男人唔可以窮 II: 12
星期一，中午十二點。
靜悠準時到達酒樓，為左今日嘅家庭約會，靜悠故意提早兩個鐘出門，為可以令薛媽到達後可即時入座而準備。當靜悠順利拎到一張八人枱時，薛家等人亦都準時出現酒樓。
薛媽一馬當先想搜尋靜悠既行蹤，聰明既可勇拎出電話致電靜悠：
「喂，我地到左喇，妳喺邊度？」
「奶奶，呢度呀。」靜悠企起身熱情咁揮手，薛媽旁邊既可正同安兒都覺得，今日既氣氛開始得相當唔錯。
可正：「靜悠心情好似幾好喎，有啲辦法喎可勇你。」
可勇：「邊係，埋去坐喇。」
薛家一等人會合靜悠，靜悠笑容滿面咁為大家清洗餐具，安兒故意走到去靜悠旁邊坐，而天佑亦第一時間撲向靜悠。
「媽咪。」
靜悠：「有冇掛住我呀？」
天佑：「有，媽咪，我隻高音腳損左。」
「點解會咁呀，俾媽咪睇下。」靜悠拉起天佑褲筒，可勇喺一邊笑住講：「唔使理佢，佢整到少少之嘛，今朝已經俾我地全部人睇過，成日想人錫。」
靜悠：「咁耐冇見，錫下都應該啦。」
「靜悠呀，食牛肉啦。」可正將食物放到靜悠碗內，靜悠因為之前同可正爭執嘅事停頓左一秒，然後好快又轉為快樂嘅笑容。安兒：「嘩，老婆都未有就夾俾個弟婦？」
安兒故意一句，令靜悠覺得尷尬，故意用手撞安兒一下，安兒：「我冇講錯呀，哈哈。」
自從可勇同靜悠離婚之後，薛家好耐都冇試過咁開心既聚會，靜悠呢個時候嘅心開始放開，佢開始諗，自己可以用邊一個程度去接受可勇。可勇呢個時候拎左一盒朱古力出嚟，係之前提過靜悠最鐘意食既一種朱古力。
天佑：「朱古力呀媽咪！」
可勇：「食啦大家，我之前買左好多，而家唔使再用，大家幫手食左佢。」可勇將一粒遞到靜悠面前，靜悠接過朱古力，可勇：「一陣飲完茶返去，我有禮物送俾妳。」
「禮物？」靜悠詫異，但更詫異既係靜悠呢個時候見到可勇身後有兩個人正向自己走過嚟，係桂姨同潘志龍。
「媽？」靜悠大驚，知道桂姨帶住潘志龍喺呢個時候出現，一定唔會係巧合，起身立即向桂姨跑過去。
「薛可勇，你個死人仔對我個女唔住而家想用乜嘢計去迷我個女呀？」桂姨一聲大叫，令在場所有人都將注意力集中喺薛家身上。
「媽，妳做乜呀？」靜悠想攔住桂姨，但被一手推開。薛媽望住桂姨走向可勇方向，知道好男不與女鬥，為避免可勇受辱，薛媽故意走到兩人中間將桂姨擋住。
薛媽：「襯家，咁啱？」
「襯家？我呸。」桂姨接近極致既狂態，將薛媽噴得一面都係口水，母親受侮辱，可正可勇立即衝上前。薛媽：「你地兩個停低！阿媽會處理，呢度係酒樓，唔好失禮。」
「媽呀，妳癲左咩？」靜悠知道桂姨性格，想上前阻止，但呢個時候被潘志龍拉住，潘志龍：「表妹，妳唔好阻住佢地啦。」
「放手呀潘志龍。」可勇轉跑向潘志龍身邊將佢拉住靜悠嘅手推開，但同一時間桂姨亦將可勇推開，桂姨：「係你唔好掂我個女呀，俾返個孫我呀仲有。」
聽見桂姨說話，薛媽面上表情突然變得奇怪，企喺一邊嘅安兒係唯一一個留意到薛媽表情變化既人，知道情況可能有不妙，潛伏幾年嘅問題可能會突然爆發。
靜悠：「點解妳會嚟架？我地飲餐茶之嘛。」
