米米蓮妖怪作品 -《再遇見到你》(長篇) (暫停刊): 第三集 ~ 龜︰天啊！英美男人啊！
第三集 ~ 龜︰天啊！英美男人啊！
(噗~)
咩事呢？
我當時喺白水溪洗緊身，聽到溪頭嗰邊有D聲，咪著返好D衫…
之後沿住聲音方向行去囉。
點知見到…
兩個男人趴咗喺度，第一時間嘅反應係…
「該煨囉！」
但係之後發現佢哋似乎係暈咗，唔通…係有人整暈咗佢哋，放低佢哋喺度？
我見到…
上面嗰個男人好醜樣，一睇就知唔係好人，而下面個男人就…
文質彬彬，個樣都幾英偉，就連對腳都好光滑…
唔通…係上天送兩個男人俾我揀？
所以我立即推開上面個男人，揀咗下面嗰個，而且…
一吓唔覺意就將「醜樣男人」推咗落溪下嘅河流度，佢俾水沖走埋…
「對唔住啊，醜樣男人。」
之後，我就抬住「英美男人」返屋企…
冇錯，我的確係抬佢返去，因為我由細到大都靠勞力生活，所以練得一身好力氣…
其實，我唔係唔知醜嫁，不過你話唔飢渴就假嘅，我差唔多二十歲女喇…
淨係曾經試過喜歡山下一家大戶人家嘅少爺，不過自知身世同人哋天淵之別…
根本冇可能喺埋一齊，所以早幾年已經打消咗呢個念頭…
只係會每次落山時去偷偷望吓佢咋。
但係，而家上天送咗個「英美男人」俾我，我當然係好開心啦。
所以呢兩日我都好好咁照顧佢，亦都傻傻地咁用咗本來買嚟紀念嘅…
胭脂水粉化咗吓妝，諗住等佢起身俾佢睇到我個靚樣囉。
不過開心嘅日子過得好快，眨吓眼啫，就…
「丫~」
「咦，你醒喇？」
「…請問呢度係邊啊？」
佢呆咗咁望住我，唔知係咪我化嘅妝吸引到佢呢？
我見佢冇出聲讚我，我咪有少少嬲囉，所以語氣都差咗D咁去問佢︰
「我救你返嚟嫁，你係咪應該多謝我先啊？」
「多…多謝。」哼，人哋都唔係想你講呢D。
算喇，我轉個身就諗住整D嘢俾佢食…
背住佢，同佢傾咗幾句…
點知當佢問到…
「咁…請問你喺邊度救返我嫁？」
「白水溪頭嗰邊囉，當時你仲砸住另一個人添。」我已經有D尷尬…
「另一個人！？咁…嗰個人係點嫁？佢咩樣嫁？佢而家點啊？」
死喇，唔知嗰個日係咪佢親戚或者朋友，如果係咪弊家伙，所以我咁講︰
「咩你咁多嘢問嫁，知道唔救你返嚟啦。」
「唔好意思啊。」
「係一個…我都唔知點形容，不過係一個男人囉。」
「你有救埋佢嗎？」
死喇，死喇，唔通佢哋真係識嘅？
「唔係我唔救佢啊，係我帶咗你返嚟之後，再去嗰度，佢就唔見咗人嚧。都唔知佢去咗邊，話唔定俾水沖走咗嚧。」
「哦，咁…算啦，多謝你先啊，小姐。」
咦，佢似乎唔在乎嗰個人噃，真係好彩喇。
我見佢想出門，所以急不及待就即刻俾咗碗未煮好嘅飯佢食…
「你啱啱醒，不如食碗米飯先啦。」
點知，佢仲食得鬼死咁開心…
我見佢咁開心，我都覺得好開心咪坐低佢身邊囉…
「我唔知你喺邊度嚟，但係如果你要走我都唔會阻你，不過你係一陣就走嘅話，唔好話我唔提你啊，呢個山頭出名好多妖魔鬼怪嫁。」
希望嚇吓佢，佢會唔走啦。
「咁你一個女仔住喺度唔驚咩？」
「驚都唔驚得咁多啦。」
死蠢死蠢，應該話驚，睇吓佢會唔會留低保護我丫嘛，真係死蠢。
佢對住我微微笑咗吓，仲問︰
「咁你點解一個女仔住喺度嘅？」
佢咁問，我第一時間係諗起婆婆，所以眼淚就湧晒出嚟眼眶…
「我細細個父母就死咗嫁喇…之後就剩返我一個人囉…」
「唔好意思啊，提到你傷心事添。」
「唔緊要，你係走就快喇，自己小心D啦。」
我好唔捨得佢走，但係我又覺得自己唔可以咁自私，所以我起咗身，背向住佢…
