我係一個糖水仔。: 1
「覆返你一次呀。兩個心太軟，一個配云尼拿雪糕，另一個配朱古力雪糕。」
「無錯。」
「多謝哂，幫你收返個menu呀。仲有，心太軟大概要等十至十五分鍾。」
又是一個忙碌的晚上，整晚就是落單、執枱、抹枱、出甜品、招呼客人和派『飛仔』。雖然忙碌，但仍然樂在其中。皆因每一次把甜品擺到客人面前，也會有一種期待感。
「哇，好靚呀。」
「唔好食住呀！影張相先！」
雖然甜品不是我造的，但看到客人有如此絕全的反應，也會為在熱哄哄的廚房裡製作甜品的兩位大廚感到一點點喜悅。
啊。差了忘記了自我介紹。我叫阿然，現在是一個全職的打工仔，日頭一份寫字樓文職，夜晚一份糖水鋪樓面。以前讀書算是中規中矩，會考有十七分，順利原校升上中六。然而高不成低不就的成績實在有點尷尬，升上中六後實在很大壓力，死讀死背在學校還能蒙混過關，可惜在公開試卻落得慘痛的收場。
不用多說，大學當然升不了，卻選了升讀副學士。縱然有多一個機會、途徑去考上大學，卻在non-jupas的黑箱作業中失敗了。
家中不是特別富有，爸爸也堅持要我為自己所選的負責，所以我借了政府的錢來完成副學士課程。結果？就是債台高築。
無辦法。
『路係自己揀既，仆街就唔好怨。』
唯有打兩份工，快快手還哂政府條數佢，再作打算。
寫字樓的工作，就是對著電腦屏幕，十隻手指不斷拍打鍵盤，沉悶到極。公司裡的女同事，全都是上了年紀的師奶，我連在茶水間多留一會吹多兩嘴也不想。
日頭一份工，夜晚一份工，想擠一點時間出來娛樂一下真的很難。
不過，當你以為我的生活真的如此爛透之時，我要告訴你一個鐵一般的事實。
世上還有很好的僱主。
沒錯，就是糖水鋪的僱主，也是我之前淺淺地提過的兩位大廚。
還記得我是透過勞工處的網站找到這份工作，也許是天注定，他們剛剛把招聘的資料擺上去網站，坐在電腦前的我就看到了。隨意地就撥了個電話去，說了幾句就叫我去見一見面。
然後，就聘請了我。
在這小店裡，就是充滿了人情味。
「窩夫上面要唔要加cream呀？想配咩生果呀？」老闆娘問我。
「要呀。我自己黎得架啦。」我靦腆的笑著回答。
「唔洗笑得咁開心。喱度加埋老闆娘服侍，今晚份糧冇哂架啦。」她笑得比我更開懷。
「我地時不時都有宵夜食架，有時又會冇啦啦多左個心太軟添。」另一位老闆娘對我說。
又有得食，又有錢搵，你都咪話唔盞鬼。
呀！仲有，有時都要送下外賣，都有啲攰架。不過有時都有啲幾得意既客，有一次送十幾個糖水去一個單位度，當時適逄英超最後一輪，要返工既我當然冇得睇波啦，但送到去個單位既時候入面成班人都一齊睇緊波，果一刻既我，真係好空虛同寂寞。
可能果個比錢既客又真係睇得出我好慘，佢竟然同我講波，我地就係咁隔住個鐵閘講左成十幾分鍾，直到我還返錢比佢，加上電視又播返綠草如茵既賽場，我知道佢係時候關上家門趕我走。
「喂，不如一齊入黎睇波呀？」
「下，唔係掛？」
「黎啦。」佢打開左屋企既大門。
就係咁，我就半推半就咁入左去睇波，最後返到鋪頭竟然冇比人省，嘻。
今晚也不例外，又有客人叫外賣。
「阿然，幫手送一送外賣呀。」
「知道。」
老闆娘叫到，只好答應。我挽著裝著了兩碗楊枝甘露的膠袋，昂首闊步的踏出了店舖，走去糖水鋪附近的店樓。
「嗄 ... 嗄 ... 嗄 ...」我一步一步踏著石梯級，不斷的喘著氣。
想不到出來工作後，體能真的比以前差得多了。驀然回想起以前在球場上像個鐵人般不斷奔跑仍不會喘氣，與現在相比，真的不復當年勇。現在竟然被幾級樓梯難倒。
真是想咒罵那客人，才叫得兩碗平價甜湯，就要我花上那麼多的力氣，
！ 好不容易才撐過，終於到了五樓。
我輕輕按下門鈴，隔著木門幻想著究竟會是個怎樣的人打開門呢？
最好就是個有錢人，給多一點小費；
哎呀！住唐樓的大多也不太富有吧。
那麼，最好就是一個美女，養養眼也好 ...
「咔嚓。」說時遲那時快，門已經打開了。
「兩碗楊枝甘露，五十八蚊呀唔該。」嘖。就是個平平無奇的學生妹。既不會給小費，也不養眼。
「哦，等等 ... 」她想要把錢幣從錢包裡掏出來。
「呀！」忽然，有一把女聲在尖叫。
那位正想要付錢的女生馬上掉頭走開，木門又再關上了。
我對著那道木門，五樓又再變回一片死寂。
過了一分鐘，木門終於再次打開
「唔好意思呀。拿。」她把錢遞給我。
「係呢，岩岩做咩事呀？」嗯，人總是有點好奇心。
「哦，冇。我家姐切親手指咋嘛。」她一臉認真的回答。
「呀！我銀包袋左塊膠布，比你家姐呀。」我把一張印有海綿寶寶圖案的膠布遞給她。
「呃 ... 唔該。」她有點愕然。
「五十六蚊收齊啦，多謝哂，下次再幫襯過呀。」
做我地喱啲服務性行業，就係要好態度架啦，今次咁既服務，無得頂啦掛。返到鋪頭一定要邀一邀功。