條女話我淨係識同佢扑野 , 要同我分手: 卅柒
我被巧兒這麼一問，問得我都呆住了。
我開始回想自己過去對Khloe的了解，
在我們相戀的日子，除了開頭的半年，
我們大多時間也只是關上房門，在家中瘋狂做愛，
有時完事後，也說不過幾句話，Khloe換過衣服便直接回家去。
我除了知道Khloe家有個哥哥以外，就好像對她一無所知。
「你想講咩啊？」我回過頭問道。
「你想知？」巧兒笑道，又開了一罐啤酒，「你陪我飲咪話你知囉，嘻嘻。」
「我唔得閒同你玩啊。」我說著又轉過頭要走。
「你唔想知佢點同阿楓一齊咩？」巧兒又問。
「知又點啊？佢地都無一齊啦而家。」
「係啊，佢地無一齊啦，但係你唔想知佢地之前一齊做左d咩？」
「做左d咩 …… ？」我心裡暗暗想，Khloe跟阿楓交往，
可以做出甚麼來？想都是男女朋友會做的事。
腦內不禁泛起Khloe與阿楓親蜜的場面，心頭不覺一酸。
「我唔想知啊。」我說。難得糊塗，甚麼也不知道的人好像比較幸福。
「但係佢同Kelvin你又知唔知？」巧兒說著又已乾了一罐啤酒。
「邊個Kelvin啊？」我心裡暗暗驚訝。
我聽巧兒說到Kelvin，不禁吃了一驚，這Kelvin與Khloe又是甚麼關係？
但轉念一想，也不知是否巧兒在瞎說胡扯一通，
只是巧兒一向天真像個小孩，此時又喝得醉醉，實在沒必要騙我，
要是她真的在說假話，也可真的太攻心計了。
我還是姑且先聽聽巧兒怎麼說。
「邊個Kelvin啊？」我追問。
巧兒見我著急，竟噗哧的一聲，笑了出來。
「你笑咩啊？講啦，邊個係Kelvin？」我再問。
「嘻嘻，想知啦咩？你坐過黎我先話你知。」巧兒笑道。
剛才巧兒說起阿楓，我也不感興趣，
可突然出了個Kelvin，這叫我怎麼再按捺得住？
我便依她，坐在她身旁，正對著前方的海景。
但見前方泊著幾艘漁船，對岸閃著點點燈火，燈光都打落在水面上，
一陣輕風徐來，一潭海水仿佛成了一道長天，載起了滿天星宿。
只是任眼前景色再美，我腦內就只有Kelvin，那他媽的Kelvin到底是誰？
「我坐左過黎啦。」我說道，「講得未啊？」
「飲埋先啦，」巧兒笑道，向我遞來了一罐啤酒。
這是關於Khloe尤關重要的事，我心急要知道，便二話不說的把啤酒乾掉，
口裡一陣苦澀，但又那及心中那道抑鬱？
「講得啦，」我用力一捏酒罐，表示裡面已不剩半點。
巧兒見我已乾掉，便笑著的點了點頭。
「嘻嘻，好啊，我講你知啦！」說著巧兒把頭向我靠來，
貼在我的耳邊，可沒有跟我說Kelvin的事，
卻突然說了一句：「其實 …… 我鍾意你！」然後在我臉頰上親了一下。
事出突然，巧兒突然親了我一下，也沒告訴我有關Kelvin的，
反是說甚麼喜歡了我，我當真莫名其妙，不禁又氣又怒。
「Kelvin同Khloe做咩啊？」我也只當她是喝醉愛玩，也不理她。
巧兒見我發怒，氣得咬了咬唇，然後轉過頭去。
「你淨係Khloe Khloe，你有冇理下我啊？」巧兒哽咽道。
我心知若把她氣惱，要再問得個究竟就難上加難，便先順著她。
「係啦係啦，唔講Khloe啦，我地講Kelvin啦。」我說。
「嘻嘻，」她突然又拾回笑容，「咁就差唔多。」說著又向我遞來一罐啤酒。
為了要套出巧兒口中的秘密，我便與她一路喝著。
