米米蓮妖怪作品 -《再遇見到你》(長篇) (暫停刊): 第九集 ~ 龜︰比武招親？
第九集 ~ 龜︰比武招親？
因為要避鳳初，所以我落咗山…
仲去咗搵西施嬸嬸，點知有個大隻佬唔知埞，激到嬸嬸發火。
「西施嬸嬸，唔好嬲啦。」
「最憎人話我肥嫁喇，我邊忽肥啫，係豐滿D喳嘛。」
「係喇，係喇，孫燕姿都有得唱啦，波大，蘿大，好醜怪…」
「哈哈哈，衰妹，總係用D奇怪方式氹嬸嬸開心嘅…」
「衰妹，你身材夠好啦，仲醜怪過嬸嬸添噃，有識到男仔未啊？」
「Eee…未啊。」
「聽講，你之前同我講嗰戶個大少爺徵婚噃，你唔去試吓？」
「徵婚！？」
「好似一連幾日嫁，一陣嬸嬸收檔同你去，你咁正，一定得嘅。」
「嬸嬸啊！」
我就係咁，坐咗喺嬸嬸個檔旁邊等佢，其實我都唔知我要去邊，只係想離開鳳初，但係…
其實我仲好掛住佢，對佢嚟講可能我哋只係識咗一日，但係對我嚟講係…
幾日，而且，我覺得就好似同佢喺埋咗一齊好耐好耐咁，喺我心目中，佢就係一份上天賜俾我嘅禮物…
而我個心，就好似早已經交咗俾咗佢咁…
(咁點解你要走啊？)
我個心有咁問過我，但係…
邊有一個女性可以忍受自己男人心裡面唔係淨係得自己啫，所以…
我只有傷心咁離開，諗到呢度，我真係咬緊下唇…
好唔爭氣咁流咗眼淚出嚟。
「傻妹，做乜喊啊？有人蝦你？等嬸嬸幫你教訓佢。」
「唔好啊，唔好啊！」我好似傻咗咁，竟然真係驚嬸嬸會去打鳳初。
「哦，咁我哋快D出發喇，夜D俾人搶晒好位就唔好喇。」
「哦。」
我之後就好似個布公仔咁，由得嬸嬸拉我去徵婚場地。
…
其實徵婚場地離我哋好近，所以好快就到咗，呢度好多人圍住咗個台。
「仲有冇下一位想上台？」台上主持咁問。
「吓！？比武招親？黐孖筋架？」嬸嬸失儀大嗌咗出嚟。
台上係一個個樣好妖艷嘅女仔，俾人一種好…
好妖邪嘅感覺，直頭有D唔似人類。
「西施啊，你有所不知喇，本來唔係比武招親嫁，但係唔知邊度嚟咗呢個妖女，之後就變成比武招親喇，仲要你睇吓你睇吓，呢度D男人都生滋貓入眼咁款喇，連個徵婚主持都幫晒佢咁。」隔離有個大嬸咁講。
「著成咁，D男人唔生滋就有鬼啦，對波唧晒出嚟咁滯，D布都唔知用嚟包乜嘅，底褲又著喺出面，成個淫婦咁，等我上台打死條八婆先。」
「喂，你千祈唔好啊！」
「點解啊？你驚我唔夠條奀挑鬼命嘅八婆打呀？」
「我驚嘅就多囉，一來驚你打死人，二來驚你打贏咗，真係做埋大少爺老婆…」
「咦，咁都唔錯噃。」
「咁方家大少就慘囉。仲有三來，你睇吓呢度D男人，我驚你打贏個女人，呢度D男人殺咗你依次，佢哋好似中咗邪咁。」
「咁點算啊？我個世侄女都好仰慕大少爺嫁。」
「一係帶大少爺遠走高飛，二係你世侄女自己上台打贏個妖女。」
我都同嬸嬸都呆咗咁望住呢位大嬸。
「仲有冇下一位想上台？」主持再講。
「唔使等佢哋上台喇，我諗講樣子標緻都非呢位小姐莫屬。」
台上嘅妖女竟然突然指住咗我。
「上台啦，夠唔夠膽啊？」佢再問。
「阿妹，上台打殘佢啫，唔使同佢客氣嫁。」嬸嬸亦竟然推咗我上台。
而家喺台上面就只有我同個妖女。
