【真人真事】當年中七AL，我打左成年天堂二，但我無悔！: 65-亞丁戰略 (三)
紫幽所控制既葉，係假目標、替死鬼。
紅樹葉由我番黎玩到而家都冇收過人，就連壬生一族既攻城人員都只係入左分身盟"狼來了"。換言之，as擺係我地同盟既針，最多只能夠接收到同盟頻道以及狼來了既訊息，而我地紅樹葉盟主換左做Σα既事，就只有紅樹葉內部人員，亦即係暗殺、艾爾、soso等等知道－－佢地當然唔會爆響口。
所以，理想世界到目前為止，係我地同盟內收到既情報，就係葉係盟主，而呢個盟主根本唔係戰場上！
…………「正身們留係正門拖時間，火星人部隊就沿鋼索一路跑到亞丁頂部，直接target封印水晶穿牆入封印室！」
此時此刻，紫幽、樹、紅、戰神四人仿佛仍然係城門前揍緊熱鬧，殊不知，呢四個人實際上卻操縱緊火星人部隊，係亞丁既左塔上。
亞丁城堡外城牆既外圍，有四座用鋼索相連既暸望塔。呢四座塔屬於戰場範圍外，所以可以用召喚師進行召喚，而且同亞丁城堡既中心相連，可以直入城堡。
但係用普通方法係穿唔到入暸望塔上，就只有我平時無聊研究出黎既無需target垂直穿牆法先可以穿上塔內。亦即係話，呢個地方，就只有我先可以放到召喚師入去。韓修修佢地，大概發夢都冇諗過呢個位既然可以偷入城堡！
皎潔既滿月，五個魔法陣憑空出現，喚出五條座龍，五人騎住龍係遠離地面既高空鋼索，向亞丁城堡中心狂奔。
我畫面上既"絕望的哀悼"已經斷左線，左下角對話欄顯示既係《別人正在登入你的帳戶》，我知道薰已經登入左呢隻霸主。
「莎莎、薰，準備定位，就到。」我一邊跑，一邊係紅樹葉既血盟頻道發號－－即使係"狼來了"同"壬生一族"都唔會睇呢個頻道。
莎莎手持既，係soso既+500王朝魔杖。
絕望的哀悼，拎住薰既+500伊克魯斯手杖。
五人跑到鋼索盡頭既亞丁城堡中心點，按一按預先設定既巨集「/目標 亞丁守護者」，直跑、等兩秒、落龍，一下子就穿牆入左去封印室！
迎接我地既，卻係……
「仆街！亞格斯同靜心！！！」我係心入面大叫，差少少隱唔住就叫埋出黎：「點解兩條友唔係party都冇人留意到！！？」
但係呢一刻，冇時間埋怨，因為更加重要既係城門前既莎莎同薰，佢地係戰略最關鍵一步！縱然我心入面怒罵狂吼，手卻係鍵盤連按：「sasa team, fire now!!」
…………「當系統出現紅樹葉開始封印，兩隻+500霸主即刻順序放"約束封印"同"睡夢之靈"，範圍定身加訓覺，唔俾佢地走。」
兩隻+500霸主就係防守既關鍵。事前定好位置，一開始封印就將所有理想世界既人定死，因為魔攻高，根本係必中，到時佢地想番入去防守都唔走得。但係而家呢個情況，我根本睇唔到城門前既情況，到底係莎莎等人定身快，抑或係亞格斯等人通水快，我唔知，真係信者先有得救。
呢邊箱，韓修修已經施起魔法狂轟！咒術詩人既連環魔咒，瞬間連出"冰之旋流"、"冰旋巨鎚"－－轟向葉！！
我心頭立時鬆一鬆，韓修修已經中計！
紫幽用+250防，加上騎士天生既高防禦力，硬食兩下+1500既魔法，雖然唔可以話無傷，但仍然頂得下。只不過咁樣已經足夠，因為之後就係我地火星人部隊四打二屠殺既時間！
