米米蓮妖怪作品 -《再遇見到你》(長篇) (暫停刊): 第四十九集 ~ 雞︰甩！？走得甩就好喇！仲…估唔到咁樣見返…
第四十九集 ~ 雞︰甩！？走得甩就好喇！仲…估唔到咁樣見返…
如果我都有得放隻火鳳凰出嚟幫拖就好喇！
(要斬手嫁！)
唔係斬頭就得啦，慘得過而家喺我同二哥﹑靈兒面前…
係西魔同朱謀秉咩？
我哋而家喺朱謀秉大屋亭園裡面，佢個衰人仲捉咗幫我哋睇水嘅靈兒…
好在，喺玉麟金劍協助底下，總算可以喺佢個衰人手上救返靈兒。
不過一波未平一波又起，西魔，其實即係邪惡嘅余二十…
佢一出現就使出九曲追魂劍，仲將玉麟金劍打走咗。
正當我哋都唔知點算好嗰陣，又唔知做乜鬼嘢…
嚟多咗條友，又係一個一模一樣樣嘅生物…
佢仲自稱係正義嘅余二十。
佢手上有一把同西魔一樣嘅九曲追魂劍。
究竟攪邊科啊？試吓聽佢點講先…
「我未必再有時間搵到同我一齊嚟呢度嘅陳鳳初…」
咩話？陳鳳初！？我咪就係囉！
都係聽埋佢點講先…
「幾何黑洞本來唔應該係咁，只係一招吸人入異空間，由異空間蠶食佢力量嘅招式…」
佢講嘢就好似自己知就得嘅咁，係咪應該解釋吓咩係「幾何黑洞」啊？
好在，我之後查到，原來之前有個故事講過呢招…
呢招係一招釋放出一個黑洞，將所有生物死物都吸晒入去嘅招式。
繼續聽佢講埋先…
「但係唔知點解，好似俾人惡意入侵咁，黑洞本來嘅特性唔同咗，變成好似而家咁。將我同陳鳳初吸咗嚟呢個時空，陳鳳初變成點我唔知，好想搵到佢，但係我自己就除咗嚟咗呢度之外，仲被分成正邪兩個身體，我係本來大壞蛋西斜余二十身體裡面絕無僅有嘅正氣所製造出嚟嘅，而而家喺我哋而前嘅呢個就係邪氣所製造嘅。」
竟然係咁！？
「本來嘅九曲追魂劍咁多年嚟，跟住一個衰人，都已經變成魔劍，所以而家都跟住邪體呢個。我要同佢對衡，就最少要攞返差唔多嘅武器，所以我走咗去問花米蘭莊主借咗呢度呢個時空嘅九曲追魂劍，為嘅，就係除三害，除去自己呢個邪體。」
周處除三害，改過自新！？
「我知道原本嘅余二十邪氣比正氣強，即係佢會比我勁，所以都冇抱有愚蠢僥倖嘅心，但係…正氣嘅人就係咁，見到佢要出嚟害人，就唔到我唔出手，所以…我只係希望你哋記住我嘅呢番說話，如果見到陳鳳初，記得幫我講返呢件事佢知，我相信，可以贏到呢個大壞蛋嘅人，就只有佢。」
「講夠未啊？」呢句嘢唔係我問，係西魔問。
而且我留意到二哥佢都好用心咁留意住個情況，我諗佢都有盤算緊好多嘢。
「未！你哋三個，記住我所講嘅嘢啦，記得幫我搵陳鳳初啊！」
正義余二十一嗌完就…
「人頭神功！」衝咗前去。
我都唔想攪爛GAG啊！不過佢真係咁叫…
佢將「鬼頭魔功」變成「人頭神功」，以為咁樣正氣D，但係我想講…
咁樣嘅名，顯得仲恐怖啊！
算喇！再睇吓佢點攪先…
「鬼頭魔功！索命掌！」西魔都嚟個反擊。
「正氣朋友」，咁樣叫住正義余二十佢先啦，唔係唔知點分三個余二十…
佢一個凌空轉身避開咗「索命掌」，而且立即就一個反攻…
「追魂標劍！」佢一個箭步壓前，將劍尖隊向西魔度…
西魔當然不甘示弱，立即就「九曲連環，追魂索命劍！」
佢冇選擇避開，反而以攻為守，比起「正氣朋友」攻擊嚟得更厲害。
「正氣朋友」冇辦法底下，唯有使出一招「人頭遁地」…
又係將「鬼頭」變成「人頭」嘅招式，佢遁地閃避咗「索命劍」嘅攻擊…
仲一時之間冇再返上嚟，大家都喺度望來望去搵佢…
點知佢…
突然喺地下面大嗌…
「人頭博芋頭！咳咳咳…」
呢個應該唔係招式，佢意思係博吓咁解，不過佢似乎食咗泥…
不過唔好理喇，總知佢喺地下面衝返上嚟，仲使出似乎係終極必殺技嘅招式…
「肉人頭真義﹒毀滅！」佢彈到好高，仲想飛返落嚟，兜頭拮死西魔。
不過成事又點會咁如人意丫，西魔直接就一招向上反擊…
「血鬼頭真義﹒毀滅！」
就好似擺明想用同樣嘅招式打敗對手一樣。
結果…
倒地嘅…
不負眾望…
係「正氣朋友」。
「點解…點解咁奇怪嘅？」二哥突然出口問。
「有咩奇怪啊？」我反問。
「乜乜乜真義呢招…好似…我唔識嫁喎，唔通我之後自己領悟嘅？」
「係天地人三魔裡面嗰隻地魔賜俾我哋嘅力量，乜乜乜真義係佢嘅力量…」
