美國留學點滴: 冇車既日子

係美國留學咁耐，最難挨既時間就係岩岩黎到頭果半年－－冇車既日子。

車，係香港真係身份既象徵。坊間傳言係香港有車就有女，唔理係真唔係，憑呢句我地就明白係香港車係幾咁專貴。

但係黎到美國，車，就係你尊嚴既象徵。有車未必有專嚴，冇車你就一定冇尊嚴！如果你冇車之餘連車牌都冇張，你直頭唔可以叫自己做成年人，因為係美國車牌就係身份証，冇車牌？你仲讀緊小學架？夠18歲就要去考牌是常識吧？

點解冇車冇尊嚴？因為係美國，行人路唔係俾人行，係俾狗行，俾佢地用黎散步架。我懷疑如果班美國佬唔係咁鐘意養狗，其實佢地係唔洗起行人路。想像一下，由尖沙咀去到旺角，剩係得住宅區同公園！士多都冇間，連汽水機都冇呀！你行路丫，行到去太子有間七仔，係咁多，冇架喇。

你問，咁點買送煮飯呀？好彩，佢地係有巴士既，半個鍾一班......係繁忙時間呀。你想星期六下午三點去買送？等啦，一個鐘一班巴士，仲要包保唔準時。當你行完10分鐘去到巴士站，岩岩好2:55pm，諗住搭3:00pm果班巴士，點知等左半個鐘都未到。你問下隔離果個係街邊打等既homeless，佢答你：
「上一班黎早左，兩點半就到左喇，你等四點果班啦。」





卒之你等到四點半，你啤一啤個司機，個司機攤開雙手同你講：
「唔好意思，去左痾屎呀，今程唔收你錢啦！」

係，係美國搭巴士既唯一好處，就係個司機夠hea，hea到有時錢都唔收。

鑑於美國既巴士係咁可愛，大部份冇車既留學生第一日番學做既第一件事，就係識朋友，識個有車既朋友。所以係我地留學生既圈子入面，有車唔單止有尊嚴，仲要有朋友！而冇車果d呢，係你未買車之前，你得兩條路：一係做寄生蟲，依附一個或者n個有車既朋友，出出入入都係靠佢地。一係做獨男，孤獨個獨。點解唔踩單車？傻既咩，冇車，你點去買單車呀？

而我阿葉，係冇車果頭半年，就選擇左做寄生蟲。





做寄生蟲其實冇咩問題，你有正常既社交，你可以出街買送，仲可以得閒無事出街食飯！出街食飯喎，對於冇車既人黎講係不能夠想像，你會唔會為左去食個魚柳包由尖沙咀行去九龍塘？行完，一諗起食完又要行番去，我係你寧願自殺。做寄生蟲既優點真係好多，而唯一既問題就係，有人約你，你要check schedule。唔係你自己個schedule，係你宿主個schedule！你做乜都要睇你宿主頭，佢得閒就得，唔得閒就唔得。買送？問宿主去唔去啦。食飯？問宿主去唔去啦。shopping？問宿主去唔去啦。party？問宿主去唔去啦...以下為真人真事：


「喂阿葉，星期六夜晚七點San Jose有個Party喎去唔去？」

「er...我check下schedule先，等陣call你丫。」

然後我就即刻打俾我同屋Gennifer，問佢：

「Hey Gen，星期六晚車我去San Jose得唔得呀？唔該你丫。」





「下，唔得喎，我約左人五點係San Jose睇戲跟住食飯呀，一係你跟我車五點去，我食完飯再接你走啦。」

結果呢個七點鐘開始既Party，我五點鍾就到左，然後八點鐘就走左。同場既人都心諗：「＿＿＿？」


基本上，做得寄生蟲，你就預左你既生活離唔開宿主，你永遠走唔出佢既五指山，呢一世都台唔起頭做人－－直到你買左架車，正式脫離宿主。