桂姨：「飲茶？仲有前日去中環食飯呢？妳當阿媽唔知呀？女呀，我養到妳咁大都係想妳嫁得好，生活好，點解妳總係唔聽我講？妳表哥唔好咩？佢話如果妳而家肯嫁俾佢，何文田果層樓就加埋妳個名呀。」
聽完呢一句，靜悠同薛家既人都明白係一回乜嘢事，潘志龍以金錢做引誘，一直以靜悠好聽自己話嘅桂姨發現女兒偷偷約見可勇，靜悠同可勇復合機會大增之下毫無辦法，一時情急帶住潘志龍嚟到酒樓搗亂，希望就算用幾丟人現眼嘅方法都好，都唔可以俾兩個人再走埋一齊。
最重要係，潘志龍何文田嘅住所，市值一千七百萬。
「妳賣女呀？」靜悠向桂姨大聲咆哮，潘志龍上前阻止：「妳唔可以咁大聲同老人家講嘢。」
靜悠：「你上次俾我踢爆係咪衰唔夠？」
潘志龍：「妳聽我講，我…」
可勇：「點解你一定要搞我同靜悠？你明知佢唔會鐘意你？」
潘志龍：「你收聲，薛可勇，上次我冇報警放過你而家仲咁惡？」
可勇：「而家報，你點搞我都可以，但你唔好再煩住靜悠。」
「你唔好講到咁偉大，我已經搵到霜霜，表妹，妳想唔想知佢地果晚去左邊？」
潘志龍嘅一句，引起左另一個變數。霜霜呢個名，一直係靜悠心入面既一個鬱結，到底呢個同我素未謀面既女人有咩咁本事？可以令可勇出軌？靜悠聽到潘志龍所講，忍唔住問潘志龍：「你真係搵到果個女人？」
潘志龍：「係，佢仲同我講，果朝早係同薛可勇去左開房。」
可勇目瞪口呆，因為連佢自己都唔知道潘志龍所講嘅係唔係事實，本能反應之下唔可以第一時間反駁潘志龍。但另一面既靜悠聽到潘志龍講出所謂真相之後，兩隻眼嘅眼淚已經開始流落嚟。
靜悠喊嘅原因好複雜，或者係終於知道左一個自己唔願知道嘅真相，又可能喺天佑面前，父母要將一個咁殘酷嘅事實呈現俾一個咁細個嘅小朋友知道。
而另一個重要原因，係靜悠以為自己終於可以放低心結，慢慢咁再同可勇走近，結束呢一段漫長而痛苦嘅單身旅程。可惜一切都事與願違，就喺呢個可以破鏡重圓嘅前一秒，兩個人嘅緣份又停低左。
可勇沉默，可正知道自己需要為弟弟解圍：「你話係就係？叫埋條女出嚟先講啦。」
潘志龍：「我唔叫出埋佢出嚟就係想俾返小小尊嚴表妹，我唔想佢難過。」
「夠喇。」靜悠開口，所有人立即收聲。
靜悠：「媽，我地走。」
「可勇，點解你同我講你冇做過？而家佢會話果個女仔咁講？」薛媽走上前質問可勇，可勇沉默。安兒一直掩住天佑同天迪既耳仔，唔想俾兩個小朋友聽到大人之間嘅對話。
靜悠走遠，潘志龍跟住後面，桂姨走之前故意走到薛媽同可勇身邊：「妳個仔呃妳囉，點解妳會咁蠢架？」
桂姨一邊講，安兒一路見到薛媽兩隻手一路震。
「老公……老公…」安兒暗示可正，可正第一時間明白安兒意思，可正：「走啦妳，講夠未呀？」
桂姨：「我未講夠呀，仲有你呢個大佬都唔係好人嚟架，有爺生冇…」
可正一邊聽住桂姨嘅辱罵，但完全冇半點感覺，因為薛媽兩隻手已經震得非常厲害，可正知道係乜嘢事，因為幾年前佢曾經見過薛媽呢個狀態，暴躁、不安、衝動、無理…係一個連可正都阻止唔到嘅狀態。
桂姨：「唔好話我話呀，你地一家都咁賤，個死鬼老豆都唔慌係好人呀。」
「啪！」一下響亮嘅掌摑聲傳嚟，桂姨被薛媽狠狠咁摑左一巴。
