米米蓮妖怪作品 -《再遇見到你》(長篇) (暫停刊): 第三十四集 ~ 鳳︰苦盡甘來不容易，七重妖塔更艱難。
第三十四集 ~ 鳳︰苦盡甘來不容易，七重妖塔更艱難。
嘩，乜原來我之前咁慘架？點解我冇記憶嘅？
好在而家後生嘅我，即係雞仔佢，佢俾神醫醫緊，我先放心返D…
而我就俾臣婆佢老點咗嚟呢度…
七重妖塔。
…
嚟到呢度，個感覺好奇怪…
呢度異常清靜，唔好話人丫，就連鬼影都冇隻…
所以我好小心翼翼咁慢慢行到去入口，但係…
突然…
「你做乜嘢？想入去啊？有冇錢先？」
我身邊出現咗兩隻比我仲要高兩三個頭嘅魁梧怪物…
佢哋問完呢句，我好自然咁摸摸個袋，發現空空如也…
佢哋亦似乎係睇到我呢個動作，所以…
「冇錢冇計傾噃。不過…你乜水啊？竟然可以將咁強嘅靈力壓制到只有半米範圍我哋先感覺到？」
我聽到佢哋咁講，我梗係以為佢哋係怕咗我嘅力量，唔敢同我打啦，所以…
「行不改名，坐不改姓，陳鳳初，火鳳派傳人是也！」我認吓叻囉。
「我識你老鼠，冇錢邊個都係假，冇錢咪使旨意入去，我同你博埋條老命都得啊！」豬頭人身嗰隻妖怪守衛講。
「你識唔識我哋係邊個啊？」狗頭人身嗰隻妖怪守衛講。
我見佢哋一隻係豬，一隻係狗，所以…
「莫非你哋就係名震江湖嘅豬朋狗友！？」
「果然厲害，咁都俾你知道…」狗友講。
「不過知道都冇用，我哋唔會俾你入去嘅，除非你有錢…」豬朋講
講起錢，我突然諗起我鞋底有D留返嚟急用嘅錢…
我除咗對鞋，攞出D錢，淨係得返幾蚊…
「唔知幾蚊夠唔夠呢？」我問佢哋。
「你D臭錢我哋唔要啊！」狗友講。
「咁…係咪我整返香佢哋就夠喇？」我問。
「你傻架？我哋意思係你唔夠錢啊！」豬朋講。
我要入呢個妖塔，而呢個妖塔有成七層咁多，我一定留力打後面D妖怪…
所以我唔想一開始就浪費太多力量去同呢兩隻妖怪打，我唯有…
諗辦法解決門口呢兩條乞衣啦，正乞衣。
我心諗，既然錢唔夠，或者可以試吓買D物質返嚟氹走佢哋噃，所以…
我行咗去最近嘅一個市雜。
………
我嚟到市雜，仲即刻諗到解決狗友嘅辦法…
就係佢…
一條骨頭，我睇死佢隻衰狗，一定追住條骨去走…
好嘢！攪掂一個，但係…
豬又鍾意D咩嫁呢？
豬漱！？污糟！？豬乸！？
好似都唔啱咁，唉 ~
我真係諗極都諗唔到，唯有…
返去七重妖塔，硬住頭皮，用武力解決隻死豬啦！
………
「喂，你睇吓呢D咩嚟嘅？」
我揸住舊骨頭，喺狗友面前搖來搖去引誘佢…
佢好似冇乜反應，所以我繼續搖…
但係佢都係冇反應，所以我都冇理太多喇…
直接就轉身一吓掟舊骨頭去到冇雷公咁遠…
狗友佢依然係冇反應，不過奇怪嘅事情發生喇…
豬朋竟然衝咗去追舊骨頭，我望住佢走去，真係呆咗…
呢個時候…
「哈哈哈，笑死我喇！」狗友竟然傻笑。
我咪另返轉頭睇吓佢咩事囉。
「喂，喂，唔該晒你噃，真係笑死我喇，條死肥豬，成日話我係狗，而家佢仲似狗多過我，佢真係豬狗不如啊！哈哈，好，見你幫我手串吓佢，就俾你入去啦！」狗友講。
「吓！？」我真係無奈到極點，但係入到去就好喇。
我冇理咁多，入咗去先。
(嘰~ 嘭~！)
我一入到去，門口就自然閂埋咗…
一層清水浸過咗我腳面，天上藍天白雲，但明顯只係一層由靈氣凝成嘅天幕…
奇怪嘅係，一層灰暗嘅妖氣突然向我迎面撲過嚟…
而家，清水變成黑潭，天空變成灰暗，一片寧靜死寂嘅感覺…
