米米蓮妖怪作品 -《再遇見到你》(長篇) (暫停刊): 第二十六集 ~ 雞︰我要入師姐屋企查吓究竟發生咩事。
第二十六集 ~ 雞︰我要入師姐屋企查吓究竟發生咩事。
師姐佢死咗，我個心就實咗，足足實咗三日…
「師姐，師姐，你冇事喇？你去咗邊啊？你冇死到啊？」
「師姐，師姐，唔好走啊！唔好走啊！」
「起身喇，係時候喇！」我突然聽到師父把聲。
亦知道咗頭先只係喺夢裡面見到師姐。
「衰仔，你肯定好攰喇，發夢都仲掛住麗葉，睇嚟你真係好喜歡佢，希望通靈嘅時間啱啦，而家開始喇，去洗個面先，準備見你師姐啦！」
「係，師父！」
我好想見返師姐，亦唔想佢見到我呢幾日憔悴嘅樣，所以我好用心咁梳洗…
「師父！我準備好喇！請你召喚師姐靈魂啦！」我坐定定喺法陣前面…
法陣對我哋嚟講都係D簡單嘢，一堆道具圍住中間一個大圓陣咁…
如果成功召喚到師姐嘅話，師姐就會喺大圓陣裡面出現。
「天靈靈地靈靈…」師父循例噏咗一堆符咒，其實近代已經可以唔使噏呢D嘢。
…
「點啊，師父？召喚唔到師姐啊？」我見師父突然手停口停，所以緊張起嚟。
「傻仔，放心，召喚成功咗嫁喇，不過要等等，麗葉佢好似未準備好啫。」
之後我同師父就係咁喺度等師姐。
時間好似過得好慢咁，而我就越嚟越緊張，就連膝頭都就嚟摙到腫埋…
終於…
霧氣白煙由圓陣度飄出嚟…
我就係咁期待住師姐佢返嚟，就連聲音同配樂都陪住我期待一樣…
(再度重遇你 ~ 可喜也可悲 ~ 嘰—)
背景音樂突然死機，唔係因為壞咗，只係因為佢要配合埋我嘅心情，因為…
而家喺我面前，出現咗喺我面前嘅…
並唔係師姐，而係…
米米蓮。
「你…你隻妖怪！係咪冇保護我師姐？你…係咪你食咗我師姐？」
我見到佢之後，好嬲，嬲佢冇保護我師姐，仲諗起佢係妖怪…
有可能就係佢害死師姐，仲食咗師姐嘅靈魂，所以我一吓就衝前去捉住佢條頸！
「@#$%%^」
「雞仔，你放開手先丫，佢講唔到嘢啊。」師父講。
我之後稍為冷靜落嚟，放開咗手。
「我…喝喝…我應承過你，以後就係你吉祥物，係你守護神，你交託你最心愛嘅人俾得我睇住，我就真係冇一刻分神過，一直都好好保護佢，但係…」
「但係咩啊？你講丫！」我仲係好嬲。
「女主人佢老豆係有料之人，我平時喺佢屋企要好小心，好多佢哋D嘢我都冇亂攪，佢屋企好多地方我都冇去過，一直淨係可以匿喺女主人個房度…」
「呢D我唔想知，我淨係想知師姐佢而家去咗邊？」
「唉…我意思係佢死當日，唔記得帶我出門，我喺房度出唔到去，所以幫唔到佢。」
「哼，唔通真係生死有命？」師父慨嘆。
「原…原來係咁，咁佢…喺邊啊？」我明白米米蓮佢愛莫能助，我又何嘗唔係丫。
「呢個就奇怪，女主人佢雖然死咗，但係靈魂就俾佢老豆放返喺房。」
「咁…咁點解師姐佢唔嚟啊？」
「女主人佢喺你哋召喚佢嗰陣，咁啱佢老豆又召喚佢，我同佢分析過之後，決定由我嚟呢度同你哋報個訊先。」
「咁…咁即係師姐佢個靈魂係安全啊可？」只要聽到師姐佢靈魂安全我就放心。
「係。不過…」