「咁講得未啊？」我問道。
「嘻嘻，見你係乖寶寶，咁聽我話就講你知啦，」她笑道，我卻覺得很惡心，
「你同Khloe姐姐分左手之後，你咪跟左我同阿楓落Club既？」她續說，
我點了點頭。「跟住其實個日我見到你，已經 …… 有D鍾意你。」
我聽著不耐煩，我不是要知道巧兒暗戀我的故事，
但無可奈何，只有繼續聽下去。
「跟住你同阿楓講話叫佢溝左Khloe姐姐嘛，係咪？」
「係啊，佢就係因為咁所以去搞Khloe？」我有點激動。
「係咁簡單就好啦 …… 」巧兒又喝了一口啤酒。
「其實一直以黎阿楓都鍾意我 ……. 」巧兒突然說道，「我又點會唔知啊？
我同佢由中學識到而家，講得好聽d佢就係暗戀左我咁多年，唔好聽啦喎 …… 」
「佢係你隻兵！」我搶嘴道。對，阿楓中學時期是個毒撚，
只是不知道巧兒與我也是同一間中學，都怪我中二已經輟學，所以認不出來。
「嘻嘻，係啦，就係咁啦，」巧兒笑道，「佢初頭份人，成舊薯仔咁，
後來先變到而家咁mk姐嘛，」這我當然知道，阿楓往時還是一等一的毒撚，
那只薯仔這麼簡單，「所以佢就算變到而家咁，對住我個心態都無變，
始終都係相敬如賓，但係無奈既係，我始終都唔鍾意佢，
有時D野，無Feel就係無Feel啦。」巧兒說。
我聽巧兒說起「無Feel」，又想起Khloe說對我「無Feel」，不禁心頭一酸。
「個晚之後，阿楓發現左我對你好似有d野，佢把口就無野，仲拎出黎講笑，
但係我知道佢其實好介懷。」巧兒續道，「咁為左令佢忘記我，
我決定幫佢好好地搵個女朋友，等佢可以有個寄託嘛。」她笑道。
「所以就搵左Khloe？！」我問。
「老實講丫，我初頭都無諗過係Khloe姐姐，」巧兒搖頭道，
「阿楓係鍾意我，但係都係邊食邊等，真係有感情既無幾個。
咁個日之後我都時有跟住阿楓去玩，點知有一日就比我撞到Khloe姐姐啦。」
巧兒說著又乾了一罐，身子已開始幌來幌去。
「阿楓就係咁識左Khloe？」我著緊地問。
「一半啦，」巧兒說著又向我遞來一罐啤酒，我明她意思，
這次更是一口乾掉，只想她快點繼續把故事說完。
「即係點啊？講啦。」我催促。
「的確個日阿楓係認出左Khloe姐姐，佢係你Facebook都見過佢d相，
但係 ……. 」巧兒說到此處嗝了一口，想是喝得太多。
「但係咩啊？」我問。
「但係 …… 個日Khloe姐姐已經唔係一個人。」巧兒說道，
說著有點累，便整個身子向我靠過來。
我要聽故事，又那敢開罪她，便由得她依偎。
「Kelvin？」我問。
巧兒點點頭，伸手摟住我的腰，一臉陶醉。
「唔好訓啊！跟住呢？」我忙道。
「嘻嘻，我無訓，今晚有你陪住我，我唔捨得訓。」巧兒張開眼道，
嘴角卻甜絲絲的笑著。
「繼續講啦喂。」我說道。
巧兒向地上的啤酒睨了一眼，
「我飲唔到啦，你幫我飲埋佢啦。」
我點點頭，開了一罐，喝著啤酒聽她說故事。
巧兒續說：
「我地初初見到Khloe姐姐既時候，見佢已經同Kelvin坐埋一齊，
Kelvin仲攬住佢，得閒借d意都會抽下佢水咁，
咁當然個陣我地係未知佢叫Kelvin啦。」我聽巧兒說Khloe被人佔了便宜，
眼裡一熱，竟想要哭出來，只好死命忍住，「咁後來我同阿楓認到，
