樓下有喪屍: Act 20 學園默示錄 上
然後，我們把補給都放到車尾箱後，問題便來了．．．我們六個人，當中有一個病了要躺著．．．我們那輛車哪裡裝得下所有人呢．．．
「宜家有兩個問題，一，你隊友會幾時到？我地要幾點前去到學校？二，架車坐唔晒，點算？」我說
「我地到左學校再通知佢就得架啦，我部對講機可以聯絡佢。車嘅問題．．．」子誠說
「唔．．．」我苦惱著
「我同子誠坐車尾箱。」康師傅說
「都得呀，又唔係長途，而且我地去到就會上機走，我地乾脆拆左個車尾箱蓋啦。」子誠說
看來只有這個方法可行，於是我們把車尾箱蓋拆下，子誠和康師傅坐在車尾箱，車由我來駕駛。
「多謝你地呀．．．」寶妮說
「唔駛客氣，妳多謝左好多次啦．．．係呢，妳地以前係做咩架？」Apple說
「妳指工作？我係跳舞導師，我個妹仲係學生。」寶妮說
「哇，原來妳咁叻架，我見妳咁後生仲以為妳都係學生．．．」Apple說
「我唔細啦，都廿四歲，我個妹就啱啱十八歲．．．」寶妮說
「咁康師傅呢？」我說
「佢無提過．．．」寶妮說
意想不到事情進展得如此順利，回想過去數天的逃亡，總是在死亡和希望之間徘徊，得到了很多，也失去了很多．．．現在能夠來到這裡．．．也是因為遇上阿立他們．．．如果可以在災難前認識他們，一定可以成為好朋友呢．．．阿立，勤力德，阿強，求撚奇，財神．．．如果沒有喪屍．．．會不會我真的可以永遠和呂晨在一起呢．．．？還是她根本不會看上我呢．．．？
不消片刻我們便到了，天色也已經開始昏暗。我們把車停在學校大閘外面，偷偷觀察著情況。
「哇．．．好多喪屍．．．」子誠說
「晏晝我地走嗰陣都無咁多．．．」我說
「會唔會係我地走嗰陣嘈醒晒學校啲學生．．．？」Apple說
「咩事．．．？」華女也醒來了說
「妳瞓左陣咋喎，掂唔掂架．．．？」我說
「我其實無點瞓過．．．」華女累著眼說
「咁宜家點算？」寶妮扶著華女說
「我聯絡左我伙計先。」子誠說著便拿出對講機
「肥輝，我地到左目的地，你情況點？Over。」子誠說
「．．．．．．子誠？我依邊．．．隨時可以過嚟架啦。Over。」對講機另一邊回答
「你要幾耐時間？因為目的地好多喪屍，你嚟到我地先入去。Over。」子誠說
「唔．．．其實依邊出左問題，吉少死左．．．所以無人幫我手，我放唔到梯比你，我最多只可以低飛比你上機，而且我唔知道你位置喺邊，所以要你比Signal我。Over。」肥輝說
「ok，我會諗辦法。Over and Out。」子誠說
「好，咁宜家我地要諗辦法Signal架直昇機，大家有咩提議？」我說
「宜家天已經黑晒，如果有辦法整啲光出嚟，直昇機應該可以睇到我地。」Apple說
「電筒？唔夠照喎．．．」我說
「信號彈。」康師傅說
「我身上無。」子誠說
「煙花呢？」寶妮說
「邊度嚟煙花．．．」我說
「學校有化學室，就會有化學品儲藏室，去到我就有辦法。」康師傅說
「．．．你得唔得呀？有咩化學品可以整到煙花呀？」我懷疑說
「金屬化合物，遇火就會發出強光。」康師傅說
「金屬化合物？」Apple說
「行定唔行？」康師傅說
「．．．好啦，唯有信你啦，但係成間學校宜家都係喪屍，戰鬥無可避免，我地要先計劃一下。」我說
「首先我地要去化學室？」子誠說
「化學室喺頂樓。我以前喺度讀書．．．」寶妮說
「咁我地首先經學校主樓嘅大門入去，我記得門邊就係樓梯，沿樓梯直接上頂樓，入化學室，整好煙花，就去返操場放。」我說
「化學室要喺另一條樓梯先上到，我地要穿過四樓上去。」寶妮說
「無問題，仲有無嘢補充？」我說
「我仲需要鐵喉嚟做發射器，同埋一個網球做煙花彈。」康師傅說
「．．．咁我地先上化學室，再派人去搵鐵喉同網球。到時再決定邊個去。」我說
「就咁決定。」子誠說
「咁就行動啦。子誠，盡量唔好開槍，你用我把肉刀啦，康師傅可以用我支鐵撬，我用大槌就得啦，前進同時我地要保護女士。」我說
「我用大槌，同埋我識用槍。」康師傅不知何時點起了香煙說
「．．．好啦，咁你用大槌。我有多一把槍，你keep啦．．．不過如果你做啲咩奇怪嘅嘢．．．唔好怪我唔客氣。」我說著並交給他一把手槍
「S&W M10。」康師傅接過手槍說
「你．．．好熟槍械？」我說
「嗯。」康師傅說
我們決定好便依計行事，貼著圍繞學校的鐵絲網走到主樓入口附近。門前早已經站著數隻喪屍，門後我們則看不到，但相信一定不會比門外少．．．我和子誠首先上前進攻！身經百戰的我對付數隻喪屍並不困難，但想不到子誠也輕鬆應付，他應該也經歷了不少吧．．．我們立即走進主樓，這裡竟然迫著十數隻喪屍！！我們奮力戰鬥，女士們很快速地從我們身後走上樓梯，我和子誠也立即跟上，就在我轉身之時，腳腕卻被一隻爬行的喪屍捉住！！康師傅見狀便立即跑過來，一腳把喪屍的頭踏破！處變不驚咬著香煙的他，看起來甚有氣勢。
「呃．．．唔該．．．」我說
「快。」康師傅說
我們立即跑上樓梯，在二樓總算追上他們。只見子誠獨個在奮戰，看來是在等待我們。
「行得！」我說
子誠推開喪屍，大伙再沿樓梯跑上去。我們到達四樓，亦是這邊樓梯的盡頭。於是我們轉向走廊，幸好走廊的喪屍比下面少，我們只要沿著走廊另一邊的樓梯上去，便會到達化學室！我們不敢怠慢，立即前進，就在經過走廊中間之時，大量喪屍從課室破窗而出！把我們包圍！！