佢…唔見咗人嚧。」
於是乎我咪試吓周圍搵吓睇吓咁囉…
我發現咗大宅裡面嘅一個拜神偏廳…
我諗住無事得閒拜吓神啦，點知俾我發現咗地板原來係有暗格嘅…
我仲喺嗰度搵到…
「方夫人！？發生咩事啊？」
佢睇嚟好虛弱，仲好似好驚咁…
而見到我嘅佢，流完一殼眼淚就講︰
「低…低域，佢…佢強姦咗我啊，佢…佢黐咗線啊！」
我一時之間完全成個腦都空白，根本唔知點回應佢好…
因為我根本唔知點相信我眼前嘅所見，更加唔知點相信佢所講嘅嘢…
一切都嚟得太突然喇！
我淨係同佢鬆綁，而佢就周圍望，好似好驚咁。
我帶咗佢返上嚟，就喺神像面前同佢講嘢︰
「方夫人，究竟發生咩事啊？」
「低…低域，佢…佢強姦咗我，佢…佢黐咗線…」
基本上，佢又係重覆返頭先嗰句，仲不斷咁重覆咗好多次添。
我見佢咁，都冇辦法唔信佢所講，唯有先帶佢離開呢度，去一個安全嘅地方…
我下意識帶咗方夫人向住我以前住嘅地方行去，仲嚟到一個樹林。
我見應該都差唔多，呢度附近都冇乜人，於是乎我哋停低落嚟，我就同佢講︰
「方夫人，你冷靜D先，呢度安全嫁喇，你講清楚發生咩事先。」
「係…係，低…低域佢強姦咗我，佢黐咗線。」
「咁佢…做乜要強姦你啊？」
我冇辦法都要咁問，唔引導佢，佢根本就只有重覆。
「佢黐咗線。」
「咁佢點解黐咗線啊？」
「佢強姦咗我。」
唉 ~ 睇嚟我要再諗諗點樣問好D先…
「低域佢係咪發生咗D咩事啊？有妖怪上咗佢身？定係你哋之間仲有D咩係我唔知嫁？」
「佢…佢黐咗線。應該你講得啱…佢…佢係有妖怪上身，唔係冇理由連自己親生媽媽都…都強…強姦…」
「咩話！？親生媽媽！？冇…冇理由嫁…佢…低域佢話你唔係佢親生媽媽嚟嫁喎，仲話…你叫蔣盈，係大戶人家嘅女，佢細個嗰陣，你已經成年，但係佢對你一見鍾情…仲話方老爺佢唔係真心鍾意你…佢話…只要日日偷睇到你都已經好開心嫁喎。」
我諗到呢度，身體都突然打咗個冷震，種感覺好陰寒咁…
所有事情而家就好似話俾我聽，「低域」一直講大話呃我，佢好恐怖啊。
而喺我面前嘅方夫人而家就呆咗…
好似唔知係唔信我所講，定唔敢信我所講嘅咁。
我對佢及咗吓頭，表示一齊都係我真確聽過「低域」講。
「係…係妖怪！」佢將一切都訴諸妖魔鬼怪嘅。
而我反而係覺得…
「低域」佢係真黐線，神經病，根本佢自己就係一隻惡魔。
(嚓 ~ 嚓 ~)
「邊個？」我聽到我哋背後有人踩到地上面枯葉嘅聲，所以立即轉身。
「唔使緊張，係我。我係清明大師大徒弟，我叫自慧。」
「自…自慧大師？你唔係清明大師咩？」方夫人問。
「係你哋一直話我係喳嘛，加上上一次面對住變臉大師易面容，我冇辦法唔扮住師父先。」自慧大師回應。
「唔係出家人唔講大話嫁咩？」我問。
「講呢句嘅本來就講緊大話啦。唔講大話嘅人，根本就唔使同你講佢係唔講大話嘅。如果講大話唔係傷害人嘅話，又怕咩講啫？哈哈哈。」
「咁你跟住我哋係想點啊？」我再問。
「我唔係淨係跟住你哋，而係我一直都有留意方家嘅人。」
「留意我哋？」方夫人問。
「冇錯，正確D嚟講應該話我學緊感應氣牆，所以先留意你哋。」
「感應氣牆！？」我好疑惑。
