<<現代驅魔文獻>>: 第八章：火正君信別新情 封雙刃難忘舊恩
第八章：火正君信別新情 封雙刃難忘舊恩
（沮頌篇）我知道自己真的考慮清楚，她的確是我一生最愛。外人可能未必明白，但娶一個自己真心愛的女人，我心裡最明白。祝融是我一生中見過最值得讓我照顧的女人。
祝融哭了出來，抱著我說：
「我願意。。。」
我捉緊她的雙手，繼續說：
「好啊融兒，我愛你啊！」
我的內心很激動，只想盡快帶祝融回香港。
「融兒，事不宜遲。現在我先回香港，準備好結婚的事，立即幫你辦手續過來。這段時間先不要走漏任何風聲，免得你契爺諸多阻撓就麻煩了！」
「是，好了，我會等你。。。」
當我回到酒店後立即執拾好行李，便趕緊退房離開酒店。怎料到一出門，大約十幾個拿著鐵棍的人衝著我過來，相信是羸少昊的人。看來他已經知道了祝融和我的事。其中一個帶頭的向著我說：
「你敢搞我們老闆的女兒！（之後一堆普通話的粗口，我也聽不明白！）」我把他一踢便跌倒在地上，順手拿走了他手中的一枝鐵棍。已經又有一個把他的鐵棍打在我身上，雖躲不過但也不算太痛。之後又一個過來，我用鐵棍擋著，左手空著順手一搶，把他的鐵棍也搶到手中。
當我手有雙棍，便是真正的封雙刃‧沮頌。不用三兩下已經把四五個流氓打倒在地上，剩下的人見狀也不敢走近，立即逃了。我放下手中兩枝鐵棍，便拿著行李盡快上的士回羅湖火車站了。
晚上十一點回到香港後，我回到先生家中匯報在深圳這三天所發生的事情。先生與我坐在客廳的沙發笑著說：
「沮頌，辛苦你喇。今晚用餐未呢？」
「今晚因為要等祝融係酒吧出黎，所以仲未食，但唔肚餓。先生，我。。。」
先生走過來坐在我旁邊，搭著我膊頭說：
「兄弟，我明白。你地既婚事，就等我幫你辦妥。你能夠搵到一生最愛，而且仲係我地轉世驅魔師既人，我絕對高興。」
「先生。。。唔該曬你。。。」
「既然祝融有雙程證，你先安排佢落黎結婚，之後我再幫你處理其他手續，三個月內就可以係到同你安定。到時我再幫你地擺酒，好令天下驅魔界既英雄知道我地封雙刃‧沮頌娶到祝融咁好既老婆，哈哈。」
我受寵若驚，說：
「先生，唔洗咁客氣，我可以。。。」
「得喇得喇，兄弟你未結婚就咁囉嗦，難道你仲將我當係外人嗎？」
「點會！無先生，我今日都只係一個。。。」
「仲講呢啲，我先吩咐人煮個麵俾你，等陣啊。」
不禁讓我想起以前先生把我救回來的時刻，我仍然歷歷在目。。。
那時我只有十九歲，在香港只是一個「古惑仔」，每天混著黑社會無所事事。有一天，社團知道我雙刀了得，安排我負責做刀手斬一個仇家。
晚上九點左右，目標人物和一個差不多三十歲的中女一起在黃大仙大排檔食飯。而我正在一架貨車上等待他們埋單，之後就可以行動。
「Joe哥，架撐準備好，阿公講明今晚一定要留到隻手為證先收到錢。」
「雄仔，一陣等我一打包到隻手番黎就立即開車收錢慶功啦，哈！」
十點了，目標人物和那個中女埋單後，正離開走到街上了。我拿著雙刀沖出去正要斬過去，目標人物輕易躲開，把手中正在輕撥的鐵扇一收便擋住了我的刀，身手的確了得，我另一刀又斬過去，他又輕易把我推開，反而我一不留神讓他一扇打在我的右手手臂上，刀便掉了。我再用左手的刀想向前刺過去，他又避過而且突然把扇打開，我自然反應可一嚇，他便一腳將我踢倒在地上。
「有差佬啊，快啲上車啊！」
兩個巡邏的警察正跑過來，當我正想逃去時，雄仔已駕車離開了。我也被那個目標人物纏繞著，最後被兩個警察抓住了。
那目標人物竟然向著被警察捉住的我說：
「兄弟，你叫咩名？你手臂上兩條疤痕係天生？」
「係啊，關你咩事！律師未到之前我係咩都唔會講架！」
其中一個警察粗暴地向我說：
「唔好咁多野講啊！你當場斷正，仲夠膽咁大聲，律師都幫你唔到！」
之後我被帶上警車，回到警署後我便被關進拘留室。雖然我不是第一次被關進拘留室，但今次真的預料到兇多吉少了。我被關了兩至三個小時後，有一個便衣警察「幫辦」（督察級以上）放了我出來跟我說：
