超靈視雜誌社: 二章－靈魂証人（４）
翌日早上，我因為昨晚睡得不好而上班遲到。不過來到雜誌社後發現只有紡瑩一人就沒有所謂了。社長依然是神出鬼沒；而杜霜虹女王則保持一貫遲到一小時的作風，就好像她的王國和我們有時差一般。
「早晨阿翔。」紡瑩向我揮手說：「做乜一朝早好似冇咩精神咁既？」
「唔習慣星期六咁早起身啫……」
「咁就要食返啲甜野補充一下糖份喇！」紡瑩舉起了手上的膠叉說。
我望著她桌上的早餐，問：「咩黎架？」
「椰絲炸香蕉！好好味架。」
「呢樣係妳既早餐？」
不愧是甜食魔人。
「妳快啲食埋去唔好俾霜姐見到啊。陣間又話我地返工唔做正經野。」
「咩喎，我已經總結晒尋日既資料，同埋 plan 好左跟住做乜野喇。」
紡瑩說，現在我們有三方面的線索可以調查：
第一是繼續訪問陳家仁，希望可以取得其他有用的資料。不過醫院的探訪時間是下午五點開始，在白天我們可以先做別的事情。
第二個線索當然是 Samantha。如果可以直接聯絡到她，毫無疑問效果一定比起我們亂猜一通的好。始終她是陳家仁證言裡面的當事人。但是，紡瑩補充說像我們這種三流的靈異雜誌幾乎肯定 Samantha 不會理會，所以優先度排在最後。對於她這樣坦白我也嚇了一跳，同時間亦感到很困惑。
最後一個線索就是我手上的戒指了。昨晚看見 Samantha 的時候戒指突然發光。假設這不是巧合的話，那麼一定是意味著什麼原因。
不過對於弦玥留給我的戒指，我還是半點都不理解。
「阿翔，社長話呢隻戒指係量子電腦，但其實量子電腦係乜野？」紡瑩問。
「我……都唔知道。」
「欸，你唔係讀電腦既咩？」
「我好肯定大學冇教過量子電腦。」
「咁社長有冇解釋過？其實佢應該最清楚。」
「冇呀……社長唔多願意講太多關於弦玥既事。」
「咁只好問一下霜姐姐啦。」
根據紡瑩的說法，《超靈視月刊》是一本同時兼顧「靈異」與「科學」的雜誌。主修社會科學的紡瑩比較熟識各地風俗、傳說，因此她負責「靈異」的部分。至於「科學」的部分通常都會交給女王處理。
過了半個小時，杜霜虹女王終於來到雜誌社上班了。於是我和紡瑩簡單地向她報告昨天採訪的結果，還有關於戒指發光的事情。
「翔既戒指突然發光呢……的確好有趣。」
這是女王聽完報告後的感想。
紡瑩問：「聽社長話，呢隻戒指係量子電腦。其實量子電腦係啲乜野，又有咩特別？」
「咁樣呀……作為前輩就等大姐姐教下你地啦。不過事先講明，你地聽書嗰陣唔可以恰眼訓，如果唔係……」
「一定唔會恰眼訓，我用人格擔保！」女王的話把我從睡眠不足的狀態下喚醒過來。
「你既人格呢……雖然我唔在乎，不過都算啦。」
接著女王從辦公桌的抽屜裡取出了一個一元硬幣，把它擲到空中後接住，問：「你地估下係『公』定『字』？」
「估錯會唔會罰架……」我戰戰兢兢地問。
「快啲估唔好講廢話。」
──「字」、「公」。
紡瑩和我各自猜了不同的結果。
「冇錯，擲銀仔既結果唔係『公』就係『字』。不過如果呢個唔係一蚊銀，而係好細小好細小既粒子，情況就唔同喇。」女王開始認真地解釋：「假設我而家拳頭入面係由一粒『光子』做既銀仔，你地又估下會係『公』定『字』？」
看見我和紡瑩沒有吭聲，女王續說：
「答案係，既係『公』，同時亦都係『字』。因為個銀仔係我擲出去嗰一刻就已經分裂成為兩個分別係『公』同埋『字』既銀仔。」
「魔術？」我問。
「唔係魔術，係量子力學。唔同狀態既量子可以同時存在一齊。大姐姐我再用電腦做例子啦。電腦既訊息係由『０』同埋『１』所組成。簡單黎講１個 bit 就係『０』或者『１』，同擲銀仔差唔多。」