火星人部隊係為左攻城而生，所揀選既亦係天堂二入面最暴力，專為pk而生既種族－－暗天使。一下狂叫，Σα同Ω同時變成雙翼天使，亦即係暗天使既"最終型態"，所有能力暴增！再加上Σα手持+1000矛所附帶既魔法攻擊力，魔攻居然破萬！我立時施展一個鐘頭只可以施一次既最強魔法－－"雷歐波爾德"－－轟向只有+125防既亞格斯，秒殺！！
戰神既Ω張開雙翼，發出"展翼強襲"瞬閃撞向韓修修，再連招以"爪攻擊"，紅樹二人再各補一箭，韓修修亦都命喪黃泉！
短短三十秒內，五人已經控制整個封印室。我立即開始封印水晶，系統亦同時宣佈《紅樹葉開始進行封印》。
呢個系統宣告，亦同時係宣戰公告。
呢一刻，所有野都正式通天，as呢隻內鬼已經冇存在意義。
葉貼係我身邊，痴住我，為左假扮封印緊之餘，亦為左唔俾人點到我呢隻真真正正封印緊既Σα。
而樹既Σζ、紅既Σξ、戰神既Ω，就係封印室遊走，準備殺敵。
封印其間呢五分鐘，我咩都唔做得。只能夠老老實實企定定等五分鐘－－冇任何奇謀鬼計既五分鐘、考驗信心信任與實力既五分鐘、聽天由命既五分鐘、信者得救既五分鐘。
樹同紫幽係我封印既同時，用事前set定既巨集，係同盟頻道命令所有唔知情仲party緊既狼來了盟員，立即戰鬥。當然，如果佢地夠醒目識執生，並且莎莎又收到正確指令既話，係三十秒前，我講完「sasa team fire now」後，城門應該已經開左戰。
「城門如何？」我懶得用分身無限遠睇，直接係電話問正身就係城門前既樹。
樹回答：「定唔到光頭蒼日韓信等幾隻贊助，不過已經被圍死左！其他定左大部份，盟員穿緊牆入黎防守，紅樹葉照原plan留守城前。」
莎莎果然識做，狼來了既壬生人族人員亦都識執生。但係呢個moment，又係"信者得救"既時間。
理想世界唔係所有人都參加緊pk大會。佢地今日守城得廿幾人，仲有好多人因為連續幾星期宣戰唔攻，根本就冇心機黎守，更有一部份係冇online。
而家既問題係，到底係呢班人用返回城堡卷軸飛番黎+call人online守城快，定係狼來了穿牆衝入黎快？
突然紅大叫：「黎喇黎喇，係蒼日同光頭！」
戰神Ω、紅Σξ、樹Σζ分別就企係封印室門口既左、中、右位置，Ω同Σζ守住兩個門，Σξ係中間支援。
而迎面既，就係一把白光+1000弓，一把黃光+1500弓。
戰神Ω老實不客氣，企定定係上層樓梯口，一見到光頭和尚搭上梯，一炮"死光"就已經發出去！光頭亦不甘示弱，硬食死光後還箭，則面卻又同時受紅Σξ既一記"死之螯針"所創！高手過招，係贊助武器強大攻擊力下根本每一擊都係致命傷，光頭和尚就此喪命！
紅一射殺光頭，就係電話叫：「嘈嘈閉丫喇！」
另一邊箱，樹Σζvs蒼日，兩人既武防都係同級，互射數箭已經冇乜血剩，幸好戰神Ω向光頭發完一炮後，立即用"展翼強襲"閃向左邊門沖擊蒼日，幫佢補上最後一刀。
與此同時，紅又大叫：「韓信衝左入左門！開左禦箭我射佢唔入呀！」
唔洗紅叫，係封印室中間既我早就見到。
韓信一入門，收一收果把紫光雙刀，換出黎左手係一個盾，右手竟然係一把發出黃光既單手劍，直衝向封印水晶！！
