米米蓮妖怪作品 -《再遇見到你》(長篇) (暫停刊): 第二十二集 ~ 豬︰我喜歡咗一個人。
第二十二集 ~ 豬︰我喜歡咗一個人。
「我就係喇。」雞仔竟然自認係江雲林師父。
你估我會唔會信丫嗱？
(啪~！)
一個中年男人突然喺屋裡面行出嚟，仲打咗亂噏嘅雞仔一吓。
「咦，你唔通就係鳳派嘅道士？」我問。
「係，有咩貴幹？」江雲林師父回應。
「我要做你徒弟！」我似乎搵到我想搵嘅人喇！
「做我徒弟？點解啊？」
「我有我嘅原因。」我做事不嬲都唔鍾意解釋，所以有D冇禮貌咁。
「咁我點解要收你做我徒弟啊？」
「我有錢！」
一時之間，我諗唔到點回應，所以根據習慣，我咁樣回應咗佢，但係估唔到嘅係…
「哦~~~ 咁就好辦事喇，徒弟呢邊請。」
佢又突然接受咗我，唔通呢位師父又係D見錢開眼嘅人？
我個心有少少失望，但只要佢真係肯教到我去殺咗隻妖怪就夠喇，所以…
我冇理太多，跟咗佢入茅屋。
喺屋裡面，終於俾師父佢逼到我咩都講晒出嚟，佢仲要鬧我爸爸係「豬頭柄」…
我當然係照舊表面屈服啦，但係我係唔鍾意佢咁話我爸爸…
所以即使佢應承咗收我為徒，我亦只有一種騎牛搵馬嘅心態…
等佢走咗，我就去咗另一家高手度打聽。
我去咗「虹霞門」，點知…
遇到一班冇人性嘅畜牲，竟然連我呢個咁柔弱嘅女仔都蝦…
好在，有達師兄咋，不過亦都要多謝一聲雞仔佢有份嚟幫我。
呢次之後，我亦疊埋心水去，專心去跟師父學嘢。
點知…
第二日我一去到搵師父啫，師父就要我跟雞仔出去體驗…
冇得學嘢，我當然千萬個唔願意啦。
但係最後都跟咗雞仔去…
我哋去咗…
一間教堂！？
點解雞仔身世咁奇怪嘅？師父係中國人，養父就係外國人…
好奇心驅使我去咗了解雞仔更多…
喺呢幾年時間，我食過佢養父整嘅臭襪牛油餅乾，認識咗佢一班教會嘅弟兄姊妹，學識咗唱聖詩，學識咗D簡單洋文，仲多咗個洋名，叫做Juliet，亦將我所唔開心嘅嘢都同大家分享咗，仲學識…
向神父告解，請教神父一D嘢，就好似今日咁，我有D心事想同佢告解…
怕醜嘅我，又一次慢慢行入告解房裡面，慢慢坐低咗…
「神父呀…」
我等待住神父嘅回應。
「咳咳…」佢喺度喇。
「神父呀，我…我好似喜歡咗一個人啊…」
「吓！？邊個啊？」神父好似好好奇咁。
「咦，點解神父你把聲同平時唔同嘅？」
「我今…天有D唔舒服啊。你先將你嘅事情告解俾我聽先丫。」
「哦，係咁嘅，又細到大，我都好似大晒咁，好刁蠻任性，冇乜人敢唔聽我話，可能就係因為咁啦，我冇乜朋友嫁，但係…自從識咗佢之後，佢帶咗好多嘢俾我，最少最少啊，都有一大班教會嘅弟兄姊妹丫…」
「咳咳…」
「我…我好似有少少鐘意咗佢啊。」
「吓！咁…咁你…咁你就繼續鐘意佢囉，喜歡一個人又唔係錯嘅，你…你哋要一起努力啊！神父我唔舒服，要走先喇，你唔好走住，等我走咗先，免得感染你。丫，臨走前，想確認一下一D嘢，可以講個男仔個名俾我聽丫嘛？」
「神父」講完呢段說話之後，我發現咗一D嘢，正確嚟講係告解房出面有個弟兄向我做咗D手勢，仲打咗個眼色，所以我對「神父」講嘢都變得好悔氣。
「哼，你好似好開心咁噃！好！我當然可以講俾你聽啦！我鍾意嘅咪就係神父你囉！」
