樓下有喪屍: Act 4 命運的開始
我立即跑去店舖門口，把鐵閘拉下！成功把喪屍擋住，可是這麼一來，鐵閘的聲音應該又再吸引更多喪屍了．．．
聲音．．．對啊！它們會被聲音所吸引！
我立即拿起數盞台燈，並跑回上層。
「喂！開門比我，無喪屍啦！」我拍門說
那女子慢慢打開門看了一下。
「你．．．做咩拎住咁多燈？」她疑惑地說
「陣間妳咪知！」我得意洋洋說
我走到窗前，向街上遠處擲出台燈。果然，台燈墮地爆裂的聲音成功引開了附近的喪屍！我把手上的台燈全都掉出去，總算把附近的喪屍暫時引開．．．
「點呀？下面係咪有個雪櫃？」她很緊張問
「係呀，我宜家返落去拎！」我說著並走回到下層
我打開冰箱，雖然不多，但也有十數盒包裝飲料和數樽開水！這簡直是沙漠裡的綠洲！我同時也把收銀台下一個上鎖的櫃門用鐵撬打開，發現裡面居然藏著了不少錢！我一生人從未看過這麼多現金！！雖然．．．錢可能已經沒有用了，但我還是把錢盡量拿走，不時之需也好，滿足自己盜竊的欲望也好．．．於是，我一不做二不休，乾脆把其他的地方也找一遍，找到了很多零食，這是一個寶藏！
我分批把食物和飲料拿到上層，那女子立即便打開零食的包裝，狼吞虎嚥地吃下．．．相信她一定是餓了很久．．．
「係呢．．．妳叫．．．咩名？」這是我一生人第一次主動問一個陌生女子的名字
「我叫呂晨，你呢？」她一邊吃一邊說
「我叫流主，妳．．．點解會喺度嘅？」我說
「．．．．．．嗰陣天仲光．．．我同朋友行緊街．．．經過依度，咁啱見到依間舖啲燈好靚咪喺門口睇下．．．點知．．．唔．．．突然有人喺後面捉住我朋友．．．仲咬左佢一啖．．．我嚇到即刻衝入嚟舖頭．．．之後咩都唔理就跑左上嚟．．．」呂晨說
「一直到宜家．．．？」我問
「係呀．．．我喺窗度望落去．．．見到好多人比人咬死．．．之後又起返身咬其他人．．．好恐怖．．．」呂晨一邊說一邊發抖
「唔使驚．．．有我喺度．．．」我突然有點覺得自己像狗公．．．
「多謝你．．．如果你唔喺度．．．我都唔知點算好．．．」呂晨楚楚可憐地說
「呃．．．唔好客氣．．．係呢．．．妳．．．咁妳諗住點．．．？」我嘗試找話題
「我都唔知．．．連發生咩事都唔知．．．上網都睇唔到發生咩事．．．」呂晨說
「係喎，我上網睇下會唔會有咩線索先！」我拿出電話查看
拿出了電話，我才記起我剛才收到一個訊息，我立即打開來看．．．
「貴為特選客戶，電信公司將為您自動開啟電話漫遊服務，毋需按金！如您不欲開啟此服務，請按*105*02#（撥出）」
「我屌你老母呀．．．」我忍不住罵了一句
「做咩事？」呂晨問
「無事無事．．．」我說
我回到網上論壇查看，整個論壇都討論著喪屍．．．我仔細閱讀論壇上的訊息．．．並和呂晨一起研究．．．才知道香港大部分地區都出現喪屍，而且被喪屍咬到的人也會變成喪屍襲擊其他人。多個國家已經關注事件，可是卻完全沒有救援的消息．．．雖然我們都不肯定資料的可信性，但是這是我們手上僅有的資料。
「睇嚟．．．真係好大件事．．．」我說
「．．．真係．．．世界末日．．．」呂晨說
「唔．．．」我說不出話來
不知不覺，已經深夜。奔波了一整天，我真的累透了．．．
「咁啦，下面鐵閘又閂左，落下層道門又鎖左，依度應該安全嘅，我地不如休息下啦，聽日再諗辦法。」我說
「唔．．．我都唔知瞓唔瞓得著．．．」呂晨憂心說
「唔緊要啦，咪嘆喺度抖下囉．．．」我說
幸好這裡有一些小枕頭和一些布料，我們都躺下來休息．．．沒想到不消片刻，呂晨已經睡著了．．．反而我自己卻久久不能入睡．．．每當閉上眼，我便看到我父親．．．看到他是怎樣被我殺死．．．
．．．．．．．．．
我慢慢睜開眼睛．．．看來我不知不覺睡著了．．．這裡是．．．？我發現自己正身處一個陌生的地方，我嚇得立刻醒過來！
「哇！！！」突然背後傳出一個女子的叫聲
我立即轉身看過去，只見一個女子在房間的一角蹲著．．．
「唔好擰過嚟呀！！！！」她立即隨便在地上拿起一些紙張遮掩自己
我立即意識到她正在做什麼。
「哇！對唔住對唔住，乜西都睇唔到！乜西都睇唔到！」我慌忙道歉
啊．．．對啊．．．我在旺角一所燈飾店的二樓．．．昨天為了避開喪屍而走進來，那個女子是呂晨，算是她救了我的。
「妳．．．做咩唔落樓．．．」我尷尬問
「我．．．驚呀嘛．．．」呂晨說
「啲喪屍我都殺晒啦．．．」我說
「都一樣會驚．．．」呂晨說
「我橫掂都起左身．．．我同妳一齊落下層啦．．．我地喺度瞓．．．點都唔好喺度．．．咩咩咩呀．．．」我說
我們小心地走到下層，在樓梯的轉角處觀察了一會，確認安全了才走出去．．．
「妳是但搵個位啦．．．我唔睇妳．．．」我轉身說
「咁．．．我地之後點．．．」呂晨一邊解決一邊說
「唔．．．雖然嘢飲就好充足．．．但係啲嘢食頂多夠我地過多一日．．．我諗．．．不如我地去朗豪坊。」我說
「吓．．．嗰度本身咁多人．．．宜家一定好多喪屍．．．點解要過去呀？而且我地要出去都唔係咁易．．．」呂晨說
我們回到上層，從窗口看出街道，僥倖地街上只有數隻喪屍，而且白天的街道看起來比晚上安全。我們最終還是決定到朗豪坊找食物，因為那裡有很多餐館，而且也有超級市場，更連接著朗豪酒店，可以說是安枕無憂。雖然可能會有很多喪屍，但我們都認為值得一搏。
我們準備好行裝，便從下層鐵閘的門口慢慢走出去，眼看四周沒有喪屍注意到我們，我們立即走過馬路，穿過橫街到達另一條大街。
「哇屌．．．妳見唔見到．．．」我從橫街探頭觀察
「好多喎．．．點算呀．．．」呂晨拉著我的衣袖說
朗豪坊側門的時裝店外都聚滿了喪屍．．．而馬路上都滿滿是棄置的車輛，要進入朗豪坊看來並不容易．．．