桂姨：「妳打…我？」
薛媽：「你夠膽鬧埋我老公？」
「啪！！」薛媽嘅抑鬱症終於爆發。
「媽！」事出突然，靜悠同可勇第一時間各自跑向自己母親將兩人隔開，薛媽掌摑完桂姨之後異常冷靜，只係木無表情咁不斷想再向桂姨行近，右手握成拳頭狀。
「媽，妳點呀？」可正知道薛媽係受病情影響先會有呢個舉動，所以第一時間將薛媽拉到一邊。
桂姨：「妳打我？女呀？妳睇下妳睇下？佢地係錫妳既就唔會當住其他人面打妳阿媽我啦…嗚。」
「妳…妳地點可以亂打人架？」靜悠向住薛媽聲嘶力竭咁大叫，但同時一種好混亂嘅情緒令靜悠覺得好難去處理，十分鐘前我地仲開開心心一齊相處，點解而家會變成呢個局面？
可勇：「妳阿媽鬧我阿爸呀，靜悠！」
潘志龍：「就算係點都唔可以亂打人！」
可正：「幾時輪到你出聲？」
桂姨：「志龍幫我報警，我要拉左個傻婆！」
「妳話邊個傻呀？同我阿媽道歉！」可勇走上前希望同桂姨理論，但靜悠擋喺中間：「我阿媽俾妳地打都仲要道歉？」
可勇：「妳有冇咁愚孝呀？盲嘅都睇到係妳阿媽錯啦，妳仲講到我地錯咁？冇佢搞咁多嘢就唔會有咁多事發生！」
「或者我係愚孝，但果個係我阿媽！」靜悠同可勇以幾公分距離互相望住對方，大家都唔認為自己嘅母親有錯，呢個時候桂姨又再大聲叫：
「志龍同我報左警未呀？」
潘志龍：「我而家報！」
「幫我叫差人…嚟…拉哂佢……班……阿女…我個心口…好痛呀…」桂姨一邊講按住自己心口，面露痛苦表情咁慢慢坐喺地下。
「媽，妳做乜呀？」靜悠緊張咁扶起桂姨，眼神入面充滿住不安同恐懼，無論點錯都好，靜悠只有呢個媽媽，一直相依為命嘅就只有呢個媽媽。
靜悠：「你地企開小小好唔好？我媽咪唔舒服呀！」
「自己發完癲仲扮可憐？」可勇轉身行去較遠地方時細聲拋低一句說話，但偏偏俾靜悠清楚聽到。
靜悠：「我阿媽有事你係唔係好開心呀？」
可勇：「我冇咁講過，但妳阿媽無端端鬧我阿爸阿媽就唔得！」
靜悠望望可勇，再望望薛家嘅每一個人，包括天佑，然後視線移到去身後嘅一班茶客，靜悠覺得好醜，唔知點樣去應付。
靜悠最後嘅視線停留喺薛媽嘅面上，薛媽依舊係木無表情望住靜悠，靜悠知道薛媽大概發生乜嘢事，亦都知道桂姨所犯嘅錯有幾嚴重，但同時，靜悠亦都親眼睇住薛媽掌摑桂姨。
最後靜悠向薛媽做出左一個近乎歉意嘅表情後，轉身打算扶起桂姨離開。
靜悠：「媽妳行唔行到？我同妳去醫院。」
桂姨：「我行唔…到…俾我休息下。」
十五分鐘後，警察同救護車一齊嚟到，因為桂姨情況嘅關係，雙方喺警察面前都答應和解，而靜悠第一時間陪桂姨去醫院。
薛家眾人返到屋企，可勇同可正不斷咁安撫薛媽，薛媽反應反而令大家都好安心：「我冇事，只係頭先太嬲，果個女人咁樣鬧你地阿爸，點忍？」
可正：「妳冇事就得，但記得如果有唔開心一定要同我地講。」
可勇：「對唔住阿哥阿媽，又係我嘅事要大家操心。」
薛媽：「傻仔呀，最重要係你同靜悠關係，但而家睇嚟…都好難搞。」
可勇：「唔緊要啦，一段時間之後我地再算，媽妳休息下先啦。」