「吓！？」「神父」嘅呢一吓聲音包括咗無限嘅悲傷同失望。
「Eee…算啦，咁你等我走咗你先走啦…」「神父」似乎真係要走喇。
「咦，大BEN哥！？」「神父」行咗出告解房，仲大叫起嚟。
我亦跟住嬲嬲地咁行出告解房。
無錯，「神父」其實係雞仔佢假扮嘅，佢用咩方法耍走咗真嘅神父我就唔知喇，不過通水俾我知嘅就係呢位教會弟兄「大BEN哥」。
「哼，Phoneix你咁衰，玩我丫嗱，我就唔同你講嘢。」
之後，我嬲爆爆咁就走咗去…
其實…
頭先當佢問我喜歡嗰個係邊個嗰陣，我就已經知道佢係雞仔，但係我依然用咗一句「咪就係神父你囉！」嚟回應，意思咪就係我喜歡嘅人就係雞仔佢囉，唔知佢明唔明呢？
我當我自己表白咗嫁喇，女仔嚟家嘛，唔可以表白得太直接嘅，至少我信奉呢一套丫。
雞仔佢可能俾我識破咗，見我又話嬲佢唔同佢講嘢，所以佢都冇跟嚟。
之後，我見都夜喇，就自己一個人慢慢行返屋企…
「死人頭，死人雞…真係唔跟嚟…」
我就係咁，一路行，一路自言自語。
唔知點解，我覺得今晚我平時行嘅呢條路好似特別陰森恐佈咁…
兩邊都係人咁高嘅長草，搖吓搖吓嘅佢哋就好似鬼手咁，好似想拉我入草叢咁…
天色昏暗，但係又唔係黑色，而係灰灰紫紫咁，感覺好奇怪…
唔通…呢D就係師父所教嘅感靈術？我感覺到有妖怪！？
(噗 ~) 一吓腳步聲。
咦，仲好似有D嘢喺我後面跟住我添…
我一時之間唔敢再行前，亦冇另轉頭，只係企咗喺度…
我望一望前面，見應該距離屋企唔遠喇，所以…
為咗自己安全，我即刻就向屋企跑返去…
希望後面唔係真係有嘢跟住我或者隻嘢跟唔到我啦…
但係…
(噗噗噗噗 ~ 噗噗噗噗 ~)
後面真係有嘢跟住我…
我越跑就越快，但係佢就越跟越貼…
腳步聲亦越嚟越近，我心知不妙喇…
佢…
佢到喇！所以…
「耶和華的使者、在敬畏祂的人四圍安營、搭救他們！」我轉身就大嗌。
(哇 ~)
隻嘢原來已經嚟到我面前…
而家似乎係俾我經文鎮壓住咗，佢好似好辛苦咁…
我立即退後幾步，望清楚佢…
佢係一副我熟悉嘅面孔…
係一個我永遠都唔會唔記得嘅樣…
呢一刻，好矛盾咁，我嘅恐懼同憤怒同時爆發，因為…
佢就係「毛婆老妖」，殺我嫲嫲嘅嗰隻妖怪。
呢幾年我唔係白白過嫁，我真係有喺師父度學到嘢…
亦真係苦練過，師父仲教咗我一個最方便同最適合我去用靈力驅妖嘅方法…
將靈力灌注喺聖物之上，中西合璧，以聲音同經文向妖物發出攻擊…
「我要向山舉目。我的幫助從何而來，我的幫助從造天地的耶和華而來。祂必不叫你的腳搖動，保護你的必不打盹。保護以色列的也不打盹，也不睡覺。保護你的是耶和華，耶和華在你右邊蔭庇你。白日太陽必不傷你、夜間月亮必不害你。耶和華要保護你、免受一切的災害，祂要保護你的性命。你出你入，耶和華要保護你、從今時直到永遠！」
我讀完呢段，「毛婆老妖」佢就更加痛苦，就好似被虐待咁…
我有軟弱過，想放過喺我面前咁辛苦嘅佢，但係我嘅記憶話俾我聽…
佢就係我呢幾年每日都諗住去報仇嘅對象…
所以！
我唔可以放過佢！
