再一次愛上沒有放下的舊情人: 二十四

我望住佢地擁抱，震驚到連聲都唔敢出，我望住Karen，佢亦都望住我，似乎準備解釋

「呀成，依個係我舅父」Karen說，表情似乎怕我誤會

舅父？你老母呀當我傻架，你攬完其他男人同我講話係你舅父，我都未見過我班親戚會攬自己舅父

我攬完個熟女話佢係我親戚你會唔會信呀

「舅父你好」我無將我心所想既講出黎，勉強扮到咩事都無





「佢係我男朋友呀成，佢對我好好架」Karen滿面幸福地說

等等先，如果佢真係比帽我戴，咁佢又唔洗話我係佢男朋友呀

但始終，我都係半信半疑，我唔知佢過去個段時間佢識左啲咩人

「係呢，你地幾時開始架」舅父問道

「我地拍左拖年幾架啦」Karen連忙幫忙解答





傾左差唔多成個鐘，我都無咩出聲，怕講多錯多，得罪佢，搞到連份工都無埋

只係臨離開之前同舅父講左聲再見

離開之後，我都無主動同Karen傾計，佢似乎見我咁靜，都主動打開話題，希望打破沉默

「你覺得舅父份人點呀？」

「我覺得佢幾好呀，份人幾友善」





「咁點解你要仇視佢既，舅父岩岩話你唔友善咁望住佢」

我無出聲，依舊沉默，我唔知道應唔應該講我諗咩，怕講左會傷害到佢

「其實...你係咪懷疑我同佢既關係」Karen咁大擔既提問，令我不知所措

「我...」我被問到口啞啞

「姐係你唔信我啦」只見佢雙眼通紅，開始唔出聲

「點解你唔信我，我以為你好似以前咁咩事都好，你都會信我」佢放下腳步，停係到

「我...我以為你同佢係情侶」