因為"它" 遇見"她": 回家

(5)

我地行到去旺角地鐵站。

Krystal:"送到喱到得喇"
我:"唔得，夜麻麻好危險，要送到你去屋企門口"
Krystal:"哦…"

於是我地去左搭觀塘線，上到車我照舊企係門口側邊果d位，而krystal就企正係門口。





"下一站太子，The next sta…"

係太子站，成班飲醉酒嘅鬼佬跌跌撞撞咁行左上車，我驚佢地會撞親krystal，於是潛意識咁攬住左佢，再用背脊得住班鬼佬。我地塊面靠得好埋，大概只有幾cm嘅距離，我個心跳得好快，好想一啖錫落krystal到，但我冇咁嘅勇氣。

我地成程車都keep住喱個pose，唔知嘅人一定以為我地係情侶，可惜事與願違。

"下一站九龍塘，The next sta…"

Krystal:"落車喇"





落車之後我地好安靜，一定係佢覺得我抽左佢成程車水，覺得我同一般嘅鹹濕佬冇分別。

我:"對唔住呀，未問過你就…"
Krystal:"傻架你?"
我:"吓??"
Krystal:"喱次係第一次有人咁樣保護我，多…多謝你"

我實在太意外喇，比著第二d女仔一定話我抽佢地水，大嗌非禮。krystal真係一個好女仔，我同自己講，如果佢做左我女朋友，我一定會好好珍惜。

Krystal:"係呢，你對其他女仔係咪咁man架?"




我:"緊係唔係啦，淨係對你……"
Krystal:"對我咩呀?"
我:"er……"

"啜"

Krystal好突然咁錫左我塊面一下，跟住就好怕醜咁繼續行。餘下嘅路程我地都好沉默，但我feel到我地之間有d甜蜜嘅氛圍。慢慢咁到左佢屋企，但係係我面前嘅竟然係一幢豪宅。

Krystal:"我到喇"
我:"喱到係你屋企?"
Krystal:"係…係呀"
我:"哦……bye……bye"
Krystal:"阿臣……"

於是我頭也不回咁走左，係我搭緊小巴番屋企嘅時候，我好困惑，我唔知自己喱個讀唔成書，老豆老母又冇錢嘅死窮鬼襯唔襯得起krystal喱個千金小姐，我對喱段未開始嘅感情失去左信心。





跟住落泥果幾日我都冇去打波，冇去搵krystal，因為我唔知點樣面對佢，係佢面前我驚我抬唔起頭，我驚我糟蹋左佢。