「耶和華是我的牧者！我必不至缺乏！祂使我躺臥在青草地上！領我在可安歇的水邊！祂使我的靈魂甦醒！為自己的名引導我走義路！我雖然行過死蔭的幽谷！也不怕遭害！因為你與我同在！你的杖！你的竿！都安慰我！」
我越讀越快，越讀越嬲，直頭…
「在我敵人面前！你為我擺設筵席！你用油膏了我的頭！使我的福杯滿溢！我一生一世必有恩惠慈愛隨著我！我且要住在耶和華的殿中！直，到，永，遠！」
想將佢打到魂飛魄散一樣。
而家…
佢已經喺我面前就死就死軟弱無力咁訓咗喺地下，但係…
「小…小姐…」佢竟然咁樣叫我。
「小姐！？」
由我出世以嚟，會叫我「小姐」嘅就只有我嘅工人，所以我突然覺得奇怪。
「我…我係…楊大媽啊…」
「楊大媽」係我十歲之前一直照顧我嘅嗰個工人，幾我十歲嗰陣，爸爸話「楊大媽」要返鄉下，所以以後都唔能夠再照顧我，當時我亦為佢喊咗幾晚。
「你…你係楊大媽！？哼，妖怪，你唔使呃我，你哋D妖怪最鍾意呃人嘅。」
「小姐，你…你殺我唔緊要，但係可以聽埋我講一句嘛？」
「哼，就睇吓你仲想做乜？講啦！」我當然揸實本聖經隨時準備對付佢啦。
「我死唔緊要，我只係想小姐你…你幫我救返明仔…」
「明仔！？」
「明仔」係「楊大媽」嘅囝囝，細個嘅時候都有同我玩過。佢講得出「明仔」，我真係有D想相信佢就係「楊大媽」，但係佢肯定係殺我嫲嫲嘅兇手，所以…
「係咪你殺我嫲嫲，你點解要殺我嫲嫲？」我嘅呢一句包含住無限嘅憤怒。
「對…對唔住啊，我唔想嫁，當時…當時我已經冇食嘢成年喇，我真係好肚餓啊…我…我本來其實係想食你…但係當時俾你縮低避開咗，所以…所以我就誤打誤撞扯甩咗老夫人嘅頭，老夫人之前對我都好好，所以呢件事，到而家…我都好後悔，我其實真係唔想嫁，我…我知你唔會原諒我，正如我唔會原諒朱謀秉一樣…」
我開頭都有D信佢，但係當佢提到爸爸嗰陣，我就覺得佢似乎係有陰謀，所以…
「所有人都知我爸爸係大好人，佢根本唔會對你做衰嘢，使乜你原諒啊？」
「佢好人！？佢表面就真係好人，大家都真係當咗佢係好人，我本來都以為係，但係…我想問小姐你，你有冇懷疑過你屋企點解會咁有錢啊？」
「哼，皇族後裔，D人想攀龍附鳳，咪送嘢俾我哋屋企囉，呢D嘢係人都知啦！」
「哈哈…哈哈…」
「有乜好笑，你再笑我就打散你！」
「我笑係苦笑，係憤怒嘅笑聲，你爸爸佢呃人呃得好犀利，除咗俾佢害過嘅人，冇人知佢D衰嘢，俾佢害過嘅人亦冇一個僥倖可以將佢D衰嘢公諸於世。」
「哼，廢話，你而家咪做緊囉。」
「我同小姐你真係有緣，係因為你我先走得甩，其他俾佢害嘅人死嘅死，變成妖怪嘅變成妖怪，變咗妖怪仲要俾佢利用，我相信而家都仲有唔少工人喺佢地牢度幫佢搵錢。」
「地…地牢！？搵錢！？」
「小姐，我變成咁樣，我早就想死喇，不過希望你先救返明仔佢丫。」
佢突然爬到我腳下面喊住咁求我，我差D以為佢想傷害我而出咗手打死佢…
不過我冇咁做到。一時之間，我真係唔知信唔信佢好…
就喺我諗緊嘢嘅呢一刻，突然…
(嘭 ~！)
「毛婆老妖」突然喺我腳下全身爆開咗，一瞬間，佢成個人就消失咗喺世上。
我定定神望一望，原來…
「麗葉，你冇事丫嘛？」係…
係爸爸啊。
下集預告︰
「師…師姐…」呢一刻，我真正嘅崩潰…