「沮華傑，你走得喇。」
「走得？阿sir唔好玩野喎！」
「而家係咪放你走都唔走啊，不過你出去之後要見一見個人。」
「見邊個啊？你唔係諗住搵第二組黎砌我啊麻？最多告我傷人姐，想點啊
sir！」
那個幫辦已經強行拖著我出去。
「行啦，你個古惑仔今次好彩，下次你一定無咁好彩！」
已經是凌晨兩點多了，原來他要我見的人便是我要斬的目標人物。那個目標人物和我離開警局後，便上了一架很豪華的房車，而且有一個穿著整齊西裝打呔的司機坐在前面，後面便是那個目標人物和我坐著。我上車後立即問他：
「你係邊個啊？點解要幫我？同埋呢單野咁大獲，佢地點解肯放我？」
「我姓侯，所有人都叫我先生。本身我係香港人，但我而家係內地為國家文化部秘書長，所以我開聲佢地就可以破例放人。」
「國。。。國家文化部，咁點解你要救我啊？我斬你喎。」
「你上到我屋企你就會明白。」
那是飛鵝山上的獨立豪宅，有獨立泳池和花園，都是被厚厚的圍牆包圍著，就如一個獨立的世界，真的金碧輝煌！進到屋內，先生帶我望過廣生鏡，之後又跟我講到驅魔和圖騰的事。為何我一直也口才了得，長大後又會玩雙刀這麼犀利，原來一切一切都是天意，因為我就是轉世驅魔師封雙刃‧沮頌。
「沮頌兄弟，在遠古時你助我造字，又幫我游說用字到其他民族。所以我地雖然遠古時係上司下屬，但同時都係好兄弟。」
「多謝你啊先生，其實今次阿公叫我做野，我睇下有無計幫你搵到邊個落
order。」
「唔需要喇，我知道係伏羲圖騰既人想對付我。佢地知道我係內地有保鏢，今次黎香港開會知道我係同風軍師兩個，所以先搵香港既社團埋伏我。」
「哦。。。原來係伏羲圖騰姓羸果班人。」
「好喇沮頌，以後就留係我身邊辦事，唔好再番去喇。」
我感激到差點流下男兒淚，繼續說：
「先生。。。我只係一個爛仔，今日你都咁對我。。。」
「言重喇，沮頌你家中有幾人啊？」
「無。。。我自細係保良局大。好細個已經跟左大佬，住係阿公安排俾我既地方。」
「咁就簡單，以後係香港就住係我家，呢到以後就係你屋企。」
「多謝你啊先生。。。我以後一定會好好幫你手，赴湯蹈火，在所不辭！」
就這樣我便一直留在先生身邊做他的助理。先生果然如我所料，是一個行俠仗義，到處幫助百姓，斬妖除魔，真是天下難得一見的好官。
可惜好景不常，伏羲圖騰的羸氏兄弟卻處處迫害，始終被逼退來香港。幸好當時有先生的一位大哥，就是醉武佛‧大撓。
我一直回憶起以前的事，享受著眼前這碗公仔麵。突然先生走來跟我說：
「沮頌又諗起以前啊？哈。」
「哈哈，真係無野逃得過先生你既法眼。」
「其實我等被羸氏兄弟陷害洗黑錢，幸好有大哥幫忙，我等先順利番黎香
港。」
「當時大哥仗義疏財，而且仲親自送我地到深圳，擔心我地會再被刺殺。」
「所以我一直都好想請大哥番黎做我地圖騰之首，方可報答佢既恩惠。」
「係呢先生，最近有消息話大哥放監未啊？」
「當時我一知道大哥被陷害判入獄山西，就聯絡左我一個兄弟皋陶，人送外號大理狼。佢而家正係山西當一個監獄領導，我一直都有托佢幫我照顧大哥。最近收到消息，大哥仲有一個月左右便釋放。」
「咁就好喇，原來先生早就安排好曬。」
「嗯，係你今次深圳之行時，軍師同我都正在苦惱。」
「係到煩緊聚義五谷夫‧周后稷同田畯太‧雍父既事啊？」
「唔單止，最近佢地仲邀請到地藏獸‧昆吾入伙，我等豈能放過如此良才？」
「啊，咁真係唔易搞掂。係喇先生，你有聽過西貢萬年街既和氏兄弟嗎？」
「你指既係秋豐監‧和仲同冬淵監‧和叔兩兄弟？」
「無錯，佢地兩兄弟本身捕魚為生，後來搞埋海鮮酒樓。深夜之後佢地兩個仲經常出海幫漁民捉水鬼，所以打水戰更加頂瓜瓜！」
「好啊，若然有埋和氏兄弟入伙，就可以增添水軍以備水戰。」
「先生，大鴻好似對煮野食都好有心得，不如今次等我同佢一齊出去游說，一定可以帶和氏兄弟番黎入伙！」
「好！有你同大鴻一齊出去，我絕對放心。」