「唔好意思，打攪晒，我只係路過嫁咋，如有得罪，請見諒。」我向住空曠講。
我以為會好理所當然咁冇人回應啦，點知…
「你都算唔好彩喇，咁啱我哋層主爆完石，好返晒，哈哈哈！」一把有回音嘅女聲，聽落有D刺耳。
聽到佢講呢句嘢，我好自然咁望向發聲嘅方向，而佢亦…
慢慢喺水面升上嚟…
原來係一隻長髮女水鬼。
「哼，邊個唔好彩都未知，你最好唔好激嬲我。」我用好重語氣同佢講。
「嘻嘻，我感覺唔到你嘅靈氣，我怕淨係我都夠將你食咗入肚，哈哈哈~」
小鬼果然係小鬼，係我壓制住我嘅靈氣喺半米範圍內咋，唔係我驚強大到嚇死佢。
「你把死人聲真係有D乞人憎，總係要又尖又刺耳，好煩啊！如果你再俾我聽到你講一句廢話，我就立即殺咗你！」我再講。
「哎吔，我好驚啊，你睇吓環境先同我講啦，哈哈哈。」女水鬼講。
而家四周圍都有唔同嘅水鬼喺水面度爬上嚟，一隻又一隻咁…
場面俾著係一般人，可能早就嚇死咗喇…
即使唔係鬼，係人，我諗一般人都會驚到打晒冷震…
不過…
我係邊個啊？陳鳳初啊！
「哼，小鬼即係小鬼，我就俾你哋見識吓啦，蝦！」
我大嗌一聲，將身體靈力爆出去俾佢哋感受吓…
「哇丫！」D小鬼喺度尖叫。
「Eee…eee…」隻女水鬼當堂淆晒底咁。
「靈力係好強大，不過係屬火嘅靈力，我呢度係水域，只怕你力有不逮噃！」
(唦唦 ~ 唦唦 ~)
一隻巨型生物由水面升上嚟，佢最少有七層樓高，頭先句嘢係佢講嘅…
佢係一條巨型鰻魚，水從佢身上慢慢向下流返入湖面…
「蛇屍鰻大人，有人送羊入虎口啊！」女水鬼同條巨鰻講。
呢條巨鰻個死款好恐怖，滿佈青苔不突止，仲有無數咁多嘅骷髏面喺條身上面…
而家，我身邊D水鬼都走開晒埋一邊，似乎係想我直接同條巨鰻打…
(匙匙 ~ 匙匙 ~)
我望一望水面，發現而家水裡面多咗好多嘢…
係水蛇啊！
灰暗嘅湖水之中，佈滿黑色嘅水蛇，睇嚟唔容易對付…
點算好呢？我唯有用呢招啦！
「海上女神，天上聖母，急急如律令，請媽祖顯靈，上徒兒我身，收服呢隻惡妖！」
(…) 但係媽祖冇回應。
「哈哈哈，想借助神力？呢度係七重妖塔啊！神明雖然一樣可以入嚟，但係你嘅召喚聲音就出唔到去，所以神明根本冇辦法聽到你召喚佢哋，哈哈哈，睇嚟今晚我哋有人肉食喇！」
「你黐線架？咁多肉你唔食係要食人肉嘅？」我鬧佢。
「你食過人肉未啊？真係好好食嫁！」
「你食過屎未啊？真係好好食嫁，你唔走去食屎！」我回應佢。
「我食過，都係人肉好食D。」
我除咗無奈，就係要諗吓有咩辦法打低佢。
請神唔得，火嘅力量又被水克制，玉麟金劍似乎又冇跟到我嚟到呢個年代…
我唯一可以用嘅，似乎就只有伏魔劍十九式，可惜仲係差把劍，點算好呢？
老作嘅故事總係出人意表嘅，我呢個都唔例外…
「你脾罅唔係成日都收埋晒D武器嘅咩？」一把女聲咁講。
我另轉頭一睇，竟然係…
「地…地藏女神！？」
「我咁啱得閒，嚟睇吓你表演唔得咩？見你好似攪唔掂，咪出嚟幫吓你囉。」
我一見到地藏女神，意念就出嚟喇，我即刻開心到傻咗，人亦輕挑起嚟…
「哈哈哈，哈哈哈，蛇屍鰻你死喇，而家有個土靈神幫我拖，我睇你點同我鬥？」
(…) 蛇屍鰻知道我有土系靈神幫手，當場好似怕咗我咁，但係…
原來做大佬真係唔容易，因為D水鬼嘅眼神，就好似逼住佢要出場同我作戰咁…
「丫，遍地蛇屍！」佢抵受唔到水鬼俾佢嘅壓力，全身就不停咁搖動…