眾人商量期間，安兒一路拎住電話冇出聲，可正發現，走到去安兒身邊：「有人搵妳呀？兩個細嘅都訓左？」
「訓著左喇，老公，我出一出去。」安兒向可正打左個眼色，可正明白係一回乜嘢事：「得啦，妳出去，我睇住佢地。」
半個鐘頭後，安兒坐的士去到法國醫院，喺大堂等左一陣之後，靜悠由其中一部電梯走出嚟。安兒企起身，向靜悠微笑：「點呀？我嘅好姊妹。」
靜悠走上前，兩眼由微紅慢慢變成通紅，但一句說話都冇講，攬住安兒，喺醫院大堂入面，放聲咁大喊出嚟。
安兒由得靜悠大喊十分鐘之後，先慢慢咁安頓佢既情緒。
「桂姨…佢冇事嘛？」安兒將紙巾遞到靜悠面前問，靜悠：「冇事，佢個心臟一向都唔係太好，冇辦法，以前做嘢太辛苦捱到咁。」
「嗯……天佑同天迪一齊訓左，我地好姊妹，我會多啲去奶奶度睇住天佑，妳放心。」安兒拖住靜悠嘅手講。
靜悠：「奶奶佢有冇好嬲…？」
安兒：「佢地兩兄弟一返去就圍住奶奶不斷傾偈，唔想俾奶奶亂諗嘢，但可正有同我講佢冇怪妳，叫妳唔好在意。」
靜悠：「其實我冇嬲奶奶…安兒可能妳唔知，幾年前，老爺差唔多過身果段時間，奶奶嘅抑鬱症真係好嚴重，有幾次我親耳聽到佢同自己傾偈，頭先係我阿媽有問題在先，但…佢始終都…」
安兒：「我明呀，我頭先一路睇住妳都好心痛，但我又唔出得聲…但我諗都係妳個表哥搞出嚟…妳要小心佢。」
靜悠：「我一早就知佢係搞事，頭先醫院度我問阿媽，原來潘志龍暗中做過好多事，佢又呃我阿媽話如果我肯同佢結婚會加我個名落佢間屋度，之前又搵私家偵探跟我同可勇去食飯，連今日我去飲茶都係佢一早搵人跟住我先知我地喺呢度，呢個人真係好恐怖。」
安兒：「妳都知佢個人係咁賤，咁妳仲信佢屈可勇嘅事？今日妳明明可以放低件事，點解要俾自己走返轉頭？」
靜悠：「我都以為係可以放低，但無論點都好，頭先聽到潘志龍講嘅時候，我個心好似觸左一下電咁成個人跳起，果個感覺好恐怖，好似一個惡夢突然成真，再冇得返轉頭咁…我唔敢信，就算我幾想信，我個心都係唔敢信…」
安兒：「咁唔通點？明明知冇嘢都離婚呀？」
靜悠：「頭先奶奶咁樣摑左我阿媽兩巴，我冇可能再同可勇一齊…加上阿媽仲話潘志龍肯出錢俾我地爭返天佑。」
安兒：「佢有咁好？佢為乜？」
靜悠：「我都唔知，但我阿媽已經好開心咁應承左會俾佢搵律師，我可以點？」
安兒：「悠，妳係天佑媽咪，唔係其他人點講妳就點做，而家唔係妳可以點，係應該妳想點佢地就跟住妳既意願去做，記住就算妳而家唔敢做決定都好，總有一日，喺一個最重要既時刻，妳一定要依住自己心入面所諗既去做一個妳唔會後悔嘅決定，知道嘛？」
自從果一日之後，靜悠同薛家就好似斷絕來往一樣，靜悠每次想見天佑都係經過安兒去聯絡，然後再由安兒帶天佑到外面帶俾靜悠。
薛媽亦都再冇抑鬱病嘅徵兆，就好似以前一樣正常地每日湊天佑返學放學。而可勇都將所有心機放到網店入面，連可正安兒在內，一家人再冇提過靜悠或者係果日嘅事。
有一日，薛媽收到一封政府寄俾可勇嘅信，打開房門正想交到可勇手上嘅時候，見到可勇正企喺果塊大黑布前正做緊一啲小手作之類嘅事，旁邊都係一堆膠水同較剪。
薛媽：「可勇呀，你企喺黑布度做緊乜嘢呀？」
