再一次愛上沒有放下的舊情人: 六

面對住依啲超現實場面，我覺得好無助，你話女仔喊，我可以安慰佢，比老闆鬧，我都可以當聽唔到

仆佢個街，撞鬼我可以做咩，咩都做唔到呀！！

依個時候，有隻手放左係我膊頭，我唔敢寧轉面，我好怕轉身個陣見到隻好似貞子咁既樣既鬼

「係咪好驚呢？」聲音明顯係屬於一個女性扮鬼叫，我依然無擰轉面

依個時候，個個Karen從後攬住我，然後細細聲講左句：「對唔住呀」





我轉身，眼前既並唔係咩貞子，亦都唔係著住白衫既女鬼，我眼前既係岩岩入左廁所既Karen

我咩都無講，只係即刻攬住佢，而佢亦都無拒絕我

「其實要講對唔住既係我，一直唔了解你，唔清楚你需要咩既係我，對唔住」

Karen依舊無出聲，但我感覺到我心口因為佢既眼淚濕曬

「唔好喊啦，我依家咪係你面前囉」我嘗試安慰佢，我拖住佢隻手，將佢帶離廁所，帶到廳中間





「你岩岩唔係入左廁所既咩，點解我撞入去個陣唔見你既」我摸住岩岩撞到而起左既瘤

「你都傻既，我一早出左黎啦，出到黎你仲發緊呆，我咪企埋一邊囉，不過見你咁緊張我，我覺得你好蠢，咪無叫你囉」

「知我擔心你仲咁」我擰轉身扮嬲，佢見我咁亦都知行去我面前

「唔好嬲啦傻瓜，我錫番你啦好無，我知錯啦」佢扭住耳仔道歉，我相信，任何一個男性見到都招架不住

「好啦好啦，好啲錫」講完我合埋眼，等待佢既吻，而佢都好識做，錫左我面一下





「拿，錫左啦，唔準嬲架」

「知道啦，嗯...」

Karen見我有野想講，就搶住問我想講咩：「你有野想講呀」

「其實呢，我以前真係覺得自己配你唔起，你讀書又好，又靚，又有才華，其實你鐘意我咩呀」我問

「哈哈，你連自己有咩優點都唔知既咩，我鐘意你對我夠好囉，你無搵我個段時間，我都有同過兩二個男仔拍拖

佢地唔係貪我屋企啲錢就係對我玩玩下咁，只有你一個肯付出一切愛我，加上你份人風趣，比我好多歡樂，同你一齊既時候係最開心架」

「如果呢，我仲鐘意你，你會唔會同番我一齊呀？」我問

「唔得唔得，如果我咁就應承你，你咪會唔珍惜囉」





的確，以前既我真係唔珍惜佢，純粹希望自己開心，忽略左佢感受

「咁你點先會同我一齊」

「嘻，我諗下先啦，我要食埋啲野先啦」講完佢行去飯檯享受佢既食物

「啲野凍曬啦，不如我煮個麵你食啦」

「唔洗啦，食得唔好曬嘛，嘻嘻」Karen天真地說

我無講咩，只係行埋去，錫左一下佢額頭，然後就坐係佢身邊，望住佢食野既樣，時間就好似番番去五年前咁