趺咗喺地嘅「正氣朋友」，似乎未死得，佢回應二哥。
「即係…究竟發生咩事啊？」二哥再問。
「壞事要做得夠盡，當然唔可以咁早死啦，所以我請求咗地魔大人賜我力量，要嘅，就係長生不死，不過估唔到係唔知點解嚟咗呢個時空啫，不過算喇。總知而家，真義系嘅招數，加上原本血鬼頭嘅功夫，你呢個呢個時代嘅余二十，即使加上呢個訓喺地度嘅余二十，都係冇辦法贏到我嫁喇，哈哈哈。」西魔講。
「你哋快D走啦，快D去搵陳鳳初，唔係就冇得走嫁喇。」正氣朋友大嗌。
「哼，陳鳳初咪就喺你面前囉，哈哈，睇吓佢又點樣對付到我哋。」朱謀秉咁講。
原來佢一早就認得我喇。
「懶醒，我夠知啦！崑崙石獅！」
正氣朋友召喚咗隻石頭獅子妖怪出嚟。
原來「正氣朋友」都知我係陳鳳初，咁究竟邊個係佢時空嘅陳鳳初啊？
「三弟，唔使諗喇，肯定係大哥，陳鳳光就係陳鳳初！」二哥講。
「咩話？大哥就係未來嘅我！？」
「冇錯，所以而家我哋事不宜遲，要快D返去搵大哥！」二哥再講。
「想走呀？你哋唔係想搵我個囡咩？」朱謀秉突然咁講。
我兩隻眼當堂變到紅晒，因為我聽到呢句之後…
心情變得好複雜，夾雜係憤怒同心急之間…
我明知度佢只係想引吓我…
但係我仍然好心急想知道師姐佢去咗邊…
「不過我係唔會講俾你知嫁，哈哈哈，你搵到佢就你叻囉，哈哈哈。」
你條仆街！我真係想殺咗佢。
不過而家「正氣朋友」殘咗，我哋兩兄弟又只係啱啱好返…
仲要面對一個高手，一個高高手…
根本除咗死，就冇辦法離開呢個地方…
好似就只能望天打救一樣…
不過點都好啦，最少要博一博丫
「玉麟金劍！直刺式！」
「刁虫小技！金身布衣，護駕！梅花屍毒，銀針刺！」
佢個衰人用件衫將我呢劍撥開，再用右手銀針諗住拮我…
好在…
「橫削式！」二哥用呢招掟咗舊泥過嚟幫我阻咗佢一吓…
「正氣朋友」嘅石獅子亦同時撲過嚟幫手…
總算救咗我。
而西魔佢就冇理朱謀秉…
直接就走向「正義朋友」，仲想一劍拮死佢…
點知…
喺呢個時候…
「細佬！」
鐵閘外面有人大嗌，仲…
(嘭 ~！) 一個鐵閘飛咗埋嚟。
所有人都一時間再冇任何動作，只係望住大嗌嘅方向…
原來…
「阿哥！？」三個余二十同時大嗌。
係十九哥啊！佢仲…
單手拿起一另一邊鐵閘，一個箭步就衝咗前嚟，仲想
打落西魔度，不過當佢行近西魔嗰陣，見到佢個樣之後…
十九哥佢呆咗，估計係西魔個樣又係余二十，佢以為係自己細佬。
而朱謀秉個衰人就想襯呢個機會…
去攻擊十九哥，點知…
「死開！」嗌得最大聲嘅竟然係西魔。
西魔阻止咗朱謀秉…
「阿哥，不如我哋走先喇！」
而二哥就襯呢個時候叫大家走。
我同二哥﹑靈兒，十九哥一齊逃離現場…
但係留低咗「正義朋友」，不過佢咁講︰
「唔使理我喇，記得幫我搵陳鳳初啊！」
西魔佢自己唔出手阻止不突止，仲阻礙朱謀秉追我哋…
朱謀秉亦只好捉住「正義朋友」就算，呢個真係出奇…
不過更出奇嘅係…
我哋本來只係好正常咁逃離現場…
亦總算最後成功走到好遠，而且兩個壞人都冇追到上嚟…
不過…
竟然大屋裡面隻狗跟住咗我哋…
佢唔係追我哋嚟咬，佢只係好乖咁跟住我哋…
我見佢好似幾可愛，所以…
「汪汪，你走啦，我知道你主人好衰，但係跟住我哋好唔方便嫁。」
佢坐到定一定咁，唔單止我，就連大家都唔捨得趕走佢…
於是乎，二哥佢走咗埋去想抱起佢，點知…
隻狗推開二哥隻手，隻狗就只係…
好似好用心咁望住我，就好似想我抱佢一樣…
我覺得好奇怪，所以…
我慢慢慢慢行前去，再用心D望佢…
我發覺我身體就好似…
唔知點解，好似有度暖流喺腳尾開始，流咗去背脊一樣…
我再望一望二哥個樣…
佢顯得好凝重，就好似知道咗一D嘢，要我去做嘅咁…
而我就繼續一步一步行埋去隻狗狗度…
嚟到呢度，暖流亦已經流到去我頭頂…
而隻狗狗就繼續望住我，就好似想喊咁…
但係…
我…我…
喺呢一刻，感覺到暖流流返落嚟，逼使我流出眼淚…
而我…
選擇咗好用力咁去抱住佢…
因為…
「師姐~~~！」
(待續)
下集預告︰
你黐線還黐線丫，唔好虐待隻手丫，我保護得佢好辛苦嫁！