明明早該放手 但有眼看不到: 第三集

X：喂，唔該我想搵呀晨。
我：呀欣？ 咩事啊？
 
當然此欣非彼欣，佢唔係眼鏡娘。

佢叫做葉子欣，唉無錯又係子欣，佢係我係以前學校入面少數既好朋友。
 
欣：無呀，見悶搵你傾下計囉。
我當堂有d奇怪，以前同校果陣，佢都好少打電話搵我。





我：咁無聊？
欣：就係咁無聊唔得咩？今日番新學校，有無識到靚女呀？
我：有呀，見到幾個都正過妳架喂。
 
DEAD左，一講完就DEAD左。當我意識到自己好似講錯野，要SAY SORRY既時侯…
 
欣：膚淺！內在美先最緊要呀！好啦，問候完你喇BYEBYE！
 
我都未講BYEBYE，呀欣已經收左線。今次大獲，佢咁就嬲左我？





不過算喇，唔理咁多，佢不嬲唔多記仇既，好似係。

其實呀欣都幾靚…以前成班男仔起碼有一半都鍾意過佢。
而我，其實都一樣，仲表過白…

==========================================================================
兩年前的某天

欣：其實你會唔會想拍拖架?
我：會架，D人唔係話中學，一定要拍下拖架咩？




欣：但係咁你唔會無曬d時間咩？我地又要考DSE。
我：咁我諗我唔打機，都應該有好多時間用既，做咩？有人追妳咩？
欣：係呀…
 
心諗如果自己再收收埋埋唔講，就會睇住呀欣比人溝左去…
於是過左幾天，我就戇鳩鳩咁同呀欣表左白…之不過佢好似無反應咁…

後來佢拒絕左果個男仔，但係又好似鍾意左個男仔，總之就一直拖拖拉拉。
而我表白件事又變左好似無發生過咁。
==========================================================================

沖完涼我就開左電腦，加曬今日拎到既FACEBOOK。
唔知點解愈睇愈覺得眼鏡娘真係幾靚，身材唔錯又夠白。
唔笑果陣個咀角好似少少翹起咁都幾得意喎！





不過這些機會好明顯就不是屬於我的，今日見到陳梓文好似對佢都好有興趣咁。話唔定佢溝緊呢？

正所謂朋友妻，咪走雞！等佢溝到，我先再加入啦哈哈。