叮噹呢套作品根本就揭示世界既七宗罪

叮噹呢套作品根本就揭示世界既七宗罪

首先，主角叮噹就等於暴食。 

原先由未來世界黎而且唔想留係呢個時代，但大雄一請左佢食豆沙包就覺得好好食又感動咁。 

之後決定留係到輔助大雄，原因可以推算係叮噹既主人小雄係未來時代只屬於貧窮線以下既一群的， 

叮噹計算好留係呢到可以享受更高級既生活。所以叮噹好大機會只係為左食而留低。 





再者，好多次大雄搵叮噹幫手，叮噹都決絕。 

但大雄一請佢食野，叮噹就二話不說借法寶比大雄。 

由此可見，大雄同叮噹好大可能係主公同食客既關係。正所謂人為財死，鳥為食亡，叮噹為左食慾甘願 

放棄未來時代所有人和事。所以叮噹正正是等同暴食。 

其次，第二男主角大雄就等於懶惰。 





眾所就知，大雄乜都唔得乜都廢，佢既技能就係1秒內訓著覺，而且每朝返學都會遲到又唔做功課。 

但以大雄小學為例，正常放學時間約係下午3點，大雄就一直玩到夜晚但又會早睡遲起。 

每日就好似一條蟲咁生活，只係玩訓食。 

大雄既懶惰亦令佢埋下被朋黨欺凌既伏線，正當所有書友仔都努力增值自己， 

例如打棒球操肌肉同研究新玩具擴闊眼光。 





大雄就只係到玩緊橡筋，只係埋頭苦幹做d自己比人優勝既小玩意。 

而懶於學習從此令大雄既技能同社會既差距不斷增加，成為食物鏈底層人物，招致被欺負。 

而曾經有人話懶惰既人做事方法係會用最短既時間去做最大成本效益既事情。 

一句唔該洗死人，大雄因為自己懶惰，就用最短時間，即係問叮噹借法寶去完成事情。 

所以大雄正好代表懶惰。 

第三，女主角靜香就等於色慾。 

靜香既朋友圈大致上都係同4個男仔群埋一齊，只有幾次係會同班上其他女同學接觸。 

好明顯，靜香係樂於周旋係咁多位男性之中。 





經常性地同大雄或出木杉單獨會面，會面既地方仲係屋企或河邊。 

靜香知道兩人都對她有意，但依舊咁周旋兩人之間。推斷靜香當兩人都係潛力股，當2隻都係兵。 

最重要就係，大雄多次偷窺靜香淋浴，但靜香就只係小小生氣無一次真係會離開或檢控大雄。 

對大雄七擒七縱，唔洗解釋都會覺得靜香係代表性慾。 

而第三男主角胖虎就係憤怒既化身。 

基本上胖虎每一集都會發嬲，出現得仲密集過叮噹既法寶。 

無論發生咩事，胖虎總有借口係會對身邊既人發脾氣，初則口角，繼而動武。 





例如人地打波打得差，唔借玩具比佢玩都成為佢動怒既導火線。 

但歸根到底，係胖虎既情緒管理同智商太低。 

以欺負大雄為例，每一次對大雄發脾氣後都會比叮噹以各種法寶還擊又或者比家母以暴易暴。 

但胖虎無放棄佢發脾氣既機會，一唔順眼就會發火，最終結果亦不斷循環。 

胖虎寧願被打亦要對他人動怒，憤怒既化身，胖虎當之無愧。

第四男主角小夫則等於貪婪。 

小夫係朋友圈中，佢既家底係最好，每日都有新玩具可以係班朋友面前曬命。 

當鏡頭轉到小夫係屋企既時候，小夫仲會得一想二。 





屋企送最新最好既野比佢既時候，小夫仲會要求更多，例如去旅行又或者買多樣，永遠都唔會滿足。 

而身材矮小令佢係朋友中顯得平平無奇。 

佢為左貪戀權力，不惜以退為進做胖虎跟班，以令自己既聲威係朋友間提高。 

而好幾次，小夫都想對付胖虎，呢個現象反映出小夫並不滿足當下既情況， 

佢貪圖胖虎係朋友做領袖既地位。一連串舉動足以令明眼人睇清楚小夫正是貪婪。 

第六，就要數到第五男主角出木杉。 

出木杉比人感覺就好似天才咁，運動讀書樣樣都好過人。 





係係班上少數無埋堆既男同學，成日就係痴住靜香。但要數到佢，就會聯想起傲慢。 

每一次大雄係靜香面前犯左錯又或者覺得自己好失敗既時候，出木杉都會有意無意出現係大雄面前。 

佢高傲，以為自己既出現一定可以棒打落水狗，令到大雄自覺更失敗。 

例如明明目睹事件，但係大家面前又再問多次大雄發生咩事，令大家都知大雄又犯錯既感覺。 

佢傲慢，又以為自己d功課好少少就爭住教其他同學，覺得自己高一人等。 

呢種性格好大可能亦係佢埋唔到堆既最主要原因。 

所以出木杉唔洗講都知係傲慢既表表姐。 

而最後一種罪就係嫉妒。每一個睇叮噹既觀眾會慢慢成為嫉妒既化身。 

睇得越耐，嫉妒越大。當睇緊既時候， 

你一定會諗過如果我有小夫咁有錢就好，會好似出木杉咁叻就好，我有叮噹幫手就好。 

你會開始比較感家同自己既生活，久而久之，令你現實生活都會有嫉妒存在。 

例如你出街遲到就會諗點解我無隨意門，碰上任何事情都妄想會有各種法寶解決。 

慢慢我地會開始唔抵得點解大雄會有叮噹幫手，自己就無。 

再睇得耐d，你會嫉妒大雄，嫉妒任何一個角色。 

叮噹呢套作品就係活生生體現七宗罪。 

所以當嫉妒既你睇緊叮噹既時候，好大可能係世上最邪惡既一件事。