【真人真事】當年中七AL，我打左成年天堂二，但我無悔！: 5-公平與機會

我：「仆街，咁即係玩bug姐，咁唔fair都得既！」

係門外既咪嚕、暗殺等人見到我同樹消失左，個個都係到問咩事。

我：「你地點我交易啦。」

天堂二係可以同死人交易。只要夠近，隔住道門都可以交易，所以我呢條死屍係可以隔住道門，俾條龍俾咪嚕。如是這，周星星、咪嚕、暗殺、地獄、艾爾五人全部都撞晒入黎，我地七個人一齊訓係地板，大家都好驚訝。

突然間，似乎係因為聽到呢邊既怪物聲，對面道門穿左兩個人入黎，竟然係理想世界既人！一個叫亞格斯，一個叫靜心。亞格斯係先穿出黎，一出黎就立即被圍，但係亞格斯拎起雙劍用普通攻擊逐隻斬斬斬，斬一刀就死一件，居然斬死晒五十幾隻怪！





靜心行過黎問：「洗唔洗幫你地復活？」

阿葉：「um...唔洗喇，多謝，我地觀光only。」

靜心：「886。」

然後兩人就召龍，用同樣周星星教我地既方法，穿番入去第二道門。

……





淺綠色既隊伍頻道上，七條屍體中既咪嚕最先出聲：「亞格斯咁勁既，勁到有點兒唔尋常！」

暗殺都話：「一刀一件，有乜可能？」

而周星星卻好似見怪不怪，講左句：「只要日日係到打，賺到錢買裝就有可能！」

佢地俾亞格斯既戰鬥力吸引左，忘記左穿牆bug呢件事，係幾咁大件事！

我：「你地唔覺得呢件事好唔公平既咩？我一定要講俾所有人知！」






我冇再理佢地講乜，出左桌面打開broswer，準備係私服論壇爆料。就係呢個時間，電話響起，係阿樹：「唔好爆住！」

樹：「你諗下，爆左出黎，一係全世界都識入黎，一係fix bug全世界冇得入黎，無論邊樣對我地都係冇著數。反而理想世界之前打落咁多錢，就一直都係咁多錢，我地永遠都追唔到，明唔明呀？你唔係想攻奇岩咩？呢個就係最好機會！」

我：「好唔fair喎成件事！」

樹：「冇話公唔公平架，個bug擺係到，睇你發唔發現到姐。就好似海盜既藏寶圖咁，人地搵到藏寶圖拎到寶物，唔通又叫唔公平？你明唔明呀？呢d叫機會，就差在你珍唔珍惜，把唔把握到呢個機會！」

樹呢番說話的確無懈可擊，藏寶圖既比喻，我完全反駁唔到佢。
我：「ok……我唔爆住，你俾我諗下先。」


我打開私服既官方網站，click入血盟專區，search "理想世界"：





等級：7級
人數：108人
盟主：靜心
城堡：亞丁

……
我又search"紅樹葉"：

等級：5級
人數：40人
盟主：葉
城堡：無

……
樹講得岩。唔理佢公平與否，想攻下奇岩什至亞丁，眼前就只有呢個機會。





「呢d叫機會，就差在你珍唔珍惜，把唔把握到呢個機會。」