【渠底奇兵】《我，就係踩單車跌落渠果個肥仔》（已爛尾）: 17
「呀冬諗緊咩呀？」呀汶好似察覺到我既發呆。
「下無…無呀。」我一下子從今日下午既回憶出番黎。
不過望住眼前咁識得關心人既呀汶，我心情都無話好差。
「所以如果你鍾意左人地，就要比心機加把勁去追喇！」
佢既聲線散發住一種講唔出既溫暖。
但係我根本就分唔清自己鍾意既係邊一個。
又或者根本我無資格去講我鍾意邊一個。
「哈…如果我有鍾意既人，我會架喇……」
呀汶見我唔認，以為我怕羞唔講，都一笑置之。
「我以前都好鍾意將自己收收埋埋，咩都唔講，好少要媽咪擔心。但係而家媽咪唔係到喇，我先發覺自己已經無機會再同佢講野。有時有Ｄ野當你想講想做既時候，你先發覺太遲喇。」
呀汶一張咁靚既臉孔上帶住淡淡憂傷既神情。
但我知佢心入面既痛絕對比而家臉人既多。
一個女仔，無人無物，媽媽過左身；老豆又要係大陸。於是自己就要住係一個咁陌生既環境。
跟住每日起左身都要一路笑臉迎人。
對我一個咁既肥仔佢都可以付出咁多既關心，可以睇得出佢真係一個心地好好，好堅強既女仔。
「其實妳而家都一樣收收埋埋！」
「嗯？」
「雖然我地識左咁多年，但係我地講過既野可能仲唔夠而家呢幾分鐘多。如果妳有唔開心，可以同我講！」
「我真係好掛住好掛住媽咪…」呀汶既眼淚隨住呢句說話流左出黎。
「其實我根本就唔係你地睇到既咁好…我都會發小姐脾氣同反叛，我都有好多壞習慣，但係而家我知自己唔可以再咁…因為最包容我既人已經唔係度。」呀汶唔算係激動，但係我好清楚望到眼淚不停咁流。
唉最衰都係我，講咩呢Ｄ野。
但係安慰說話真係唔知點講出口。果Ｄ咩野人都走左，唔好唔開心，向前望呀！
講左等於無講。
「呀汶，我屋企即係妳屋企，而我地就係妳新既屋企人。我地都一定會包容妳！」
雖然我真係好想一手攬佢過黎講句唔好喊，我係度。
但係最後都無做到。只好係車上陪住佢。
過左一陣呀汶好似已經喊完左，兩隻手係隻抹走臉上既淚痕。當然我都一早拎住左紙巾隨時候命啦。
話說佢喊個樣真係好我見猶憐，令到人不自覺有一種好想保護佢既衝動。
「我無事喇呀冬…sorry呀本身講緊你既野但係講講下講到自己喊…醜死怪喇…」
呀汶眼紅紅又一臉唔好意思咁，真係好可愛呀！
「唔緊要！以後你發小姐脾氣就發落我度啦！」我霸氣回應！
「多謝你…呀冬，你真係好好人呀！」笑容又再次綻放喇。
屌但係點解臨尾都要派張好人卡先？
話咁快就星期五，今日所有野都好似好平靜咁～當然我都係一起身就見唔到呀汶啦
佢真係好勁呀日日都咁早起身。
「肥仔冬星期六記得去買手機套，買唔到就打撚死你呀。」粗口venus把聲係我腦海中傳出。
「知道喇知道喇！買個貴一貴既好未？」
我笑左一笑，行入左學校門口。其實今年都幾多野要做，下年又要考DSE。
人地成日話無拍過拖就唔算係中學生涯，相信我最後都係單身過。
哈，我都有ＶＥＮＵＳ陪既，起碼佢唔會溝仔同鍾意第個男仔，可以陪我一世。
諗到呢度我不自覺用力握緊自己既電話
「唔該你…你…唔好係度幻想啦，邊個話要陪你成世喎！」
「哇點…點解妳會讀到我諗咩架？！！！」
平時我係可以控制到幾時同ＶＥＮＵＳ講野，幾時自己諗野。
「嘻嘻係咪好撚勁先？不過一次得二十秒，唔止讀到你架，其他人都得～～如果你想用就比一分我啦！」
睇黎係新功能…呢獲我肥冬都要做讀心神探喇屌。
幸運地只係二十秒，如果唔係一個唔小心諗淫野比粗口妹聽到咪死。
「呀冬早晨！」呀雪番到黎，如果話呀汶既笑係好溫柔；咁呀雪既笑容就係好甜美好純真。
「早晨呀雪。」我都向佢報以微笑。
「前日你做咩野扮衝鋒廿一呀？你唔係應該早中場防守架咩？」呀雪對住我膠笑。
以前就話好膠，而家點睇都係可愛。唉～～
「我跑得快過子彈又要話妳知咩？～～」
「唔知係唔係我錯覺，你好似好想跑過呀俊咁…？」
「做咩呀而家係咪跑快少少過左妳男神都唔比呀？」果然呀雪既目光只會停留係呀俊度。
「唔係～我邊似咁小氣既人呀肥冬～」
「唔係就最好啦肥雪！」
「肥冬，果日你入左醫療室，我本身都諗住等你醒番架！但係醒起我要去音樂室果個活動…所以…」
「得啦我明既，有異性點會無人性先得架～」點解總係要講起令我唔開心既事。
「我明明叫左呀樂等你醒番就打比我架，都唔知點解佢咁無記性，係咪食出前一丁食得太多呢唔知。」
「係我話佢知唔洗打既，反正我都無咩事，廢事阻住妳去音樂學會培養感情啦。」
「係…係咩…？不過肥冬你自己咪一樣！」呀雪扮嬲既語氣真係好好笑。
「咩呀？」
「我果日個活動提早左走，諗住去醫療室搵你一齊番屋企，你估我見到邊個？」
唔知點解我有Ｄ不安。
「下邊個？」
「我見到Ｂ班個女神扶住左個肥仔呀！你見唔見到呀？」
今次仆街了。