米米蓮妖怪作品 -《再遇見到你》(長篇) (暫停刊): 第五十八集 ~ 雞︰子水樓樓主劉紫千啊！
第五十八集 ~ 雞︰子水樓樓主劉紫千啊！
攪咩啊？好好地一個妖怪故…
(比較似武俠故多D噃…)
而家仲要攪到有個黐線變態佬出現添…
(呢個又真係…)
不倫不類咁，我當佢意思係想講話D人恐怖起上嚟…
真係仲恐怖過鬼怪就算喇，都係講返自己嘢先。
上次講到靈兒佢下山買嘢嗰陣順便打探咗D有關「七彩」嘅消息返嚟…
估唔到各門各派都真係好認真咁對待呢次武林大會，唔通…
七重妖塔上面有D咩嘢好勁嘅寶物？定係…
有更可怕嘅陰謀呢？不過點都好啦…
為咗師姐，甚至叫做為咗人類世界嘅和平，呢一次嘅比武…
只許勝，不許敗。
就同十九哥上一次講嘅一樣，比起其他各門各派…
我哋呢一班人應該係仲黐線，仲勁嘅…
所以我對呢次比武都充滿信心，但係有樣嘢我仲係擔心嘅…
就係我哋必須要嘅第一步，子水樓樓主劉紫千應承俾我哋參加武林大會。
不過既然我冇辦法確認住，不如就先喺呢段時間努力練好自己啦。
討論完之後嘅十幾日裡面…
我已經將《伏魔劍十九式》練習到總算係爐火純青，最少喺劍招上面係…
但係由於我嘅內勁同靈力都始終有限，所以暫時冇辦法再去到另一個境界…
我仲諗過吓將我識嘅《鳳凰七重天》裡面嘅劍式昇華…
將我識嘅「黃焰」，嘗試練到去「紫焰」嘅境界…
可惜力不從心，練唔到上去。
我見既然係咁，再死練落去都暫時唔會有咩進步…
所以就同鳳光大哥，忠義二哥…
佢哋一齊去咗市雜，當係緩和一吓情緒又好，減低一吓壓力都好…
所以我連師姐都暫時放咗喺醫神嗰度，淨係同大哥二哥出發。
我哋喬裝打扮，嘗試去D較多人嘅地方去打探吓「七彩」嘅消息…
點知打探咗冇耐啫，大哥就突然話要請我哋食豆腐花，雖然二哥俾住錢先。
我同二哥恭敬不如從命，坐低咗，諗住簡簡單單食碗豆腐花啦，點知…
大哥(火羅)咗單嘢就唔再講啦，佢自己都有講過，之後佢仲話︰
「忠義﹑雞仔，你哋打探完消息自己返去先，我想去見吓我一位老朋友。」
「好。」二哥答。
而我就俾佢引起我嘅多愁緒…
「大哥，其實我想問…你仲有冇繼續鍾意師姐啊？」
其實我都唔知點解自己咁問，不過估唔到我聽返嚟個回覆又幾好，幾啱聽噃。
「…我想掛住都冇用，你唔同，佢仲在生，你要掛多陣啊，哈哈。」
我而就回應佢…
「得喇…，呢次比武，我一定會全力應付。」
結果，我同二哥離開咗豆腐舖，而大哥就去咗搵佢朋友。
我哋再打探咗一陣，而且…
發現咗一D有關清林寺嘅消息…
「大師兄成日扮師父落山，都唔知佢想點？」
「而家出面D人都以為大師兄佢真係清明大師。」
「師父一定覺得冇所謂啦，佢老人家都唔鍾意虛名。」
「不過講真大師兄個樣，又真係好似師父。」
我同二哥見到一班和尚喺度討論，咪行近D偷聽囉…
點知又偷聽變咗明問，二哥佢問︰
「請問幾位大師，清明大師本人會唔會出席七彩武林大會呢？」
估唔到二哥咁斬釘截鐵，直接就咁問。
「你…施主你知道有七彩武林大會呢件事？」
「冇錯，實不相暪，我哋兩個係…」
我怕二哥會講真話，所以立即插口︰
「我哋兩個係黃符道觀嘅弟子。」
「黃符道觀」係出名混水摸魚嘅門派。
「哦，你哋好。」
「我哋只係想去七彩武林大會見識吓。」我再講。
班和尚交頭接耳咁樣，而二哥就再問︰
「唔知到時有冇機會見到清明大師本人呢？」
「我諗都唔係咩秘密啦，就講你哋知啦。係啊，師父會出席，你哋到時可以見識吓佢老人家嘅厲害。」
「咁清林寺會唔會傾巢而出啊？」我問。
「傾巢而出？唔會呱，最多咪淨係得伏魔閣。」
「伏魔閣！？」我疑問。
