<<現代驅魔文獻>>: 第一百零八章：驕雄蚩尤世無比　豪注賭局買蒼生

第一百零八章：驕雄蚩尤世無比　豪注賭局買蒼生

（蚩尤篇）二零一五年十一月二日凌晨一時正，貌似型格黃宗澤的我，正在脫去身上的衣服。在赤柱望海的五千尺別墅內，看著床上36c、24、35的古銅色模特級尤物的美女正在誘我上床，對於三十多、四十歲血氣剛烈的我，再加上酒精助燃，下身的衝動已按奈不住這一夜激情。。。

正想一親她的肉體時，我的腦袋裡突然浮起一幫人在鎖羅盆村，圍在一起像進行什麼邪教儀式。地上中央有一個面具、一個火把、一個煙壺、血紅色的楓葉，一個女人把煙壺打開後，一陣怨怒聲，煙霧隨之籠罩了整條鎖羅盆村。。。

我醒了，我是遠古九黎三苗聯盟的盟主，魔祖蚩尤。

床上的美女尖叫：
「呀！你對眼變左紅色！What the fuck are you！」





繼續將她按在我床上，微笑地回答說：
「唔，係，人。」

我張開嘴巴，並顯露慢慢伸長的獠牙。。。前所未有的飢餓感，一湧而來！不過十五分鐘，我已將她完全進食。留下了十隻手指骨，找來了一條啡色的頸繩將他們穿起來，並戴在頸上。

換上黑色民族風的線衫，白色的麻質吊腳長褲，配上人骨項鍊，這才像是上古「戰神蚩尤」吧。

我點燃著Ramon雪茄，濃郁的味道令我更沉醉。隨手倒起一杯Grey Goose的伏特加，播著古典的西洋音樂。





一個小時過去了，蚩美芙、蚩安洛、蚩拉比單、蚩埃力格、蚩沙克、蚩西迪、蚩麥基和蚩麗雅終於來到我赤柱別墅。他們同聲微鞠躬地說：
「參見魔祖。」

我笑說：
「而家唔係上古，唔洗咁多禮節，坐。Grey Goose Vodka，大家自己攞杯，當自己屋企得喇。」

我們一起坐在別墅的私人泳池，欣賞住浪濤聲。蚩安洛先說：
「魔祖，現在我們是否先攻下。。。」

她話還未說完我已示意停止，凝視住她藍色的瞳孔，輕輕掃過她金色的長髮，蚩安洛有點不知所措地說：




「魔祖。。。」

我微笑地說：
「原來安洛你係可以咁靚，人美心善，點解你個腦只係諗住我地要去打仗？我好奇想問下你地，黎左人間咁耐，日常係點生活？番工放工？」

蚩西迪回答說：
「殺個人，就有野食，有錢洗。。。最緊要係幫美芙姐姐集齊聖物，令魔祖復活。」

有些人點頭，有些人默不作聲，我說：
「殺個人對你地黎講就係咁隨意既事，難怪人地覺得惡魔就係邪惡。你地一定唔知咩叫資本主義商業社會。就係今日擁有錢既人可以控制物價，就可以控制人類既生活，甚至俾意見或者影響國家既政策決定。」

