【真人真事】當年中七AL，我打左成年天堂二，但我無悔！: 59-火星人小隊
確立完三盟和約，第二日，我地三盟就拉大隊屠"火龍"。今次，由我用樹既霸主"絕望的哀悼"，再用紅果把+2000王朝弓，向火龍放"生命封印"－－果然都係百發百中！+2000王朝弓雖然唔係魔法武器，但係因為佢+2000，就算本身魔攻再低+完2000都一樣好可觀。
但係同樣既方法，對付"巴列斯"就冇計。巴列斯攻擊力太高，而且佢用既係魔法傷害，除左幾個贊助玩家之外根本冇人頂到佢一下火球，連我隻"葉"二萬幾血(普通弓手得七八千血)都俾佢打兩下就死，真係冇計，三盟聯手都殺唔死。
火龍地龍每兩日重生一次，三盟今日食完火龍，聽日又食地龍，後日又食番火龍。除非唔齊人，否則日日都有龍食，我地三盟壟斷左兩條龍。
呢個現象，維持左六日，直到星期六，奇岩攻城戰既時間。
我當然宣左戰。
基本上，除左海音因為係壬生一族佔有，同盟關係唔宣得之外，其他古魯丁、狄恩、奇岩、歐瑞、亞丁、魯因、高達特，以及戰神皇族所佔有既修加特，總共八個城堡我全部宣晒戰。
所以，成個星期六，我地紅樹葉差唔多全日個頭頂上面都有個紅色劍logo，標示我地係攻城方。
…………
呢一切一切，包括和約，包括宣戰，全部都係為左攻亞丁做準備。
…………
下午三點鐘，狄恩攻城戰。
好耐以前，狄恩係屬於"三聯幫"，由我地紅樹葉同三聯幫聯手打番黎。而家，狄恩已經變左做小盟"風之谷"所有。而我同紅兩個就去左參加狄恩攻城戰，當然係屬玩票性質，風之谷係補刀事件後已經成為我地既友好盟之一，今次佢免費借個城俾我地做實驗。
風之谷一眾人係普通玩家，即係既唔識"穿牆"，又唔知"贊助"，佢地係遠離真相既一批，活係自己既天堂入面。所以我地做實驗，都要守規矩，唔用穿牆，唔用+2000弓，以免佢地被踢出伊甸園。
「狄恩，我地紅樹葉發跡既地方，好耐冇黎過呢邊。」
的確，狄恩係超低級地區，平時根本冇人係到出現，我更加唔會走黎呢到。
我有點懷念。
攻城開始，我用creamyonion，即係我隻工匠分身，召喚攻城高崙破牆。
係風之谷零防守下，五分鐘左右我同紅就打左入內廳。
然後我再用teleport衝入封印室，準備進行實驗。
第一個實驗，其實以前都做過，就係係戰場內到底可唔可以召喚戰場外既隊友－－因為上次實驗之後私服改左板，係正正式式攻亞丁之前，我要確定多一次。
結果好驚訝，係唔得，召喚失敗！改板後真係有影響，以前係可以召喚，而家竟然唔得，好彩我細心check一check！
我再試下召喚戰場內既紅，結果成功。
換言之，係戰場內，召喚師只可以召喚同樣係戰場內既隊友。
咁戰場外召喚呢？我又跑出狄恩城堡外面，再召喚係封印房入面既紅，得左！
即係話，係戰場外面，乜人都召到。
召喚實驗就係咁多，然後係第二個實驗－－射程實驗。
我又跑番入封印室，係封印水晶既台前，同紅講：「紅，你換把愛心弓，用"/目標 id名" 指令target我，係封印室門口睇下最遠係咩位射到我。」
愛心弓，顧名思意，係一把充滿愛心既弓，冇攻擊力，玩具弓一把。
呢個實驗既目的，就係睇下係被人用"/目標" 指令target下，有咩位置可以反擊。
仲記得，最後一次奇岩守城，我就係被人target左，連敵人既影都見唔到就俾人射死左。只要一日咁樣俾人target，一日都冇可能攻佔城堡。要係日殺手上搶走亞丁，破到呢點就係最關鍵。
紅聽完後，就係內廳既皇座上面，target左同樣係內廳既creamyonion，射左佢一箭，答我：「係皇座就射到喇。」
我真係冇咁好氣：「頂，叫你target封印房入面隻teleport呀，target creamyonion托咩！」
紅試多兩試，終於都俾我搞清楚果陣敵人企係邊個位。紅就企左係封印室門口旁既牆後面，果個位紅係見唔到我，封印室內亦都見唔到紅，但係奇就奇在，系統判定果個位紅係見到我，可以向我射擊！
天堂二既弓手要進行攻擊，首先你要target左個目標先，然後要系統判定有冇障礙物遮住，如果冇，先可以成功進行射擊。所以，好耐以前我地奇岩第一次守城，可以用巨型高崙擋住平頭和尚既視線，等佢空有一把神弓卻射唔到門。
但係呢個障礙物判定系統係怪怪地，好多時候，例如今次，紅明明睇唔到我都會被判為冇障礙物，於是我就成為箭靶。
我又用另一隻弓手分身，尋找另一個係封印室內可以反擊到紅，但係紅又睇唔到既位置。
冇，結果係冇，一個位都冇。
係封印室內，系統判定係睇唔到紅，即係冇得還拖任佢射。
所以如果要佈防，就一定要佈係封印室外，即係大廳。但係大廳，就係一個空曠既大廳，我地人已經少，仲要佈防係果到，根本同送死冇分別。換句話說，封印其間果五分鐘防守，係一場硬仗，只能夠硬碰硬，實力話事。
但係硬碰硬，人地有兩把+1500，其中一個仲係法杖，有乜計？
出乎意料，紅居然諗到方法：「係戰場上面target，佢地都用巨集set定個指令先，唔會係即場打加麻。如果佢地巨集target錯左個目標，咁咪射唔到你，阻唔到你封印囉！」
紅呢番說話，唔理佢點諗到同本身意思係乜，我get到既意思就係，換人，fake佢！
佢地以為我會用葉黎封印？我偏偏用第二隻黎封印，係戰前果一日換比隻分身做盟主，咁到時葉就係替死鬼，分身先係封印果個，good！
於是，我開始秘密同樹，每日凌晨都練我地既火星人小隊。
火星人小隊，一共六隻，全部都係用希臘字母做名，分別係：Σα(Sigma alpha)、Σξ(Sigma xi)、Σζ(Sigma zeta)、Ω(Omega)、Θ(Theta)、Γπ(Gamma pi)。
目的，係為左fake佢之餘，仲要佢打唔到個id名，等佢冇得即場set番個"/目標 id名"指令，完全冇得target！