將身體裡面嘅水蛇都揈晒出嚟，而家周圍都係水蛇，睇嚟仲似有屍毒喺身添…
「事不宜遲，女神你上我身啦！」我向地藏女神講。
「上你身都得，但係你唔准自摸嫁，我好敏感嫁！」
「呢D時候你同我講呢D嘢？」我真係俾佢激到爆肺。
(呼 ~) 我個身突然一陣暖氣入體…
睇嚟佢入咗我個身體喇，但係…
我唔知做乜好自然咁先摸索一吓自己，點知…
「哇丫！非禮啊！」佢即刻又彈返出嚟。
哇，俾佢咁一出一入，我個身體迅間冰火二重天…
嗰種又冷又熱嘅感覺，就好似感冒咁。
「你老祖丫，你兩條友當我透明架？就等你哋試吓苦果啦，蛇屍毒河！」
水裡面嘅水蛇迅間好似墨水入水咁，化成毒液，混入湖水之中…
「咪玩喇！認真嫁！女神啊！入我度啦！」
「仲咁惡鬧人！？嗚…嗚…嗚…」
阿姐啊，呢個時候仲喊，我就真係想喊喇，D屍毒水已經到我腳喇！
我當然唔敢再整喊佢，所以頭先呢句我冇講，我唯有咁…
「女神乖，乖乖地入叔叔體內啦，我一陣帶你去撈金魚啊吓。」
「係咪真嫁？」
「珍珠都冇咁真。」
「咁好啦。」
(呼 ~) 地藏女神再次進入我體內。
呢次我首先乜都唔做，定定神先，之後…
「嚟料啦，土遁水行之術！」
泥土凝成兩片，浮起水面，而我雙腳就踩實佢哋，而家可以喺水上面行…
水裡面嘅屍毒冇機會再傷害到我…
「哈，點啊，蛇屍鰻？」我問。
佢個樣就變得好唔忿氣…
「就等你試吓我嘅屍蛇毒氣啦！」
佢一講完，個口擘到籃球場咁大，裡面係無數嘅尖齒，佢仲…
將無數嘅毒蛇屍氣喺個口度噴出嚟攻擊我…
但係我而家有咗土靈之術，點會驚佢丫…
「土牆！」我一招就將佢格擋咗，點知…`
佢一條鰻魚尾打過嚟，我即刻一躍飛起，避過佢呢招…
可惜佢竟然轉身就一口咬埋嚟…
「雷鰻鯨吞！」
我眼見要俾佢咬中喇，所以還死點死，我直接就用土牆護身…
由佢個口度，衝咗入佢個身體裡面…
我有土牆護身，一時三刻我當然唔會有事啦，但係…
佢個胃裡面嘅毒液有好高腐蝕性，好似想連我個土牆都溶埋咁…
睇嚟我要盡快解決佢。
「喂，而家點啊？」地藏女神問。
「你係神，我係人，你問我點？係咪有D攪笑啊？」我答。
我而家煩緊點樣解決呢隻妖怪，佢個地藏女神仲要喺呢D時候煩我…
我咪鬧佢囉，點知…唉…
佢又喊…
「嗚…嗚…嗚…」
「妹妹啊，你乖，唔好嘈住，叔叔會帶你返出去嫁喇，不過喺度攪埋D嘢先。」
「乜你咁似金魚佬架？」
「你又夠似金魚妹啦，哈，哈，哈。」
其實我心裡面都唔知幾想一巴打埋佢度。
「我諗到喇，直接爆土牆，連佢鰻魚身都爆開埋啦！土製炮彈！」
我將土牆外殼向外爆開…
(龐 ~！)
鰻魚身俾我爆開咗個窿…
我就喺呢個窿到出返去…
「點樣啊？仲打唔打啊，蛇屍鰻？」我問。
「唔打喇，唔敢喇，你哋D人類吓吓都攞人哋個胃嚟玩嘅，黐線嫁。」
佢死蛇爛鱔咁訓咗喺水面，呢度個環境亦慢慢變返清水藍天白雲咁。
「咁我唔客氣，上第二層嫁喇。」我咁同佢講。
「你咪上囉，我仲點阻到你啫，胃都俾你打爆咗嚧。」蛇屍鰻講。
之後，我就同地藏女神上去第二層…
途中有個凹位，但係我冇理到，直接就上咗去…
上到去之後，個感覺好奇怪…
我感覺到…
有D我自己嘅殘餘靈力喺度…
唔通…
呢個就係臣婆前輩要我嚟呢度嘅原因！？
(待續)
下集預告︰
九齒釘耙係豬剛鬣，即係豬八戒嘅武器嚟…