「咦，我諗三弟你似乎有所不知，清林寺雖然唔係好大型嘅寺廟，但係裡面都最少有幾個分部，而負責捉邪斬妖嘅就係伏魔閣，清明大師係伏魔閣嘅負責人。佢出名係因為佢曾經憑佢個人之力，收服咗海中惡妖，美人魚之王。」
「原來係咁啊。」我回應二哥。
「估唔到黃符道觀嘅人都會咁有見識。」班和尚講。
之後我哋同班和尚講聲多謝就走咗，返去醫神嗰度。
…
「喂，你哋返嚟喇？咦，你哋大哥呢？」靈兒見到我哋就問。
「去咗搵朋友。」
「咁唔好等佢喇，我留個字條啦，我哋要先出發。」醫神講。
「溜夜出發？點解啊？」我問。
「去劉紫千嗰度，中途有個必經嘅地方，嗰度有好多其他門派嘅人打探消息，而且，我哋而家出發，聽日朝早就會到，但係如果聽朝出發，去到太夜喇，劉紫千都會訓咗，信我啦，出發！」
醫神佢諗得又好似幾周到，但係點解唔早D同我哋講呢？D高人真係…
總係好似自己知就當人哋都知咁嘅。
雖然我個心未定，但係個身就已經跟隨大家…
醫神﹑靈兒﹑二哥﹑十九哥﹑師姐…
一齊出發…
我哋溜夜走咗一段幾長時間嘅路…
行到醫神之前提過話多六派爪牙嘅地方嗰陣，個天已經開始光…
「再行幾多一兩個鐘就到嫁喇，呵呵呵。」醫神講。
結果我哋再跟住行，行咗大概一個鐘之後，我仲見到…
「呢座就係子水樓喇？」
「冇錯。」
「的確係好有氣派，好宏偉壯觀噃。」
「你哋睇吓附近景色，配合喺上嚟，簡直係城樓版嘅竹林深處人家啊，呵呵呵。」
醫神嚟到之後，就好似佢自己屋企一樣，大無私樣咁直接帶我哋入子水樓…
呢度接駁去子水樓嘅有一條廣闊嘅康莊大道，大道兩旁仲有唔少人喺度做緊嘢。
「醫神呀，大路兩邊D人件衫…」
「係啊，佢哋都係子水樓嘅門生，而家應該係幫自己地方裝修緊。」
「用門生嚟幫自己地方裝修？又幾識慳噃。」
「或者係修練嘅一種啫，呵呵呵。」
有D「門生」仲好似認識醫神咁，幫埋手開路同引路…
所以我哋好快就行到入子水樓大堂，仲見到…
一個著埋同「門生」一樣衫褲，高大得嚟，頂住個大肚腩，戴住圓型眼鏡嘅男人。
「呵呵呵，好耐冇見噃，劉生！」
「哈哈哈，有幾耐丫，老鬼瞬，帶埋咁多朋友添啊，入嚟啦。」
從對話就知，呢個人就係子水樓樓主劉紫千，之後佢帶住我哋一齊行去地牢…
「我收到你封信，你信裡面嘅嘢我都明白，你哋就跟我去，代表我子水樓出戰啦！」
我所擔心嘅嘢終於解決咗。
「嚟得我呢度，老鬼瞬帶得你哋嚟，係要俾D見面禮大家嘅，俾D好嘢你哋睇啦，就係呢度。」
落咗地牢之後，我哋一直跟住佢行，終於嚟咁呢度…
劉紫千打開一道大門，大門一打開，見到裡面…
佈滿各式各樣，林林總總嘅兵器，好壯觀嫁。
「呢個位，如果你哋鍾意就隨便攞一件啦。」劉紫千咁講。
之後大家都有去參觀同欣賞兵器，而且二哥都唔客氣喇…
攞咗一把銀劍，睇嚟幾啱配合二哥嘅《伏魔劍十九式》。
「喂，仲有冇好嘢俾我D朋友睇吓？」醫神問。
「有，呢把。」
「槍嚟嫁喎。」
「係啊，科技發達，邊有人仲用刀刀劍劍嫁。」
佢咁講，攪到啱啱攞起銀劍嘅二哥都覺得尷尬。
「藏槍冇犯法咩？」
「藏咁多刀刀劍劍都俾人查啦，何況我呢把係專射妖怪嘅槍。」
「咁對付人力嘅時候點啊？」
「哈哈哈。」
佢哋笑聲話俾我哋聽，根本佢把槍就真係一把正常嘅警察用嘅槍。
「唔好睇呢度喇，我哋再入D，帶你哋去睇我寶中之寶啦！」
之後劉紫千仲好小心咁先閂返大門，再帶我哋入嚟一個房…
而呢個房裡面空間好大，天花直上雲宵，旁邊只有發光嘅碎石堆，而中間…
喺發光碎石堆中，藏住咗一把…
似乎係好大把嘅鈍劍。
「請問呢把係咩劍？」我驚奇到唔問唔問得咁。
「四劍平天下，四神劍之一，亦係雙古神劍之一，忐忑劍早就不知去向，而剩返喺人世間，喺我哋面前嘅，就係呢把 — 躊躇劍！」
(待續)
下集預告︰
即使我用全力同佢打，再打落去，我亦都只有輸…