「冇呀，媽妳搵我呀？」可勇將膠水執好，然後走到去薛媽面前。
薛媽：「有封信呀，政府架，你睇下講乜。」
可勇拆開信件，用一分鐘將封信睇完後，面上流露住係一副煩悶嘅樣子。
薛媽：「係唔係天佑單官司？」
「係…」可勇點點頭，薛媽：「咁講乜嘢先得架？」
可勇：「遲啲應該會有社工上嚟做家訪，之前有朋友都同我講過…如果天佑係由妳湊，我成日喺屋企唔返工又好似唔係太好。」
薛媽：「咁你要做上網生意嘛。」
可勇：「我要申請法援，但俾佢地見到我唔出外返工，佢地會覺得我開網店只係藉口。同埋講到底靜悠果邊係請個私人律師，如果社工咁樣一比較之下我地會蝕底，我諗緊好唔好出去搵一份工做。」
薛媽：「呢樣你同可正商量下。」
可勇：「我知喇，媽我去郵局寄貨，食飯前返。」
可勇帶住一大包貨走到樓下，正想打電話俾可正商量官司事時，一個熟悉既人出現喺可勇面前。
「好耐冇見呀，可勇。」呢個人，係阿栽。
茶餐廳入面，阿栽同可勇客套咁交換近況。
阿栽：「我而家唔錯呀，新公司果度做得好好，其實做呢一行你都知，肯做夠狠嘅話，一定搵到錢。」
可勇：「咁咪幾好，做朋友嘅都想你好。」
阿栽：「哈哈，大家咁話。」
可勇：「多謝你，阿栽，我知道係你幫靜悠，佢先知道潘志龍嘅衰嘢。」
「多乜嘢謝丫…」阿栽邊講邊拎起茶杯，可勇：「其實係唔係有人叫你搵我？」
阿栽望住可勇笑一笑，千言萬語，都唔知由邊一度開始去講。阿栽：「有冇興趣做返金呀？」
可勇：「唔喇，做金時間太癲倒，我想留多啲時間俾個仔，加上而家搞網上舖頭都夠使用，但多謝你嘅提意。」
阿栽：「見你一包二包咁又賺到錢，幾得意，哈哈。」
可勇：「你都未答我，係唔係有人叫你搵我？靜悠呀？叫你勸我唔好爭天佑？」
阿栽：「佢係有搵過我，但唔係叫我勸你，只係同我提過上次你地酒樓件事，我自己多事搵你。如果有任何事想我幫你，你就出聲同我講。」
可勇：「幫我？…哈哈，有呀，幫我搵果個霜霜充出嚟，我都想知果晚到底我自己去左邊。」
阿栽：「呢個就我能力之外喇勇哥，哈哈。」
可勇：「我夠知啦，講笑咋，但就算搵到又點，我同佢都冇可能再一齊，除非佢阿媽死左…點都好，我知你有心，栽，我正式同你講一句，對唔住，以前嘅事係我錯！」
聽到可勇一句道歉，阿栽面上嘅表情停住，明顯係一副強忍眼淚既反應，呢段友情已經冰封太耐，阿栽從來都冇諗過可勇會主動道歉，呢一刻突然覺得友情好可貴，令人好感動。
阿栽：「以茶代酒，飲啦，喂不過頭先你話做朋友想我好，呢句有冇講錯呀？」
可勇：「係呀係呀我講錯，做兄弟嘅一定想你好，得未呀？」
「飲啦兄弟！哈哈！」
一個鐘頭後，兩個人帶住愉快心情離開茶餐廳，就喺門口分道揚鑣之後，阿栽突然叫停可勇：
「喂，可勇！」
可勇：「點呀？」
阿栽：「得閒再出嚟飲酒，阿潮話都想見你，佢仲爭你嘢要還返俾你呀。」
阿栽代潮哥所提出嘅邀請，令可勇覺得詫異，因為同潮哥嘅友情本來就已經只存在於童年時代，但直覺話俾可勇知，潮哥係出於善意。
「好呀，下星期五，發發食飯，好耐冇返過去。」可勇向阿栽回覆，然後笑住咁轉身離開。
