欠債還情，天公地道: 第一章　掙開眼

「我係邊？」
 
我打開眼睛，一道強光射過黎，令我視線變得好濛糊。
 
「恭喜晒李小姐，仔黎架！」
 
正當我聽到呢句說話的同時，有個男人拎起左我條腿，狠狠咁向我的屁股抽打左一下。
 
「嘩，屌你咩！」我大叫出來，但我聽唔到我罵既粗口，只聽到「呀，呀呀呀」幾個無意義的聲音係我口中跌出黎。
 




聲音伴隨著我既哭聲跑出黎。
 
哭泣聲絕無意義，
 
我竟然變左做個小BABY。
 
係小BABY !!!!!!
 
我望下自己D手手腳腳，但我睇得好唔清楚，可能係我既視力發展仲未成形。
 




我無驚，有咩好驚？卡夫卡都變左隻甲蟲，我話晒都變返個人，有咩要驚？
 
我相信我係投左胎，所以變返做個小BABY，而家重新比人痾返出黎。
 
正當我係度理解緊成件事既時候，條八婆姑娘就抱起左我，將我拎到去生我果位女士面前。
 
我有理由相信佢就係我老母。
 
因為佢將我隊到好埋我老母面前，所以我都可以將我老母既容顏睇得好清楚。
 




屌！你！老！味！
 
佢咪係果條港女VICKY ？
 
我黎左幾多年後呀大佬？
人地奇幻小說時空穿越身份改變，起碼都講緊幾百年前或者幾百年後丫！
 
以條港女既容貌黎睇，我最多都係去左一年後既世界！
 
而家無人排隊投胎架？定連地府都玩中地融合，咩都中國化，連投胎都求撚其其咁放我出世呀？
 
我一路諗，愈諗就愈眼訓。
 
我明既，作為一個小BABY，能量係好有限。
 




既然人生先岩岩開始，我又洗咩咁心急呢？
 
訓下先啦，柒頭。