因為以我所知，我自從有咗鳳初嘅靈力之後…
感應人類同妖魔鬼怪嘅氣牆，都好似係好自然嘅事，乜要練習嫁咩？
「你個樣好似話俾我聽我呃你咁，哈哈哈，咁嘅，我感應到你氣牆，你係火屬性派別嘅道人呱，啱嗎？」大師講。
我及咗吓頭回應。
之後佢再講︰
「你咁嘅樣，即係你應該唔知感應力係要練習，或者你係冇錯嘅，妖魔鬼怪精屍人靈等等，當中妖有妖氣，人﹑鬼﹑精﹑靈有靈氣，屍勉強亦都有屍氣可以感應，但係魔同怪嘅氣牆係好唔同嫁，我要練習嘅就係感應佢哋。」
「咁…關我夫家咩事啊？」方夫人問。
「因為我喺練習途中，感應到你哋屋企嘅魔氣係附近區域之中最強最惡嘅，所以我曾經嘗試過接近你哋，不過之後因為變臉大師易面容同佢嘅妖法出現，攪到我仲以為係我自己練習未成熟，感應錯咗，令我離開咗你哋一段短時間，以致造成而家咁嘅慘況，雖然冇死人，但係始終係出現咗D令人唔開心嘅事丫。」
「你點知嫁？」我問。
「你睇吓方夫人而家個身咁樣，再睇過你咁樣帶佢嚟呢度，我即使唔知全部，都最少估到一二啦。」
我顯得尷尬。
而自慧大師就再向住我講︰
「方家出咗隻惡魔啊！魔，本來就係由人嘅邪氣衍生出嚟，方家有人已經邪氣蓋過人性喇，要打贏魔道，體力比靈力更加重要，不如我同你合作，一齊收拾佢啦！」
大師嘅意思就係收拾「低域」，而我就係想救返「低域」，所以我及頭回應佢。
之後，我哋三個人一齊返去方家大宅…
…
不過估唔到…
我哋一返到去就喺亭園度，就見到…
僕人大嬸死咗喺地下，仲滿頸鮮血，似係被野獸咬死嘅咁…
而當我哋想進一步入去大宅嗰陣…
「你哋返嚟喇？哈哈哈。」一個滿身血漿，滿口鮮血嘅「低域」行咗出嚟。
方夫人驚到縮咗喺我哋後面，而自慧大師立即衝上前一掌打埋去…
(爬 ~) 「低域」回敬咗一爪，大師就退返埋我哋度。
「呢次大鑊，方少爺魔氣好強，年青人，精力又旺盛，我怕我體力應付唔嚟。」
連大師都咁講，咁點算好呢？
「大師！要唔要我幫手？」我問。
「好！但係要小心D，唔好當佢係人喇，佢而家利牙就好似一隻豺狼一樣，雙爪就好似黑熊咁，俾佢爪中一吓或者咬中一啖就大鑊喇！」
「係！」
雖然話想幫手啫，但係面對而家咁款嘅「低域」，我真係唔真點出手好…
因為佢而家成隻人狼咁款。
「唔使顧慮太多！打得暈佢就打，就算有可能唔小心打死佢都要打，因為佢係唔會同你留情嫁！」大師係咁大嗌。
但係…
「你哋點解要咁對我啊？」低域突然變返好冷靜咁，變返佢正正常常嘅樣。
「龜匙，我同你講過嫁，你唔記得喇咩？我係鍾意方夫人嘅，你都知嫁，我承認，我係做咗錯事，一時之間性急咗，強姦咗佢…」
「廢話！死癲佬！唔小心強姦婦女！？唔小心用口咬死人？你呃鬼食豆腐啊！」
大師好嬲咁鬧佢，而我亦唔係細路哥，點會俾佢氹到，我只係覺得…
佢好恐怖，因為好明顯…
就連佢自己講出嚟都知道，根本冇人會相信呢堆廢話，我感覺到…
佢之所以咁講，係喺度取笑緊我，取笑我當初信任佢…
竟然相信佢講嘅故仔，相信佢係真心愛方夫人。
「哈哈哈！我知丫！信我都係白痴！」
佢一大嗌完就一吓衝埋我度…
而自慧大師亦都立即跟上，保護好我…