一個星期後嘅一個朝早，可正一家三口由屋企出發，打算今日去拜祭爸爸薛天來。
車程途中，可正同安兒又再提到屋企入面嘅事。
「老婆，有冇搵靜悠？佢呢個星期點？」可正問。
安兒：「有打電話俾佢，但有時桂姨喺佢附近佢唔方便聽，早幾日佢同我講佢搵左份文員做住先，佢之前應該有儲落一筆錢，暫時生活應該冇大問題。」
可正：「如果佢有需要幫手，妳睇下點去幫佢。」
安兒：「你指錢果方面？我邊可能出聲？就算佢真係冇錢，以靜悠性格都唔會講俾我知，你識佢仲耐過我，你知架。」
可正：「我都知，但我都擔心佢…」
安兒：「做咩呀？擔心個弟婦呀？」
可正：「咁多年，睇住佢同可勇經歷咁多嘢，點會唔擔心？其實上次阿媽係過份左，而家諗返起，靜悠嘅處理已經算好好，起碼佢都仲記得阿媽係因為病先會咁，唔會只係怪我地咁對桂姨。」
安兒：「靜悠嘅性格本來就好簡單，最錯係佢有一個唔簡單嘅阿媽…」
可正：「呢排我都有搵可勇，阿媽話佢成日一出去就幾個鐘，都唔知去左邊，打俾佢又話冇嘢，上到屋企搵佢又若無其事咁。又要搵食，又要睇住阿媽，又要湊天佑，我都怕佢頂唔住。」
安兒：「可勇大個架喇，酒樓果次之後，乜你冇感覺咩？」
「咩感覺？」可正問。安兒：「換轉係以前，你同可勇兩個已經走左上去殺左潘志龍喇，唔單止係你，可勇都隨住同靜悠嘅事，一日一日咁改轉左，果日我睇到佢以大局為重，冇再好似以前咁用拳頭解決煩惱。」
可正：「妳咁講我又醒起佢真係穩重左好多，上次喺馬路度，佢乜都唔講就走上去一個打兩個，果時個眼神連我都覺得好陌生，而家肯變，仲未遲嘅。」
安兒：「前面果度停俾我，我買紮花俾老爺。」
買好哂要準備嘅祭品之後，可正同安兒慢慢咁前往薛爸嘅靈位，就喺轉角處，可正離遠就望到一個人企左喺薛爸嘅靈位之前，係可勇。
「可勇…點解你嚟左都唔打俾我？」可正走上前問可勇。
可勇：「哥，嫂，冇呀，呢排冇嘢做，都會嚟阿爸呢度同阿爸傾偈。」
「老公，我去拎個花樽插好啲花先。」安兒借故走開，為兩兄弟製造一個傾偈嘅機會。可正：「好多嘢煩呀？」
「或者係…」可勇望住薛爸靈位上面張黑白相回應可正，眼神恍惚好似完全冇方向感，希望靠已經死去多年嘅爸爸能夠俾自己一個解決嘅方法咁。
可正一路望住可勇，覺得好感慨，幾年前當自己有感情問題嘅時候，佢仲記得爸爸喺醫院入面教導嘅一番說話。
「可正，如果有一日你發覺，你人生既路上面，可能會突然缺少左某一樣你覺得好重¬要既嘢，無論如何，流過眼淚之後，你都要繼續行，比以前行得更快，行得更大步，總有一¬日，你會同佢再見面，一定會。」
可惜到今日可勇有問題出現，只可以自己一個每日走到爸爸靈位前面作自我安慰。可正一直都覺得自己有一個使命，爸爸離去之後嘅所有責任，都應該由佢去負責。今日，佢好想可以同可勇分擔一下呢份心事。
一個鐘頭之後，拜祭完薛爸後，安兒帶天迪先返屋企，留低可正同可勇兩兄弟，就坐喺薛爸靈位前面果個休憩小公園入面。
「阿爸都死左三年有多，時間過得真係快…」可正將話題打開
