【真人真事】當年中七AL，我打左成年天堂二，但我無悔！: 97-END GAME

或者係二月改板既憧憬，或者係GM臨時條款既作用，無論乜都好，紅樹葉、壬生一族，從此再未同理想世界開過戰。

雙方打王既打王，賺錢既賺錢，各從其位。所有人從殺戮中解放，各自尋找樂趣，光頭繼續日日流連奇岩搵人隻抽，樹繼續日日係恐龍島打錢，大綠繼續日日同理想世界鬥搶王……

呢段美好時光，總共維持左三日。

係我去美國前既三日，十二月八號既早上，我照常上線。

打開lineage2.exe，入id leaveleave，入密碼*********……





出現既，唔係平時既登入條款，而係……

《未能連接到伺服器》

打完id pw後，我只得到一句《未能連接到伺服器》。

我以為個服有咩update定hang機，於是上私服官網睇下有咩公告，結果係－－404。

拎起電話，我打俾樹：「上唔上到私服個網？」





樹試完，答我：「上唔到，可能改緊野。」

咁快開始改板？唯有等下。

一個鐘後，再上，404。

半日後，仍然係404。

廿四小時後，都係404。





兩日後，404。

「關左服。」我同樹講。

樹只以四字真言回應：「屌佢老母！」

一直到我飛左去美國，開學左一個月，到二月中，依舊係404。

所謂既改板，從來都冇出現過。

由果一日起，呢個私服就咁憑空消失左，GM亦都消失左，經營一年既紅樹葉亦從此唔再存在係世上。

一覺訓醒，登入唔到，從此玩完－－一切就係咁兒戲、咁簡單。

理想世界、紅樹葉、壬生一族，全部都不復存在。





唯一存在既，可能只有一眾贊助玩家，用黎買武器果筆錢。

我有時係到諗，到底係果一刻，係發現《未能連接到伺服器》果一刻，係發現自己永遠再冇得登入既果一刻，靜心、光頭、亞格斯、蒼日、地獄、暗殺、小愛、艾爾、soso、莎莎、大綠、小綠、小明、p仔、等等等等玩左咁耐既玩家，到底係諗緊乜野？

佢地有冇後悔過，放左咁多時間什至金錢係呢個冇結局既虛擬遊戲入面？

冇。

至少我冇。

因為我知道，呢個虛擬既網路遊戲，比現實更加真實，我係入面學到既野，冇人可以教到我。

……





私服shut down，除左樹講左句粗口之外，所有人，包括我，包括紅，出乎意料之外，全部人都唔覺得意外。

或者我地全部都預左有呢一日。

遊戲始終都係遊戲，唔會有一隻遊戲可以玩成世，所以結局我地一開始就知道，冇話咩準備唔準備，完左就完左，life goes on。

昔日既戰友，隨時間流逝，亦都好少再聯絡。

什至我地紅樹葉三人，係我去左美國後，都比較少聯絡。

大家都有各自生活。

紅繼續讀佢既三大神科，又上莊又盛，據聞係校內活躍份子，一講個朵係人都識果隻，食女無數，畢業後繼續係三大讀master。

樹後來係薰手上拎到另一隻online game aion既公開測試account，轉戰aion，其間由asso轉讀top-up，一直玩到top-up degree畢業後，開始創業。





我係美國由college開始讀起，橫行無忌，走堂遲到樣樣齊，play hard work hard，最後上左ucla，honor畢業，又去左英國讀master。

空閒時間，通常都係香港時間凌晨時份，一個月可能有兩三次，咁岩我地三個都好得閒又訓唔著既時間，係skype見到面，大家就會一齊打下aoc，傾下計咁。

有時候，我地都會講番呢段往事。

每次一講起，紅樹都會話：

「你橫掂寫開blog，不如得閒寫個故講下呢段經歷啦，應該幾好睇。」

我都只係笑笑口打哈哈。

雖然我中五就開始寫blog，但係寫故，我從來冇呢個打算。





寫故喎? 一黎又未寫過，二黎寫完冇人睇又冇癮，三黎我邊有咁得閒坐定定寫故……

我從來都冇考慮過要將呢段往事寫出黎。

如是這，就咁過左四年，一直到我係英國讀master，日日龜係電腦前面寫論文，悶到手指都抽筋，開始忍唔住，周圍搵下野搞。

我不斷上網download game玩，唔理好醜係game就download，打爆就換第隻，連小朋友齊打交都玩埋。

結果一次，裝裝下game，居然話我部notebook唔夠容量。

check一check，先記起原來當年，我去美國果陣，將部份天堂二既相過左入而家呢部notebook到，係my picture佔左幾十GB。

然後，就開始遂張遂張睇……

一路睇……咪嚕……狄恩戰……高考離場……+2000弓……火星人……亞丁戰……搶龍戰等等等，全部都番晒黎。

然後，念頭轉一轉，我打開notepad，開始動筆，寫呢個故－－

當年中七AL，我打左成年天堂二，但我無悔！

THE END.