<真人真事> - HKU的留學生活: O Camp

阿Ming, 


"明天請準時集合." 


- 組爸跟組媽上 


我望住嗰張帖咗係門口既字條，跟住先醒起原來聽日我要出席一個好重要既活動： 一個只係 for non-local 同 exchange 去既ocamp. 





自從我見識過我層樓搞既ocamp之後，我本身對嚟緊既ocamp已經冇太大既期望. 

徐此之外，我仲見到好多人係網上話ocamp入面啲組爸跟組媽點亂搞男女關係. 究竟，nonlocal 既ocamp又係點既一回事呢？ 

嗰晚我地組先係hall 既大堂會合，然後就跟大隊一同前往石塘咀熟食中心. 因為太多人既關係，我地既組爸就幫我地揀咗食呢間X記海鮮大牌檔. 

組爸："我地可以一路食野一路介紹一下自己. 咁我先啦. 我叫Penn, 係你地既組爸. 我係嚟自四川既，而且今年係我讀大學既第三年，亦即係我讀大學嘅最後一年. 我既主修係 civil engineering. 組媽，到你啦." 

組媽： "哦. 咁我係你地嘅組媽啦. 我係從台灣嚟嘅. 今年亦都係我讀大學既第三年. 不過我讀嗰科呢度都應該冇咩人會讀... 我既主修係中醫. 你呢？" 





今次論到坐在佢身旁嘅瑞士佬. 冇錯，就係法國佬既同房. 為咗方便大家記得佢，我都係叫佢做瑞士佬算啦.

除咗瑞士佬，仲有嚟自美國既馬丁，韓國既秀智，日本既佑二，上海既阿石，阿萍，和 Crystal. 

Crystal... 

當然，依個唔係我朝思暮想既Crystal. 況且，叫得Crystal嘅其實周街都係. 

但每當我聽到Crystal呢個名既時候，其實心裡面唔多唔少都會有啲揪住揪住咁嘅感覺.

食完晩飯之後，我地就返hall 同其他組玩埋啲好無聊既遊戲. 每組都要派兩個人去出戰. 其中一個要揹住另外一個，然後就好似騎士咁要用手上既紙製長矛去挑起對方頂帽.   

我嗰時真係冇咩興趣去玩啲咁既遊戲. 所以我就同其他人一樣坐咗係度望住佢地玩. 

唔知點解，我不時都會偷望Crystal. 雖然佢生得有啲似後生時既劉嘉玲，但我肯定佢唔係我杯茶. 一來我本身唔係好識講國語，二來我真係對中國人冇咩好感. 

先唔好講咩中港矛盾，就憑我係外國咁多年，其實都見識唔少佢地既文化質素. 咁當然，唔係全部人都係咁，但大部分俾我既印象都真係幾負面下. 

講返Ocamp, 其實嗰晚完咗遊戲之後就要到第二日先再有活動. 但由於我一早報咗去南丫島既一日團，所以我要等到夜晩先可以會合佢地.

~ 第二天～ 

佢地似乎仲未返到宿舍... 





咁我開頭諗住沖完涼再換定衫等佢地既. 但當我摟著條毛巾由廁所行出去走廊既時侯，組媽已經企咗係門口度準備敲我房門. 

組媽望着我嗰條巳經濕透了的毛巾，然後再望一望我既眼神，跟住説：" 啊...我地組會係三樓度一齊食晚飯. 你換好衫就落嚟啦." 

落到去三樓，已經見到所有組員都圍埋哂係張枱度等開飯. 可能因為奔波咗成日，佢地一個二個睇起嚟都好似好攰咁. 

雖然啲餸菜唔係好豐富，但用心煮既野點都係好食嘅. 我地一路食就一路分享我地今日經歴過既野. 我就講下今日點品嚐南丫島既海鮮同睇美麗既日落，而佢地就講下今日點遊港九兼去埋石澳燒烤. 

吃完晩飯後，我地繼續坐咗係張sofa度吹水. 忽然之間，上海Crystal 竟然主動埋嚟同我傾計.

上海Crystal: "我記得你之前講過話你讀經濟. 咁我早排上網睇過一條數學題係關於經濟㗎，不過我唔係好識搭，唔知你可唔可以幫我睇下呢？" 

然後組爸笑道："咁你未幫吓人囉." 