「妖怪兄，又不過咩啊？」師父問。
「主人師父，我估你都估到究竟發生咩事啦。」米米蓮突然向住師父咁講。
「哼，你咁講，即係話我聽我之前估嘅嘢都係冇錯啦。」師父回應。
「師父，究竟咩事啊？」我問。
「如果我冇估錯，捉咗麗葉靈魂嘅人就係佢個「豬頭丙」老豆，想利用麗葉靈魂嘅人都係佢，佢想用麗葉靈魂嚟…我諗係搵錢。」
「佢…佢阿爸！？佢…佢唔會喪心病狂到殺死自己個女，再攞個靈魂嚟用呱？」
「唔想相信，但係合理推論真係咁。」師父回應我。
「唔會，唔會，師姐話過佢阿爸好鍚佢嫁。」
「主人師父同我所諗嘅一樣，因為我局限太多，所以都查唔到D乜，我都只係估。女主人自己講過，話佢死之前係見過毛婆老妖嘅，但係佢老豆喺佢面前打死咗毛婆老妖，問題係女主人都以為自已係中咗毛婆老妖嘅招數而死，所以我唔敢同佢講話佢老豆先係值得懷疑嘅人，我怕到時佢會仲傷心，我最驚女人喺我面前喊嫁喇。」
「咁…即係點啊？」我問。
「我估你想見返女主人嘅話，最好親身去佢屋企，仲最好查吓究竟發生咩事，但係唔好話我唔提你，你準備定當佢老豆係敵人都得嫁喇，仲有一樣嘢，女主人佢係好信佢老豆嫁，所以…你真係自己要小心D。我都係時候要返去喇。」
當我仲諗緊嘢嗰陣，米米蓮嘅影像慢慢消失咗，應該係返咗去師姐嗰度…
「雞仔，我諗咁啦，我聽晚同而家差唔多嘅時間陪你去一敞麗葉屋企查吓啦。」師父咁講。
我及咗吓頭回應師父。
之後行返入房嘗試組織吓發生咩事…
…
如果師父同米米蓮估得啱，師姐係俾佢老豆殺嘅話，我要去查，去確認嘅…
就係點解佢要咁做？同埋師姐究竟係咪真正安全？
我諗諗吓又訓著咗。
…
「喂，雞仔，起身喇，好耐冇見喇！」一把熟悉嘅聲音叫醒我，但係唔係師父。
我起身一望，原來係百龍師兄。
「乜…乜百龍師兄你嚟咗啊？」
「係啊，你點啊？同你師姐關係發展成點先？」
「師姐…佢死咗。」
「死…死咗？你話佢死咗？唔係呱。」
「不過佢個靈魂仲喺人間嫁，我同師父今晚會去見佢。」
「唔得，你師姐死咗，佢已經係鬼，人鬼殊途，自古正邪不倆立！」白千龍咁講。
佢咁講，就好似阻止我同師姐佢見面咁，喺呢一刻，我直頭唔止唔會用前輩嚟稱呼佢，仲當正佢仇人一樣，我個心想鬧佢「關你咩事啊？」，但係礙於佢係師父嘅同輩，所以我冇出聲。
但係我冇理佢，起身就一樣準備定今晚D嘢。
而白千龍佢就自把自為，問咗師父有關師姐D嘢之後，就喺我唔為意出咗去…
「師父，百龍師兄佢哋呢？」
「出咗去。」
我覺得奇怪，所以立即叫師父召喚師姐…
「師父，我怕佢哋殺咗師姐啊，快D救師姐啊！召喚佢，睇吓有冇事丫。」
「召喚麗葉唔好亂嚟，我怕打草驚蛇，先召喚你隻米米蓮先啦。」
師父講完就即刻進行召喚。
米米蓮亦好快出現咗。
「又攪咩啊？晨咁早叫醒我。」
「我想知師姐佢而家有冇危險啊？頭先白千龍兩父子知道咗師姐件事之後，好似想好管閒事咁樣，我驚佢哋會嚟殺咗師姐啊！」
「女主人！？好似今朝冇見到佢噃，咦，唔係添噃，佢老豆好似又召喚咗佢出去。」