「大家話，我靚定佢靚啊？」妖女問台下嘅麻甩佬。
「你啊！當然係你啦！」D麻甩佬真係好似中邪咁。
而嬸嬸竟然突然衝咗上台，仲…
唔知邊度攞咗D化妝品出嚟幫我化妝…
「你嬸嬸我出嚟行咗咁耐，冇返D化妝品喺身點掂啊？等我幫你化到正過條八婆啦！」
我就係咁，企定定響度，乜都唔使做咁，等嬸嬸幫我化妝，嬸嬸三兩吓手勢就幫我化好，仲…
「大家話，我細侄女靚定條八婆靚啊？」
大家依依哦哦咁，好似想話我靚，但係又想話係個妖女靚咁。
之後…
嬸嬸嬲嬲地竟然…
(嚓勒~ 嚓勒~ 嚓勒~)
「西施嬸嬸！」我被嚇到大嗌咗出嚟，因為…
嬸嬸佢將我件衫同條褲都扯爛咗…
「放心啦，嬸嬸好有技巧嘅，露少少肉，D麻甩佬肯定話你正過佢啦，不過…咦，後面好似撕多咗D添，見到少少個八月十五！」
「西施嬸嬸！」
我當然用咗一手噤住前面，一手噤住下面啦。
「傻女，你睇吓而家下面D麻甩佬。」
我跟住嬸嬸講嘅做，去望一望佢哋，但係我當然係怕醜到耷低晒頭向前咁望啦…
「你哋話，佢哋邊個靚D啊？」
「鹵水雞，鹵水雞！」呢度D人一直就係咁叫我嫁喇，你話佢哋討唔討厭丫？
「嘩，原來鹵水雞咁正嫁喎。」
我雖然尷尬同嬲，但係…
我見到D麻甩佬嘅眼神真係唔同咗，而家淨係得返鹹濕，冇晒中邪嘅感覺…
「仙女啊！」台下有個大嬸仲咁叫我添。
大家都明白到我係上嚟挑戰妖女嘅女性，所以…
即使佢哋見到而家佢哋嘅老公﹑男友或者係仔仔望實我都好，佢哋都會覺得我係救咗佢哋…
「哼，竟然夠膽同我過唔去！」
妖女突然變得好嬲，仲一吓就將豐滿嘅嬸嬸推咗落台。
「妖女，等我爪死你啦！」
呢個妖女竟然叫返我做妖女，仲伸出一隻好似鬼爪咁恐怖嘅利爪出嚟爪向我…
正常嘅我一定一拳打埋去回應，但係唔知點解，係我最驚嘅呢一刻…
我好自然咁合埋咗眼…
(咁樣，咁樣，咁樣…)
係鳳初把聲啊！所以我亦都好自然咁跟著佢聲音去做咗護身咒…
(嘭~！) 一吓強勁嘅震盪聲。
(哇丫~！) 一吓淒厲嘅尖叫聲。
(哇~！吓~！？) 一堆驚訝嘅喧嘩聲，由台下觀眾發出。
喺我開眼之前，我腦裡面只有一片迷惘…
到我好奇開眼去睇吓發生咩事嗰陣…
我見到有一堆灰灰黑黑嘅爛布碎喺地下，上面仲有少少火舌咁…
「嘩，原來個妖女真係隻妖怪嚟嫁！」台下嘅人都咁講。
而我就呆咗咁企喺度…
「多謝你啊！多謝你啊！多謝你救返我個仔啊，好新袍！」
台後面突然衝咗一個衣服華麗嘅大嬸出嚟攬住我。
「鹵水雞原來係仙女嚟嫁喎！」
「我一早就知佢非同凡響嫁喇！」
「佢就好啦，可以嫁入豪門喇！」
台下仲有一輪掌聲。
「新袍仔，入嚟我哋屋企內堂丫。」華麗大嬸講。
「唔好意思啊，可唔可以…」
「你唔想嫁入我哋門呀？」佢問。
「唔係，不過…我想扶返起我嬸嬸先啊，婚姻大事都係由長輩話事好D。」
我講完呢句，華麗大嬸都及頭表示好，我就去扶起嬸嬸…
「嬸嬸，你冇事丫嘛？」
「哎吔，可能真係肥咗少少，起唔返身喎，哈哈！」
之後，我就同西施嬸嬸佢跟咗華麗大嬸入一間大屋嘅內堂。
(待續)
下集預告︰
八婆，即刻同我躝屍趌路！