點知…
「係呢，我未問你叫咩名噃，小姐，你叫咩名啊？」
佢…佢想知我叫咩名啊，我開心到即刻就另返轉頭講︰
「…我叫陸瑞基。」
「陸瑞基！？你好啊，我出去行一陣先，我會返嚟嫁，我一定會返嚟。」
我真係開心到想喊啊，不過…我仲想…
「咁不如我帶你出去行吓丫。」直頭黐住佢。
「你帶我！？哦，好啊。」
之後，我就帶咗「英美男人」出去出面。
「陸小姐呀，頭先你咪話呢度好多妖魔鬼怪嘅，其實…我係道士…你或者帶一帶我去睇吓丫。」
其實佢係咩，我根本唔在乎，因為佢喺我心目中，根本就係神送俾我嘅禮物。
唔經唔覺，天都已經黑晒嚧，點知「英美男人」竟然問我…
「陸小姐，你凍唔凍啊？」
佢咁問，我真係由腳板底暖到上心口…
不過呢度係「惡鬼洞」，所以其實我開心之餘都有少少驚嫁…
「…前面呢個洞口就係惡鬼洞喇，聽講從來冇人試過走咗入去出得返嚟嫁。」
「哦，OK，咁樣…」
我唔明「屙K」係乜，所以呆咗咁望住佢。
之後佢仲教咗我「OK」係點用，同話會教我洋文，咁即刻我哋仲有時間相處啦。
正當佢帶我入去惡鬼洞嗰陣，佢突然講︰
「陸小姐，你唔好郁住，你跟我做，一陣真係見到妖魔鬼怪，唔使驚，你做好呢個動作就得。」
之後佢仲…
捉住我雙手，教我做一D動作…
動作唔係緊要，問題係…
佢捉住咗我從來未俾男仔掂過嘅雙手…
我雙手粗糙，其實唔敢俾男仔掂，但係…
佢雙手掂住我嗰陣…
我全個人就好似硬化咗咁…
只可以任佢擺佈…
「咁…咁就得嫁喇？」
佢之後再教我另一個動作。
「…OK？」
「哦，OK。」
佢就係咁，帶咗我入惡鬼洞…
行到入去…
我聽到D怪異聲音之餘，又想同佢講吓嘢，所以咁講︰
「Eee…我有D驚啊。」
「有我喺度，你呢世都唔使再驚。」
有，我，喺，度，你，呢，世，都，唔，使，再，驚！？
呢十二個大字完完整整咁刻咗入我腦海同個心裡面…
我亦產生一個幻想…
係咪即係講緊呢世佢都會同我喺埋一齊啊？
我個心噗噗噗噗咁跳得好犀利…
直到…
(Weeee~ 哇~ 丫~)
「何方妖孽，速速報上名來。」
「報你條命，我食咗你就有份。」
我好驚呢隻妖怪會食咗我個「男人」啊，所以我握到「我男人」好實…
「記住，有我喺度，你呢世都唔使再驚。」
真係…真係…太令人陶醉喇！
「妖孽，再唔講清楚你做乜喺度作惡，就唔好怪我出手狠喇！」
「哈哈哈，出手狠？你咩料子呀？夠膽嚟騷擾我山靈妖婆！？」
「哼，區區小妖，唔怕話你知，我就係火鳳派唯一傳人，記住喇，我叫陳鳳初。」
原來「我男人」叫陳鳳初啊，連個名都咁有型，真係好夢幻啊！
「咦！」
雖然我睇唔清楚山靈妖婆個樣，但係佢形似驚愕我拖住鳳初咁…
之後佢…
「哈哈哈，你好彩，循地術！」
「想走？」
「鳳初呀，俾佢走啦。」
「但係…你唔驚佢會再嚟攪你咩？」
「一來，我都生活呢度咁耐，佢如果係要攪我，一早就攪咗啦，二來，我有你丫嘛，我唔會再驚嫁喇。不如，我哋返屋企囉。」
「我男人」佢好詫異咁，但係都回應咗一個「哦」字。
「係呢，不如幫我改個洋名丫，我見人哋大戶人家都有洋名嫁。」
其實，我係諗起我當初喜歡嘅嗰個男仔有洋名，而佢好似叫做「低域」。
「咁呀，不如叫做…GRACE丫！」
「龜匙！？龜好咩？」
「意思有優雅，恩澤，慈悲等意思，好似好適合你。」
「好，以後你就叫我龜匙啦。」
(待續)
下集預告︰
殭屍郁喇，佢一另個身過嚟，我就見到佢…