【渠底奇兵】《我，就係踩單車跌落渠果個肥仔》（已爛尾）: 19

今日終於都放學，而我都約左呀晨呀樂同呀洪去音樂室。 

我地間音樂室其實係可以比學生book黎用，不過一次得一粒鍾。 

所以我地三條仆街就可以用三粒鍾！ 

至於呀雪？一放左學就唔見左人啦。 

「肥冬今日我地做咩呀？」呀洪出聲問起。 





「兄弟姐妹們，我想參加歌唱比賽，你地點睇。」 

呀汶講得無錯，一定要下定決心先可以做好一件事。 

而我都好想走出自己既安舒區。況且我覺得自己唱歌都唔係差，雖然無呀晨咁好。 

「會唔會入唔到初賽架？」呀洪今次真係一語中的。 

決賽前係仲有一個初賽的。 





「屌你啦講呢Ｄ？」 

「咁你想唱咩野？」一旁既呀晨已經拎起左音樂室支垃圾結他係度彈緊。 

「我未知。」 

「未知你又叫我地黎？」呀樂都係另一邊鳩按緊個鋼琴。 

其實佢地兩個係音樂上真係天才，或者係因為我廢先認為佢地係天才。 





佢地可以即興伴奏出大部分既歌，即係傳說中既play by ears。 

仲記得上年呀晨就係拎左個歌唱比賽第一，跟手一落台就走去搵呀樂表白送個獎比佢。 

真係連身為好兄弟既我都眼濕濕拍曬手掌！ 

「哈…哈哈……係喎，咁你地有無咩野好提議呀？」 

「其實好睇你自己，我地根本比唔到任何意見你，你覺得有咩歌可以最講到你既感受？」 

「肥冬係咪想唱情歌？唱比肥雪聽，追番佢番黎呀？！！」呀洪講既野真係好鬼廢。 

「呀雪鍾意呀俊，我地應該幫佢同呀俊一齊先岩。」 

「nonono肥仔冬你唔可以講Ｄ咁大逆不道既說話，我地幾個就緊係幫你同呀雪一齊架啦～俊？邊撚到俊呀？最憎靚仔架喇！」呀洪呢句野間接串左我柒。 





「屌你膠洪你好憎我咩？放心啦肥冬我今年唔會參加既！！」呀晨又亂入喇。 

我不知幾想你參加，起碼你穩拎第一，唔洗比條呀俊有機會贏。 

「好心你就唔好自認靚仔啦，靚仔係人地講先係架。」佢女朋友呀樂呢個時候又係度潑佢冷水。 

「丫衰妹咁妳講，邊個靚仔Ｄ？！」 

「……你囉。」 

「仆你地個街，講講下做咩野變左打情罵俏架，你睇唔到我地呀肥冬幾無助先得架？拿肥冬我幫你開左個高登post問下巴打唱咩歌呀。」 

【想響學校sing con度玩野，揀乜歌好？】呢個就係個標題。 





「好啦咁既然開左post咁我地就唔好諗住喇～」呀晨一下子就完結左呢個話題。 

於是我地幾個就變左係音樂室度鳩玩喇。 

呀洪打鼓，呀雪彈琴，呀晨彈結他，而最垃圾既肥冬我就緊係唱歌啦。 

「條女很清楚收兵好過嫁人～～～～～」我大大聲唱。 

老實講我只敢係佢地幾個面前咁樣，多人少少我即淆。 

而係呢個時候，又有人推門而入。 

點解我講又既？？！！