再一次愛上沒有放下的舊情人: 十一

Karen帶住我穿過大街，走入昏暗既巷仔，眼前見到既係一間小型韓國餐廳，

「為左懲罰你咁遲先搵到我，我就罰你陪我食韓國野」

「唔好啦，我最怕食辣野...」無錯，我係唔食得辣，所以有辣野既地方對我黎講簡直係地獄，而Karen同我即岩岩相反，佢好食得辣

「唔怕啦唔怕啦，都有唔辣架嘛，入去啦」佢拉住我隻手入去

坐低無耐，佢已經諗好曬叫咩，唔知係咪我地分開左依段時間，由於韓國文化入侵香港既關係，佢同一般既港女一樣變到好崇韓





「我介紹你啦，依個鐵板炒牛柳，同埋韓式壽司都唔辣架，仲有依個呀，炒雜菜，都好好食架」

「你成日食架？」我說，見住Karen好似專家咁介紹餐牌上既食物，我覺得佢對依個國家既文化好了解

「我？係呀，之前同班同事成日黎食既」

唔怪得佢岩岩連map都唔洗睇就知道依個咁隱蔽既地方啦，不過講番轉頭，雖然佢話就話叫我陪佢食，但佢都幫我睇曬我可以食既野，咁細心既女人真係唔話得

過左無幾耐，野食都黎齊，當然除左佢介紹比我個三樣之外，仲有炒年糕，豆腐辣湯等等既辣野





「試下啦」Karen未講完已經將我個碗裝到滿曬，為左唔想佢失望，我唯有硬住頭皮食，誰不知食落去又幾可口，唔似想像中咁辣

尤其係炒年糕，辣中帶甜，害得我想食多幾舊

「喂呀，就黎比你食曬啦」Karen見我食唔停說，雖然佢口就想我停，但佢唔單止無阻止我，反而只係甜絲絲咁望住我笑，女人就係依種口裡說不既人

「一陣再叫過囉最多」Karen見我咁講，並無再出聲，只係同我一齊食野

過多一個鐘，我地終於食曬檯面既野，依個時候，我發現原本坐無虛席既餐廳早已經人去樓空，淨番既只有兩個員工收拾檯面





「埋單呀」我廢事阻住人地收工，便示意老闆收錢

「多謝你六百七十元呀」聽到個銀碼我眼都突埋，我以為佢拎錯人地張單比我地，我再望下張單，每樣野都八十幾至一百幾十不等

仆街，原來咁貴，正當我望住張單遊緊魂既時候，Karen話

「你無錢呀？」我聽到佢比說話我聽，我亦都無理佢，好霸業咁比左張金牛老闆

點知個老闆竟然用唔正宗既廣東話同我講：「我地依到唔收一千元架」

咁煩架，我銀包得一張一千元，咁我唯有比張信用卡佢，點知佢又同我講

「先生，依張係...」我抬起頭，屌原來比左張提款卡佢，原來我無帶信用卡出街，好彩間鋪無咩人，唔係我又要搵個窿塞自己落去

我好無助咁望住Karen，佢無講咩，只係笑笑口咁望住我，然後講：「等我比住先啦」講完就比左七張一百元老闆





出到去，我都唔敢講野，因為我好無面，點解比個錢都會搞到咁

行到咁上下，Karen問左個好意外既問題...

「岩岩係地鐵站個個女仔係咪鐘意你」