「知唔知佢哋去咗邊啊？」
「唔知。」
「師父，咁有冇咩辦法啊？」我轉個頭去問師父。
「雞仔，其實你唔使咁緊張嫁，我覺得你有D過份緊張，白千龍係咁講啫，但係佢唔會好管閒事到專登走去殺隻鬼嘅，我諗佢可能出去行吓嫁啫。」
喺呢個時候，我就好似癲咗咁，竟然連師父都冇理…
喺佢面前扮冇事就…
「師父啊，我出去買少少嘢，準備今晚出發，好快返。」
我講完呢句就出咗門，一出門口就即刻狂跑…
跑去白千龍佢哋或者師姐兩父女有機會去嘅地方…
我亦用咗少少道術，查吓佢哋經過咩地方…
「鳳凰衛視！」係以鳳凰視野喺天上瞰覽周圍嘅招式。
終於…
我搵到佢哋，仲走近佢哋，偷睇佢哋做乜…
「朱謀秉，你個女係咪死咗？你係咪將佢個靈魂保管起嚟？佢而家係鬼，鬼有鬼要行嘅路，唔係就會為害人間，你好快D俾佢行返正常嘅鬼要行嘅路。」係白千龍。
呢度係城郊旁邊嘅一個小木林…
「我個女係死咗，我…我亦真係有將佢個靈魂保管起嚟，因為我太錫佢喇，我唔捨得佢離開我啊，求你哋俾個機會我啦。」似乎係師姐阿爸。
「唔得！你手上嘅係咪就係存放你個女嘅靈魂嘅盒？」
「唔…唔係，真係唔係啊！」
「哼！」
白千龍一個箭步就衝咗前去搶走咗個盒，仲…
「塵歸塵，土歸土，靈魂上路啦！」
佢做咗一個手印，就將個盒打開噤咗喺地下…
一條靈魂白氣就傳送咗落大地裡面。
我…
我好想憤怒，我好想殺咗白千龍，我…
我見住師姐嘅靈魂俾佢打咗落地下，再返唔到嚟…
我又…
呢一刻我又…
再次崩潰，就連聲音都發唔到，淨係呆咗咁坐低咗喺地下。
之後佢哋三個人去咗邊我都唔知。
…
「雞仔，做乜事啊？」係師父搵到嚟。
「師姐佢俾白千龍送咗上路…」
我仲將成件事慢慢講咗俾師父知。
「吓！？咁奇怪？精精神神，鶴立雞群，起身先！」
「係，師父。」
「朱謀秉條友睇嚟好有問題，仲一D都唔豬頭丙，佢好有心計，以佢能力，白千龍冇可能咁易就攞到佢嘢，嗰個肯定唔係麗葉靈魂。」
「真嘅？」
「我哋跟返之前準備咁，今晚出發去麗葉屋企睇吓先丫。」
「係，師父！」
…
夜晚好快就嚟咗，我哋亦一早準備好晒D嘢…
之後我就同師父出發…
我哋去到師姐屋企外牆出面，冇選擇到喺正門入去…
我哋諗住由外牆偷偷地擒入去，但係…
「師父，你做乜事啊？唔舒服啊？做乜標晒冷汗嘅？」
「冇…冇嘢，你…你自己入去先，師父準備少少嘢。」
「係，師父。」
我望住師父個樣，覺得佢好似好辛苦咁，唔知發生咩事呢？
而我自己就偷偷地入咗去先…
(噗~) 我跳咗入去。
而家我身處喺一個花園裡面，一大遍平坦嘅草地，似乎冇任何人喺附近…
我抬頭望一望遠處，見到有幾個房嘅窗係開咗嘅，仲有開燈添…
我估計其中一個就係師姐嘅房…
所以我向住其中一個房慢慢行去…
可惜錯咗，但係…
我聽到…
「哈哈哈，估唔到你呢個豬頭丙一D都唔豬頭丙，竟然利用自己個女嚟搵錢，好嘢，我真係服咗你。」
「我之前最多都係利用徒弟，估唔到朱兄你咁超脫，連自己個女嘅靈魂都用埋，犀利。」