「魔道！睇我點打殘你啦！」
(爬 ~ 爬 ~)
「低域」打起上嚟並冇任何招數，但係每吓都勁力十足…
睇得出自慧大師佢唔頂得太多吓…
「蝦！」我見佢咁，唯有立即跟上幫手。
我哋三個打到有D混亂，我主要保護方夫人，而大師主要保護我…
「乜你哋兩個得幾多料咋？」
「伏魔金剛掌！」大師使出絕招。
「癲佬黑熊爪！」低域只係猛力一爪，個名就係我作嘅。
「降妖劈掛！」
「癲佬豺狼咬！」
而我又使出我嘅「美女四式」。
點知「低域」嘅體力太大喇，耐力又強，即使大師有打中佢幾吓…
但係佢個強壯嘅身體都可以抵擋得住，反而…
大師根本招架唔嚟佢嘅猛力攻擊…
佢左一吓「癲佬豺狼咬」，右一吓「癲佬黑熊爪」，而我哋更加估唔到嘅係…
佢竟然識得…
一招超越一般癲佬，近乎係妖術嘅絕招…
「狼牙癲奴！」
佢製造咗一個替身，由得自慧大師打中…
之後自己就從後以一招「狼牙」攻擊大師背脊…
(爬 ~) 而且佢真係擊中咗大師嘅要害，大師倒地…
而我就…
冇咗大師幫手，就只好俾佢一手抓住咗喉嚨…
不過佢冇直接傷害我，反而…
「有人嚟咗！」佢咁講。
話口未完…
(嘭 ~) 大門就俾人打開咗…
係西施嬸嬸同埋…
鳳初！？
「方夫人，方少爺咩事啊？做咩捉住我哋瑞基啊？」大嬸好驚咁問。
「…我都想知發生咩事啊？」方夫人回應。
而鳳初就乜都冇理，見到「低域」望咗去方夫人嗰邊，立即就…
「瑞基！」鳳初佢一聲大嗌就想衝嚟救我，但係…
我諗全場人都估唔到…
包括鳳初，包括癲咗嘅「低域」，仲包括埋我自己…
因為…
(嚓嚓 ~ 嚓嚓嚓 ~)
一連五吓刀影，將一個喺我身邊完整嘅「低域」…
迅間斬成五份，「低域」死去。
而呢個出手俾起鳳初更快嘅人係…
歐陽巨！？
佢冇出一句聲，只係擺咗個懶有型嘅甫士…
背住我哋側側地頭另過嚟望咗我一望…
之後就好似一陣風咁向另一個方向離開咗…
「吓！？條紫色光頭佬攪乜春啊？」西施嬸嬸先出聲。
「而家大家都安全就好喇。」自慧大師坐咗地度講。
「但係…但係…」方夫人雖然俾低域蝦過，但係佢依然有為「低域」傷心…
而我雖然唔知歐陽巨攪乜，不過總算有D想多謝佢…
當我見到死喺地上嘅「低域」，亦有D黯然神傷，佢始終係我第一個喜歡嘅人…
「無事就好喇。」鳳初講完，仲好似想另轉身就走。
雖然而家百感交集，但係我曾經講過，只要有機會，我係唔會再放棄鳳初…
所以…
「咪走住！」
「吓！？」鳳初另返轉頭望住我。
我抖咗一啖大氣，再講︰
「七彩武林大會，你知唔知係咩啊？」我問。
佢及頭回應我「知道」。
「你會唔會去啊？」我再問。
佢笑住咁及頭回應我「會」。
「你知唔知道規矩啊？」我再問。
佢再笑咗一吓，及頭表示「知道」。
「我，龜匙，陸瑞基，要同你，陳鳳初打賭，只要我喺當日打敗你，你呢一世都只可以愛慕我，保護我，直到永遠。」
佢笑咗一吓，及咗吓頭，再同我講︰
「如果你打真係敗咗我，咁仲使乜我保護你啊，不過點都好，我接受你嘅挑戰。」
(待續)
下集預告︰
當年四劍平天下最後生嘅一個劍客，當時佢好似得十幾歲，各門各派得知有佢呢個少年奇才…