我抽口雪茄，繼續說：
「商業世界無永遠既朋友，亦都無永遠既敵人，只有利益。俾到適當既利益對方，大撓佢地都可以係我地既朋友。」

蚩美芙說：




「魔祖，大撓佢地而家係水浚南山。你係咪想見下佢？」

「美芙幾時都知道我心意，你安排下聽日去南山睇日落。」

「知道魔祖。」

我把伏特加清杯了，說：
「咁你地行先，麗雅、安洛你兩個留低。」

他們離開後，我命安洛先幫我處理睡房的血跡和吃剩的屍體。麗雅跟我坐在泳池旁，我為她也倒上一杯酒，說：
「麗雅，我地幾千年無見，你好似無咩野想同我講。」

麗雅一飲而盡，說：
「魔祖。。。我。。。」





我單手握住她的手，說：
「唔洗答我。我愛你，但我從你眼神睇得出，你都愛我，同時都有另一個愛既人。我都識佢？」

麗雅眼中落下淚水，說：
「對不起。。。」

我幫她擦走淚水，微笑地說：
「你可能一直以為我同你當年成親，係為左魔猿一族既結盟，呢個係事實。但結盟既事，比起『我愛你』三個字，更加係nothing。」

她想開口時，我繼續說：
「我地九黎三苗既人講求自由戀愛，唔同班中原人講門當戶對、媒妁之言。既然你心目中有愛既人，應該慢慢由心去選擇清楚。」

「魔祖。。。」

「愛係一件好神聖既事，你既幸福，就係我既依歸。痛楚，留俾我。」





話畢，我抓起麗雅的手，解除了我們無名指上的「貞蛇烙記」，說：
「麗雅，以後你自由喇。你行先，我同安洛仲有野講。」

麗雅不忍地抱緊我哭出來，我慢慢地把她推開，親吻她的額頭一下說：
「乖。」

麗雅離開後，蚩安洛前來跟我說：
「魔祖，為什麼你要讓雅后離開？」

我微笑地回答說：
「當一個人唔可以擁有既時候，唯一可以做既，就係令佢唔好忘記。」

我把伏特加一乾而盡，笑說：
「我有一個老朋友想見，你幫我約『年少』出黎。」





她點頭地回答說：
「知道魔祖。」

「仲有，你以後留低係到住，幫我手睇實班兄弟。」

「是，魔祖有沒有兄弟想見面？」

「蚩馬可、蚩博、蚩鈕，我想睇下佢地個心究竟係咪我到。」

「馬可跟孫巢的關係不錯，之前也不時暗中阻撓我們幫魔祖復活。是不是要將他們執行族法？」

「咁有趣既事情，我想同佢地了解下先。」

我拉起安洛的手到客廳，她的面紅起來，我為她也倒滿伏特加，說：
「安洛，今晚要做既野都做曬。不如我地傾下計，你講下比我聽你呢幾千年黎係點過啊。」

安洛尷尬地跟我足夜長談，細訴她的幾千年生活細節，與其他惡魔的日子又如何。。。

第二天下午三時正，我只找了蚩美芙上我的遊艇來到大嶼山。到達有「水浚南山」之稱的梅窩，四處也張燈結彩，南山旗幟飄揚，聲勢的確在香港一時無兩。

我讓蚩美芙在遊艇等我，根據她給我的資訊，一個人先來碼頭酒吧。海風吹著我的黑色長身麻質素外套，一身民族風的打扮配上名牌波鞋也沒有違和感。

看見有「南山牌」的手工啤，試過幾口後，向住熟悉的面孔說：
「上古有杜康、儀狄造酒，今日呢樽南山啤好好。老闆，話你唔係再世儀狄都無人信，哈哈。」

儀狄笑說：
「靚仔真係識講笑，鍾意飲既整多支啊。」

此時又來了一個熟悉的面孔走進酒吧，跟儀狄說：
「岩岩幫大哥執義雲廳堆文件一身汗，整支啤飲下解渴先。」

儀狄遞上南山啤，說：
「黎啦！大哥啲辛苦野係得子契兄弟你先搞得掂。」

幾句笑話後，子契留意到，跟我笑說：
「靚仔，估唔到同你撞鞋，你對純白色Air Jordan同我同款喎。」

我也笑說：
「咁咪證明我地都好有緣啊。見你手臂有力，睇黎有練下槍棒。」

「咁你都知，睇黎你都係學武既人。」

「我比較鍾意劍多啲，哈哈。」

「岩曬，我地有個兄弟又係好鍾意武劍，有機會可以介紹你識。」

「哈哈哈哈，實有機會。」

幾番交談後，我走到華記飯店坐下。隨意點了兩道海鮮，看見和仲、和叔正在推著魚車過來，伯高、葆江接過後，和仲說：
「軍師有令，基金會的基金經理會過來跟軍師、羸大官人和孫大公子開會。所以今晚安排好晚宴，送去義雲廳。」

伯高說：
「得令。大哥呢？佢唔一齊開會咩？」

「大哥在銀礦灣渡假酒店的餐廳寫日記啊，所以沒有兄弟敢打擾他。」

葆江也說：
「咁今晚大哥唔去開會，我地就唔洗預備魚啦。我諗大哥今日都係想一個人架喇。」

和仲笑說：
「哈哈，每次大哥寫日記就會變獨行俠啦。」

我埋單後，走過沙灘，看見羲仲、羲叔在操練水軍游泳。東灣沙灘那邊，英招、太山也在操練步兵的相撲術，有板有眼，看來大撓帶領的南山已日漸成形。

黃昏五時了，來到銀礦灣渡假酒店，門前露天的地方便是屬於酒店的餐廳。我點起雪茄，走向這熟悉的老朋友大撓面前，看見他的座位放著一壇花雕酒，他的習性果然幾千年來也沒有變。我向他展現親切的微笑，他也向我報以微笑，說：
「請問這位先生，有事找我？」

我自動坐下，點了一杯伏特加，回答說：
「老朋友重聚，傾下計，你唔高興咩？」

「老朋友？」

「天下大亂，人間怨氣，自然你個老朋友就要番黎做救世者啦。」

大撓嚴肅起來，說：
「魔祖蚩尤，口出狂言，敢妄稱自己作救世者。」

我吹了一個雪茄煙圈，笑說：
「大撓，你知唔知點解我叫尤？」

他沒有回答，我喝口伏特加，繼續說：
「尤，可以解做特別多、特別大，亦可以解作怨恨、過失。而我，就係因為人間有特別大既怨恨、過錯既時候就順天而生，要改變呢個世界，拯救人間既救世者。」