我聽到有人傾計嘅聲，立即緊張起嚟，仲更加小心匿埋，唔俾佢哋知我喺度。
我諗一諗佢哋嘅對話，唔係就係正正引證咗師父同米米蓮所估嘅嘢咩？
朱謀秉佢真係殺咗師姐，再利用佢嘅靈魂，並唔係佢對白千龍所講嘅咁。
「估唔到你哋兩個竟然係最先發現我呢個秘密嘅人。」
「其實我都奇怪嫁喇，點解呢邊D鬼怪好似咁少，但係又一直出現D怪事嘅呢？原來係你做嘅好事。」
「我都係吐連夏兄嘅光啫，早兩日去開連夏兄嗰度，發現有隻妖怪留低咗D線索，所以我哋咪嚟打探吓囉，估唔到你會直接認啫。」
「哼，你哋都係高手，到我唔認咩？更何況我只係用我個女做事，都唔關你哋事，冇咩唔講得丫。」
如果我冇估錯，佢哋而家係三個人傾緊計，一個係師姐阿爸朱謀秉，一個虹霞門掌門洪連夏，一個係鐵扇神臂車魯毛…
「哈哈哈 ~」
咪住先，有第四把聲。
我開始感覺到我可能有危險，所以立即搵方法匿埋先。
呢度周圍都冇嘢遮擋，就只有呢個地方…
一間木屋仔，我估係放雜物嘅地方，咪住先，呢D咩嚟嫁？
符！？呢度太黑，我衝入嚟之前冇睇門口有D咩，原來係有兩道長符封住嘅。
我冇理太多匿咗喺裡面先，再喺木門罅度望返出去，睇吓佢哋走未之餘…
仲睇吓有冇邊個房更似係師姐嘅房…
我一直就喺度望來望去…
(嗄 ~ 嗄 ~ 嗄 ~ 嗄 ~) 突然有一D抖氣聲喺我後面傳嚟。
我到呢一刻先意識到，呢度俾得用符咒封鎖，應該有嘢喺呢度裡面…
我另轉頭一望…
「哇丫 ~！」
一隻嘢立即向我撲過嚟…
我一手就將佢噤咗喺地下，但係可能我反應太大喇…
我連埋隻嘢一齊噤爆咗個地板…
我就同佢一齊跌咗落下面一層…
我右手依然捉住隻嘢，但係我抬頭一望…
呢度原來…
原來最少有另外十幾隻嘅嘢喺度…
(嗄嗄 ~ 嗄嗄 ~ 嗄嗄 ~ 嗄嗄 ~)
呢度雖然好黑，我睇唔清楚佢哋，但係從佢哋呼吸聲我聽到佢哋應該餓咗好耐…
睇嚟我首先要安全離開咗呢度先喇…
(哇丫 ~！) 一隻嘢一邊發出刺耳嘅尖叫聲，一邊衝咗埋嚟我度。
「火鳳炎牆！」
(嘭~！)「哇~！」
(縫縫縫縫~)
攻擊我嘅嗰隻嘢擺明就係已經俾我燒傷…
而家其他嗰D一齊圍住我喺度轉，好似想搵我破綻攻擊我咁…
「你哋唔好迫我殺你哋，我淨係想救返我師姐啫！」我大嗌。
「師…師姐！？」其中一個發出死死氣嘅聲音。
「朱麗葉，朱麗葉係我師姐！」我再講。
「小…小姐！？小姐佢咩事要你救啊？」有幾個一齊出聲。
「師姐佢已經死咗。我而家要去救嘅，係佢嘅靈魂，佢靈魂俾佢阿爸封鎖咗，佢阿爸利用佢啊！」我咬緊牙關，憤怒咁叫喊。
「哼，又係朱謀秉呢個衰人，佢…佢正一魔鬼嚟嫁，係佢將我哋攪成咁嫁！」
「你哋係？」我問。
「我哋都係佢屋企嘅僕人，佢將我哋變成而家咁幫佢搵錢啊，開頭淨係要我哋攪破壞，之後由佢收拾殘局咁，但係因為佢個妖術有反噬嘅效果，所以佢一直當咗我哋係替死鬼，我哋本來成三四十個人嫁，而家…而家淨返十個…十隻妖怪咋。」
(待續)
下集預告︰
「人頭花唔恐怖喇，人頭樹，人頭躝藤仲恐怖啊…」
註腳︰嗰一句歌詞係張學友嘅《再度重遇你》