「不過如果係量子電腦，１個 bit 就唔係『０』或者『１』咁簡單，而係既係『０』，同時亦都係『１』。呢樣係資訊工程黎講，翔你讀電腦應該知道係代表乜野？」
在暑假問我課堂的東西實在太卑鄙了。我把很努力把記憶翻出來，然後回答：
「係代表 entropy 變大，信息量變多……卦？」
「欸，有聽書喎。」女王感嘆地說。
但不是電腦科出生的紡瑩卻聽得一頭霧水，問：
「entropy 係乜野？」
聽到紡瑩的問題，女王又開始很耐心地解釋：
「entopy，中文係『熵』。原本係熱力學既名詞，係形容一樣野有幾混亂。而係資訊工程學方面，原則上信息既組合越混亂，佢裡面包含既內容就會越多。」
「唔明。」紡瑩開始失去耐性，不知道在哪裡掏出了棉花糖來吃。
「就好似妳返工成日玩 whatsapp，妳打英文都唔會用正統文法，而係夾雜住縮寫同埋火星文。因為咁樣打會短好多，快好多，以為我唔知道。但最重要既係，就算火星文睇起黎好混亂，但係佢表達既內容其實冇變。用少啲字去表達相同內容，即係每隻字既信息量會比起正統英文高。」
聽見女王的話隱含別的意思，紡瑩嚇得目瞪口呆。她的手原本快要把棉花糖放進口裡，現在亦停留在半空。
女王短短幾句話除了解釋到熵的意思，還同時借機會捉弄紡瑩，或許這也是「高信息量」的例子。不過女王沒有打算追究下去，繼續說：
「總之量子電腦係用極高熵既量子信息去做運算。就算係超級複雜既工作，量子電腦都可以好輕鬆咁處理。不過妳唔明都冇所謂，跟住落黎先係重點。」
到現在才開始說重點？我懷疑女王是不是故意把說話拖長，用來考驗我對抗睡魔的能力。
女王故弄玄虛地問：「你地知唔知有啲乜野係最複雜，最適合量子電腦去處理既？」
「女人既心。」我直觀地回答。
「哦，翔你都幾聰明喎。冇錯，就係人既『心』。有一種學說，指人既大腦其實係一個量子電腦，我地既靈魂其實係量子信息。如果係真既話，或者你手上既戒指會同靈體產生共鳴都唔出奇。」
「我明喇！」紡瑩被女王警告後變得精神奕奕，說：「即係因為 Samantha 殺死李俊旭，而李俊旭既冤魂一直纏住 Samantha，所以當 Samantha 行過阿翔身邊隻戒指就有反應喇！」
女王聽了後很滿足地說：「呢個假設唔錯，唔可以否定有呢個可能性。」
不，在這裡否定紡瑩的假設才叫做常識吧！不過我一早已經沒有期望過她們是正常人，所以還是算了。
可是如果相信弦玥的話，至少可以肯定戒指和她的 Etiäinen 有關係。即是戒指和靈魂互動這個假設或許不是想像中那樣離譜。說到底，我還是在靈異與常識中間掙扎。
「好喇，大姐姐既提示就去到呢度，之後既事就要靠你地自己喇。」
話還沒有說完，女王就已經挽著手袋離開了雜誌社。我不禁質疑，究竟她是為了什麼目的回來上班。
「不過都冇所謂啦，起碼而家多左啲頭緒，我地一齊去用戒指搵冤魂啦！」紡瑩興高采烈地說。
「妳好已經斷定左係 Samantha 殺死李俊旭咁……」
「咁樣得意啲嘛。」
不要因為有趣就把其他人殺死啊！這個孩子真可怕。
「但如果妳打算咁樣做，即係我地要搵 Samantha 做訪問架喇。妳又話佢唔會理我地，咁可以點？」
紡瑩一邊咬著棉花糖、一邊絞盡腦汁。然後她露出了和女王一樣邪惡的眼神，說：
「不如我地 send 匿名短訊俾佢，話『我已經知道左妳既秘密。如果唔想其他人知道妳同李俊旭之間既事，就即刻同我聯絡，嘿嘿嘿』。」
聽見紡瑩這番話，我瞬間明白為什麼其他人不願意和我們這種三流雜誌做採訪了。
但是看起來很有趣，所以我也沒有阻止她。反正這種垃圾短訊也不會有人回覆吧。或許紡瑩也只是貪求有趣才這樣做的，和女王一樣。
不過我沒有想過，午飯過後，竟然收到 Samantha 的回覆，要求今晚在尖沙咀的一間酒吧裡碰面。