咪坐埋去同佢地傾下計，飲下野咁囉，」巧兒說道，那張臉卻在我胸前磨來磨去，
我也在被她佔便宜，「跟住傾多兩句，Khloe就同我地介紹，
話呢個係佢新男朋友，叫Kelvin，係佢大學同學。」
我聽到是Khloe的大學同學，想起自己的學歷，自卑之意不禁驟然而生。
「個Kelvin就豪爽啦，淨係睇佢著衫都估到小小，
點知後尾佢地張檯張單，都係佢一個人埋，我諗佢屋企都好有錢 …… 」
想到那個Kelvin出身富裕，我又是怎麼也比不上了。
「佢咩樣架？」我追問，心想至少在外表上我不會輸。
「Um …… 好難講喎，點講你知佢咩樣啊？」巧兒說。
「求其形容下啦，一係似邊個明星啊？」我說道。
「等我諗下先 …… 都好耐之前啦 …… 」巧兒闔眼回想，「啊，有啦，
有少少似余文樂咁樣囉 …… 」
我聽後仿佛五雷轟頂，這他媽的Kelvin，有錢也罷，還要長得余文樂般？
老天可也太不公平了。
我想著不禁自慚，有點心灰意懶，故事說不說下去，也無關重要了，
便隨手拎起一罐啤酒，自顧自的喝著。
那知巧兒卻續道：
「咁我地個日係Club場入面，都係見到佢地攬攬鍚鍚姐，
之後走左做咩我地都唔知，淨係知Kelvin好似開車送左Khloe返屋企，
而阿楓都驚我危險，都送左我返屋企。」
好啊，聽到這裡我也稍稍放了心，
至少那Kelvin有車，會負責接送Khloe，
我也不用擔心，Khloe在他身邊會很安全。
想著，不禁又呷了一口酒。
「跟住本來都好地地，我地都無為意，
我問阿楓洗唔洗話你知，佢話Khloe同你都分左手，講唔講都無所謂啦，
咁我諗下又係喎，咪無左回事囉。」巧兒續道，
「跟住點知過幾日，我地又見Kelvin上黎喎，但係佢已經拖住第二條女，
啊，差d唔記得講，Kelvin係戴眼鏡架，個樣斯斯文文，
真係估佢唔到係禽獸黎。」
「喂，你仲有冇聽架？你冇聽我唔講架啦？」巧兒見我楞住了，
似沒有聽見她的話，便問道。
「你繼續講啦 …… 」我只想巧兒不要吵我，
我腦內就只有Khloe與Kelvin親熱的情景，
又想起Khloe有一個條件這麼好的男友，還怎麼會看得上我，
難怪甚麼feel也沒有，都怪我太天真。
「哼，都唔知你係咪聽緊架，我長話短說啦，
總之之後就係Kelvin又係同條女攬攬鍚鍚，跟住又係開車送佢唔知去邊，
同Khloe個陣一樣。講真啊，條件好有咩用丫？唔專一已經係死罪啦，
有時女仔就只係想要個一心一意鍚自己，愛自己既男人，
如果咁都做唔到既，就算佢由千萬身家，我都唔會鍾意。」巧兒說著有點感慨，
「點知又過一個禮拜左右啦我諗，又見到Kelvin同Khloe上黎，
我都嚇左一跳，原來佢地仲未分手，嘩，如果係咁，我諗個Kelvin都幾犀利喎，
唔知有幾多個女朋友，不過以佢個樣又真係唔出奇既，」巧兒說著又看了我一眼，
然後微微笑了一笑，「就係個日，阿楓靜靜雞同左Khloe爆晒個Kelvin d衰野，
所以佢地就鬧分手啦。咁Khloe姐姐呢？就梗係好感激阿楓啦，
覺得佢真心對佢好，係好男人。阿楓初頭都唔係幾想，但後來唔知係咪我講起啦，
佢又記起我鍾意你唔鍾意佢，就同左Khloe一齊，向你報復囉，件事就係咁啦。」
巧兒說著又望了我一望。
「喂，有冇聽架？」她問道，在我胸口拍了一下。