我: "好呀. 不過我唔知識唔識搭㗎."

Crystal 即刻拿起筆同紙，然後畫咗條題目出嚟. 我好用心咁嘗試去答條題目. 而Crystal見我咁專住去望條題目，佢自己都想試下solve埋一份. 

我地肩並肩咁坐埋一齊，而Crystal 為咗方便閲讀我寫既答案，佢個頭亦慢慢地靠向我嗰邊. 

她長長的秀髮不經意地放在我的肩膀上. 而從她的秀髮中，我可以聞到一陣淡淡的清香. 散發出來的香氣已經令到我想不起剛才想寫既答案. 

我現在滿腦子都是幻想著她剛剛出浴時的情景. 苗條的身驅，堅挻的胸部，加上微微翹起的臀部，這些都足已令我沉醉於思想當中. 

啪啪啪... 

組爸拍咗我膊頭幾下，然後說道："喂! 你諗咩諗到入哂神呀? Crystal 叫咗你幾聲都聽唔到." 

Crystal 從我手上拿走枝鉛筆，笑道："其實呢啲都唔係咩作業，唔使太認真㗎." 





說完之後，Crystal 就用枝鉛筆填返我之前末寫完既答案. 

Crystal: "唔該哂你呀，阿Ming. 組爸，組媽，今日玩咗成日有啲攰. 我都係返房瞓先." 

組爸："好呀. 咁大家早啲休息，不過記住聽日我地去飲早茶喎."

～第三天～ 

貴為大學文化之一，同組員飲早茶都必然的. 於是, 我地組晨咁早就出發去到位於堅尼地城既點心鋪度飲早茶. 

組爸：" 你地知唔知有邊個香港藝人以前係成日去幫嚫呢間點心鋪？" 

我："有幾出名先？" 

組爸："佢係K歌之王嚟嘅，你話佢有幾紅啦." 





講到呢度，賣點心個阿嬸已經揮哂手叫我地埋位坐. 由於呢間點心鋪並不是太大，所以我地咁多人都只係坐係角落嗰邊嘅嗰張細枱. 

點心款式還尚算可以，而且佢地啲味道都算唔錯. 值得推介既係佢地既流沙包. 

熱辣辣既奶皇流沙包，咬落去既囗感好軟熟，而且咬落去既時候啲料真係會流出嚟. 如果唔小心啲食既話，啲汁真係會流到周圍都係. 

我望著上海Crystal好享受咁食緊佢既炸鮮奶. 然而當我見到佢的嘴角上沾上了一些白色餡料時，我即時想從我的褲袋度拎包紙巾俾佢. 

我："Crystal, 你嘴角好似有啲野..." 

話口末完，Crystal用她的舌尖輕輕咁將啲白色餡料抹走. 而我，就只好扮到若無其事咁放返包紙巾入褲袋諗住遲啲用. 

馬丁露出一副好疑惑的表情："呢啲..係唔係鷄腳嚟？" 

瑞士佬: "雞翼就食得多， 雞腳？唔係好敢試." 

組爸："試下啦. 話唔定你會鐘意食呢. 馬丁你鐘意踢球，而你又鐘意跑步，咁未啱囉！以形補形嘛." 

秀智："我咁大個女都末食過雞腳. 就算我係馬來西亞生活咗咁多年都係一樣." 

組爸："咁你要試啦. 佑二，阿石，男人老九唔好咁婆媽啦. 試下啦." 

佑二和阿石睇見嗰啲雞腳都一同地灑手擰頭. 

組爸見到咁既情形，他就說："算了。阿Ming和組媽同我一齊食埋佢啦." 

本身我對呢籠鳯爪都冇咩興趣. 不過，身為香港人既我，點都要捍衛本土文化. 最後，都係由我，組爸同組媽分享咗嗰籠鳳爪. 

大家睇到呢度可能都會覺得呢啲其實冇咩好分享. 但對我嚟講，呢啲都係其中一啲我自己覺得好難忘既過程. 或者，我真係開始有啲懷念以前同組員一起經歷過的日子... 

埋完單之後，我地嗰組就返hall準備迎接下一輪既活動. 而令我最期待的，當然就係扔水彈呢項活動啦.