可勇：「哥，覺唔覺得人愈大，就算想控制，但好多事都唔係自己能力可以控制到？」
可正：「由張以娜走果一日開始我已經知道，你而家先知？遲左喎，哈哈。」
可勇：「我仲記得以娜走之後你果兩個月係點過…」
可正：「點過呀？我唔記得左喇。」
可勇：「好似我而家咁過，哈哈。」
「細佬呀，你知唔知道，其實阿爸過身之前，有一晚同我講過一番說話，但我一直都只係記住喺心入面，冇講過出嚟。今日見到你咁既樣，我先醒起，呢個係阿爸對我地嘅教誨，唔止我，連你都應該要知…」可正望住可勇，一字一字咁清楚講出嚟
可勇：「哥，你好少叫我細佬…哈…阿爸果時講乜嘢呀？」
可正：「可勇，如果有一日你發覺，你人生既路上面，可能會突然缺少左某一樣你覺得好重¬要既嘢，無論如何，流過眼淚之後，你都要繼續行，比以前行得更快，行得更大步，總有一¬日，你會同佢再見面，一定會。」
可勇：「好掛住阿爸…」
「我都係…」可正拍拍可勇膊頭，兩兄弟嘅感情，盡在不言之中。可勇：「哥，我好擔心天佑單官司…」
可正：「我聽安兒講，潘志龍幫佢地請左個律師。」
可勇：「我都有問阿嫂，佢話唔係靜悠意思，係我外母一定要咁做。」
「你自己點諗？」可正問可勇，可勇：「酒樓果日我鬧靜悠愚孝，但呢個問題我根本一直都知，拍拖果時我仲讚佢對屋企人，第時結左婚我一定好幸福，點知果日我反而用呢個原因去鬧佢，但我同佢嘅感情已經唔到我控制，我而家只係想天佑一直跟住我，呢個係唯一一個我可以等靜悠返嚟嘅機會…」
可正：「如果你要同靜悠復合，你就要接受埋桂姨，但仲有可能咩？」
「可以點解我呢幾日都跑嚟阿爸呢度，我真係冇哂辦法，成件事係我自己做錯先，無論靜悠點樣唔信我，點解大脾氣，成件事，根本就係我錯在先，我想等佢返嚟，但我冇哂辦法。
就算我唔使理我外母，我都要理阿媽感受，我外母咁樣鬧阿爸，成件事…根本就唔係我可以解決到。」可勇愈講愈苦惱，可正：「如果控制唔到，就唔好理住，收拾自己心情，到你控制到件事果時，就用盡你自己嘅方法，
人生，本來好多事都唔係我地可以任何時間控制到，但控制唔到嘅時間，你只有兩個選擇，一係適應左佢，一係死左佢。」
聽到可正似是而非嘅安慰，可勇笑住答：「死左佢…哈，阿哥，可唔可以唔死呀？」
可正：「唔想死咪而家同我去食飯啦，總之你記得，感情事阿哥未必幫到你，但如果你官司果度要用錢就隨時搵阿哥。」
「多謝阿哥。」
可勇靜悠雙方嘅事，就咁一直僵住，大家都過住自己嘅日子，期間雙方都係只係用Whatsapp聯絡，關係比起以前更疏離，但呢份疏離並唔係出自仇恨，只係對雙方母親嘅一種支持。大家都搵唔到原因去繼續，亦冇辦法解開雙方之間嘅問題，期間靜悠有唔止一次用Whatsapp希望可勇可以放棄天佑撫養權，但每次都俾可勇拒絕。
過左好一段日子，可勇雖然每日都細心咁照顧天佑，但隨住天佑慢慢長大，照顧時所需要嘅精神亦都慢慢增大，可勇開始覺得吃力，但依然苦苦支撐住，可勇心入面永遠有一個信念，只要天佑一日喺自己身邊，靜悠就會有機會返嚟。
但可勇嘅壓力同能力，其實已經去到一個極限，直至果一晚，天佑發高燒…