「你是魔祖，生來就是妖魔之始祖。正邪對立，是上天陰陽定律。」

我笑了笑，又抽了一口雪茄，說：
「你知唔知道我今世轉生，係一個點樣既前半生？」

「蚩尤，你想說什麼。」

「三十八年前，我係一個好窮既家庭出世，住係彩虹村。母親做洗碗，父親做跟車，收工番黎飲大兩杯，就對我地拳打腳踢。直到我十六歲果年，母親留低一封遺書就跳樓自殺。無幾耐，我趁父親有晚飲醉就推左佢落樓，變成意外死亡。我接收左批保險金之後，就開始創業打江山。」

「你真是毫無人性的魔鬼！」

我笑了笑，說：
「搞清楚先，我係順應大自然而生既產物。上古時候開始既我，就係無父無母。我係無善惡是非既概念，我既出世就係為左呢個世界應劫，我就係戰爭。人對我黎講，只係大自然界其中一種生物，有人犯錯我就要糾正。哪怕，係殺左佢。」

我喝一口伏特加，微笑地說：
「哪怕滅世，都係一個善意。」

大撓搖著頭，但我知道他正在嘗試讀取我的說話。我抽口雪茄，喝口伏特加，繼續說：
「之後，我創業咩人都遇過，黑社會既欺壓，奸商既詐騙，所謂老婆、兄弟、拍檔既出賣。經過左咁多野，公司今日市值過十億。我以為上天叫做俾我苦盡甘來，但最後因為我支持過佔中而被大陸禁境，好多大陸既生意一落千丈，今日好似個股價又跌左幾蚊。」

大撓還想說話時，我暫停了他繼續說：
「大撓，我同你都係被國家拋棄既孤兒，因為我清楚南山每個人既遭遇。同是天涯淪落人，我地身為國家既子民，竟然荒謬到連自己國家都番唔到，但仲要愛國？」

大撓搖頭地說：
「虛榮的人，只顧及自己的名字；光榮的人，是重視國家的發展。你不配當一個中華兒女。」

我大笑起來：
「笑話，你既南山又有幾多個愛國？又有幾多個聽你既招安呢？」

「蚩尤不愧為蚩尤，你也猜到招安。」

「大撓幾千年黎都係咁，好聽啲就擇善固執，唔好聽就係盲尊儒術。你係都要殺我，係都要同美芙割蓆。你心裡面，真係唔認同我地九黎三苗既民主部落選舉制？愛既人，因為理念唔同就唔想一齊？你問心啦。」

「蚩尤，你休要迷惑我！也許，活著永遠不能看到太平盛世，但是我卻因為能守護老百姓，而無愧天地道義。」

「天地道義？黃帝為左一己私利，結束傳統部落制。全國群起反抗，你唔係唔記得『阪泉之戰』啊麻？」

「炎帝當初只是不明天意，此戰過後亦全力護航，率領群臣武將為黃帝誅滅你蚩尤。」

「赤炎係我親大哥一樣，佢就係敗係自己既婦人之仁。如果佢一早聽我講同九黎三苗合力，早就殺左黃帝呢個狗賊。」

「蚩尤，看來你我一戰，是在所難免。」

我把伏特加清杯，笑說：
「未係時候，今日黎我唔係想開戰，反而想睇下大撓你有幾大能耐。有無興趣賭一局？」

大撓疑惑地說：
「賭什麼？」

「若然天係有道義既，我就同你以天為誓，明年春暖花開月既十三號，你成功招安，做到好官解救百姓既，我從此消失人間，帶領惡魔同九黎三苗歸順伏羲朝廷。」

「如果咱們不能招安呢？」

「我會正式同你開戰，結束中國既一切，重建華夏部落。」

大撓嚴肅起憂國憂民的眼神，我笑著說：
「大撓，你既眼神真係同我太似，我好想你既血可以沾係我把劍上面，等我體會你既堅持。」

「好，我答應你這賭局。我深信蒼天有道，如果招安得成，期望下年吃酒之時，跟你吃的，更是太平酒。」

「一言為定！出年三月十三號，再決定戰場見，定你南山見。」

當我回到碼頭時，蚩美芙在遊艇上跟我說：
「魔祖，已經同大撓傾好左？」

「算係啦，就睇下出年3月大撓招安成功與否。美芙，雖然你係我軍師，但我早就當左你係我個妹。我都想你有情人終成眷熟。」

蚩美芙有點驚訝，說：
「我唔係太明魔祖既意思。。。」

「你同大撓既事，認為我唔知？哈哈。不過如果佢成功招安到都好，你要盡快同佢搵個地方歸隱。始終而家呢個時世，唔似上古咁簡單。」

這時蚩美芙也沒有話再說，跟我一樣只有杯中物為自己解愁。。。