條女話我淨係識同佢扑野 , 要同我分手: 陸拾陸
「話說個陣時我大左肚，之後離家出走，
識左個男人，呢間屋就係佢送比我架啦。」Meimei又訴說起往事來。
「點只識左咁簡單，最近仲撞返添 …… 」此時在一旁收拾行李的Khloe笑道。
「撞返？」我和小橋不約而同驚道，「佢又點解無啦啦送間屋比你既？」
「好彩你地兩個入醫院囉，唔係Meimei都撞唔返佢，」
Khloe又替Meimei說，「人地又高大，又靚仔，人又好喎，仲唔會咁鹹濕，
邊似D人丫 …… ！」Khloe這明是指桑罵槐，說我的不是。
「咩啊，係醫院撞到 …… ？」我聽著一驚，
也沒在意Khloe的嘲諷，「Meimei唔係無黎醫院咩？」
「Meimei有黎 …… 仲係即刻黎添，不過就係撞到人地靚仔醫生，
所以咪唔要你囉，」Khloe嬌笑道，似在回味那帥氣醫生的模樣。
我聽著匪夷所思，也不敢相信Meimei竟會為了外人，而棄我於不顧？
「Khloe講既係真架 …… ？」我難以置信地看著Meimei。
「嗯，錯唔晒啦，我個日又真係有去到醫院，諗住探你，
而之後又真係撞到佢。」Meimei答道。
我認識Meimei也一段時間，對她的過去也是從口中得知，
也沒想過她竟有個要好得送了一個單位給她的男人。
「就係 …… 就係你房入面個男人 …… ？」我驚問，聲音都發抖起來，
要是Meimei和這男人仍然藕斷絲連，我可多了個情敵。
「房入面個男人？」眾女聽著都是一驚，盡往Meimei的臥室看去，
以為真的有個男人躲在衣櫃裡，大白天鬧起鬼來。
「唔係啊，我係講佢房入面張相。」我把話說清楚。
「你留意到啊？」Meimei也有點愕然。
「嗯，個日 …… 」我說著還是覺得不要提起那夜施暴的事好。
「係啊，就係佢，」Meimei會意，即替我把話接過，「佢係個婦科醫生，
當年我就係因為有左，先識到佢 …… 不過我地都好多年無見啦 …… 」
Meimei說著眼圈一紅，他們二人之間，似有著些不堪回首的前塵。
「嘩，人地識Meimei耐你咁多年，你連感情都輸埋比人地啦，
你要加油留住Meimei啦。」小橋笑道，伸手在我膊上拍了一拍，給我點鼓勵。
「不過我係Meimei都唔要你啦，每樣都比唔上人，淨係上進都輸晒啦，
就算真係幾鍾意你啊，都好難同你過埋下半世啦，係咪咁話？」Khloe說道，
又耍起舊性子，要責怪我整日不務正業，成不了大事。
Meimei聽著只是笑而不語，也沒多說一句。
「咁又唔係既，男人唔係話有錢就係好既，我成日都遇到好多有錢佬架，
佢地個個都有D問題架，一係就心理變態，一係就做野污糟，
所以啊，我搵佢地錢我都搵我心安理得，反正佢地D錢都唔係咩乾淨錢。」
小橋說道，算是替我辯護。
「唔係架，小橋你大D就明架啦，」
Khloe說道，「兩個人一齊生活仲要睇好多野架，雖然呢一刻無錢係唔緊要，
但係點都好，唔好一世無錢嘛，男仔點都要有上進心，
唔係既話想做咩都做唔到，做咩都做得唔開心，點樣過日子喎。」
Khloe說著雙手仍是不敢偷懶，替我打點用品。
我聽著心裡想起Khloe與我分開後交往的Kelvin，同樣是個富家子，
可風流成性，真不知Khloe與他一起是否就會快活，
但當下也不敢直接問個明白，始終這件事我也是從巧兒口中得知。
「咁其實小橋都講得無錯既 …… 佢又的確唔係咩好人 …… 」
Meimei對Khloe說，把笑臉都收了起來。
「點會唔好啊？」Khloe有點詫異，「高大成熟穩重，你見到佢唔係好開心咩？」
「嗯，見返點都開心既，」Meimei點了點頭，「不過可惜佢一路都有老婆啦 …… 」
原來那年Meimei懷孕離家，遇上了那婦產醫生，
後來他們戀上了，只是Meimei一直不知道他早已成家，還癡癡的戀著他，
到後來事發，那男的便要與Meimei斷絕來往，
Meimei固然心傷，但那男的也自覺愧對Meimei，便給了這個單位Meimei安居。
Meimei初時不肯，說她自己不是他的情婦，
但那男的再三相勸，Meimei終於還是答應把此處接手，一直就住至今天。
本來他還要每月定期給Meimei一點生活費，好讓她日子無憂，
可Meimei性子硬，終究不肯答應，說要自食其力，
那男的見難以勸服，便也只好由得Meimei。
到那日我與小橋入院，Meimei與那人重遇，
心裡雖是感激那人送了她一個單位，讓她離家後有地方安身，不至孤苦無依，
但對她已婚一事又始終耿耿於懷，至今未能釋懷，
於是便從此絕跡那醫院，連來探病也不肯，為的就是不願見他一面。
在場眾女知道Meimei這段故事後，也嘆了一口氣，
只道男人都是得一想二的壞蛋。
而我麼，我卻倒想遇到這麼一個會送我一頭住家的壞男人。
Khloe仍在打理我的行囊，卻忽爾聽她驚道：
「咦，呢套衫咁熟口面既？！」