<真人真事> - HKU的留學生活: 龍虎山

話說Kong u 在開學前既一個禮拜會安排一些活動俾啲留學生去參與.  

活動不外乎海洋公園，南丫島一日遊，同九龍港島一日遊. 而令到我有最深既體驗反而係行龍虎山呢一段經歷.  

我之所以選擇行山其實係有兩個原因既. 一來唔使逼車上太平山頂，二來呢啲有益身心既活動絕對可以令我自己暫時可以忘記Crystal.  

行山既路程唔算太遠，大概一個半小時鬆啲就己經到達山頂. 團入面都有成差不多二十個留學生嘅，但正因為上到山頂之後大家都各有各活動，所以負責這個團既社工就建議大家玩完之後就自行落山.  

我開頭都以為返落山係一件好容易既事. 但原來，成個過程並唔係咁簡單...  





話說我諗住睇埋幻彩詠香江先走，所以我係山頂逗留到七點幾. 見到巴士站同的士站都排滿哂人，唔想等既我唯有試下行返之前上山嗰條路落去.  

夜晚既路睇落去真係同日頭見到既好唔同. 在昏暗既燈光底下，我只見到離我不遠處有一對情侶係度調緊情.  

因為人生路不熟既關係，我原本諗住跟佢地行落山. 話哂我自己生得好眉好貌佢地應該唔會當我係賊啩？ 

但當佢地發現有陌生人係佢地後面既時候，佢地開始放慢自己既腳步. 而我亦都慢慢地爬過咗佢地頭. 

前面人影都唔見隻，我心裡面開始有啲怯. 但係我抱著"上台唔好怯，一怯你就輸"呢個宗旨，終於俾我行到去公園嗰個位置.  





當我見到有幾個人輪流地行緊上山頂既時候，個心都開始定咗啲. 但當我見到個指示路牌既時候，我個心又當堂離一離. 究竟，我應該行邊條路徑先啱？ 

之前行上山嗰啲都已經唔見哂，而公園嗰邊亦唔見有人係度. 我唯有膽粗粗地選擇咗行左邊嗰條小徑.  

行行下我突然見到有兩個人影係我前面閃過. 嗰時已經差不多行到一半，冇理由又一個人走返上山頂排隊㗎. 所以我決定行近嗰兩個人度睇下可唔可以叫佢地帶我行返落去kong u.  

我："唔好意思呀. 請問你地知唔知返kong u 嗰條路點行呀？" 

當時嗰兩個陌生人聽到我問佢野都好似有啲愕然，之後其中一個陌生人就回答: "哦. 你依家跟住呢條路落去啱㗎啦." 





我：" 咁我可唔可以跟住你地一齊行？" 

嗰兩個陌生人答應咗之後，我就同佢地一齊行落山. 從談話之中，我發現原來呢兩個陌生人都係港大既助教. 佢地一個就係讀物理學，而另外一個就係讀數學. 當我聽到佢地話自己係助教既時候，其實唔多唔少個心都定咗啲. 我心諗，起碼佢地應該唔會點我行錯路啩. 

前面既路一片漆黑，但這兩位助教反而行得幾輕鬆. 由於小徑既左右都被一片樹林包圍住，所以感覺上成個氣氛都有啲詭異.  

幸好，這條小徑仲有一段路係冇被樹林遮蓋住. 美麗既香港夜景暫時緩和咗剛才詭異既氣氛. 但當我地再繼續行既時候，眼前既路又變得一片漆黑.  

瀑布既水聲越大，就表示我地越來越近龍虎山唯一既瀑布. 唔知點解，我突然間想用電話裡面個電筒嚟照一照當時個環境.  

當時我盡量將個電話照向地下，免得有人迎面嚟既時候被我射住隻眼. 我望一望地下既影子. 

咦，點解有五個人影係地下嘅？ 

我並冇諗得太多，因為我只係想盡快返宿舍.  





"喂，行快啲啦." 

"行咁快做咩姐？"

"睇住撞到人呀." 

迎面嚟緊既係一班大學生. 佢地似乎係為某啲ocamp活動而走上嚟龍虎山.  

講完冇耐，其中一個學生唔小心撞到數學系助教. 

學生："唔好意思" 

佢抬起頭望向個助教，然後再望下我，跟住佢就同其他學生講： 
"喂，我地真係要加怏腳步啦. 如果唔係就趕唔切完成我地要做既野啦." 





跟這班學生擦身而過之後,我同嗰兩位助教已經到咗原本行上山嘅嗰個起點.

物理系助教： "因為我地唔係向kong u 嗰個方向行，所以我地只可以跟你行到呢度."  

我："今晚麻煩到你地真係唔好意思." 

數學系助教："再見喇" 

"唔好意思呀，我想問..." 

當時我望著只有幾盞街燈既大學道，然後回頭想問佢地應該點行既時候，佢地已經唔知行咗去邊. 

我望一望隻手錶，原來已經九點幾. 我一路沿住大學道行,經過柏立基學院，終於返到嚟黃克競嗰邊.  





Canteen 關咗門，而我又唔想行返去東閘度食麥記，所以我最後都係決定去centen 度睇下有咩野食.  

周邊既餐廳都已經關哂門，但唯獨是一間法式cafe係仲有開. 在毫無選擇既情況底下，我唯有叫咗一碟幾十蚊既意粉. 

我望住碟意粉被人翻叮再翻叮，然後擺係我面前. 嗰一刻，我真係一啲嬲既感覺都冇.

我諗，我只係想醫飽個肚然後快啲返去瞓場靚覺.