【真人真事】當年中七AL，我打左成年天堂二，但我無悔！: 95-火龍爭奪戰 (二)
紫幽：「有弓手係湖底，唔好行埋橋邊。」
小明：「準備噴火小心！」
香草：「岩岩被一箭秒殺。」
煌：「我番黎了。」
紫幽：「遠離橋邊，湖底有弓手！」
p仔：「邊到開緊戰？」
大綠：「打霸主，係海底！」
壬生一族第一次主動開戰，仲要係遭遇戰，同盟頻道簡直亂到七彩，指令亂飛，毫無指揮作用。
但大綠一句「打霸主」，倒吸引我注意。
我立時望一望海底，果然理想世界隻+1500霸主，"創世之神"就係海入面游緊埋黎。
毫無疑問，我軍在場所有人，包括我地紅樹葉既贊助部隊，根本無一個人有能力抵擋+1500霸主既封印。
橋上範圍細，只要霸主游到我方橋底，一個封印，我地全部人都無何避免一定會中招，然後又定身又減速又減能力乜都中齊，一奶野就等死，呢隻霸主係我軍惡夢。
我立即向電話叫道：「樹，海底霸主，快殺！」
樹帶領既一隊紅樹葉盟員，相對於壬生一族雜牌軍，就妨如受過正式訓練既作戰部隊一樣，對突發事件有靈敏反應。樹一聲令下，數人隨即縱身跳下海。
但橋對面既蒼日一直都釘住樹，樹係人群中突出，向橋邊跳下，蒼日就立即往橋邊一衝向湖面放箭，再加上湖入面埋伏既弓手，樹等人剛剛落水，連作戰姿勢都未擺好，就已成浮屍，更莫論阻擋霸主。
樹無啦啦中伏死，唯有向我投拆：「頂，海底有伏你唔早講！」
我冇理咁多，立即向盟頻問：「有冇娃娃快幫火龍加魔攻魔防！」
樹阻唔到霸主，唯有借火龍趕佢走。
但呢句說話出現幾秒都冇，就已經被同盟頻道眾人七嘴八舌洗板洗走，現場咁多娃娃一個郁手既都冇。
樹睇唔到紫幽話湖底有伏，係一個証明，而今次，由再一次証明－－呢一刻既同盟頻道，完全冇任何指揮作用，根本冇人留意到同盟頻講緊乜。
但同盟頻道係紅樹葉同壬生一族戰場上唯一溝通方法，我唯有把握時間，打開巨集，輸入一句"退回競技場中心！"，儲存巨集，拉去第一個快捷鍵，立即f1連打：
葉：「退回競技場中心！」
葉：「退回競技場中心！」
葉：「退回競技場中心！」
《由於頻密發言，你已被系統禁言十分鐘。》
《由於頻密發言，你已被系統禁言十分鐘。》
《由於頻密發言，你已被系統禁言十分鐘。》
《由於頻密發言，你已被系統禁言十分鐘。》
「屌！」
電話裡頭既樹問我：「咩事？」
「被系統禁左言！幫我叫佢地退，要死都要入左門口先死！」
樹自然明白我既意思。
競技場係系統設定既pk場，只要係場內死亡就可以選擇番去競技場預設既重生點－－競技場入口大廳，果到有系統既回血貓、buff貓，係果到基本上我軍可以無限補給。但如果係競技場外死亡，亦即係係門外既橋上戰死，就冇得番入競技場入口大廳，只能夠係附近隨機陸地上重生，又或者番城鎮或自己城堡。競技場整個都係湖中心，換言之，係隨機陸地上重生，我軍就會被隔係橋外！
咁理想世界就會霸左整條橋及火龍，以及而家由我地佔領既回血貓及buff貓！
但驅驅三行字，係同盟頻道只能引起小注意。樹既提醒亦冇多大作用，更多人根本冇留意到呢個雜亂無章既同盟頻，依然自顧自作戰，死既死、傷既傷、打既打、殺既殺。
然後，海底霸主就位。
一個約束封印，過半數被定身。
緊接……絕望封印阻絕封印極限封印疫病封印寒冬封印火焰封印黑暗封印遲緩封印生命封印……全中。
接連……七箭鬼刺冰旋巨鎚多重射擊死之螯針精神裂破墜星術隕石術波動劍震炎之旋流風旋重擊火炎之鷹………全滅。
SM。
一輪屠殺，我方被分成兩邊，一邊僥倖睇到指示，及時逃回競技場，另一邊被定身，全數陣亡，屍體滿佈橋上如同地毯一樣。
大理想世界兩個血盟，無視我方勢力，已經踏上地毯開始進餐，攻擊被卡係橋中心既火龍。
而我，仲禁緊言。
紫幽施令：「重生番城堡吧，我用召喚師召你地入競技場。」
或者係死亡令各人冷靜下來，同盟頻道異常清靜。唔需要重覆，呢一個命令清清楚楚打入各人眼裡，一聲令下屍海頓時消失。
處理召喚師等待集合既時間，理想世界一直係外面食緊火龍。
紫幽問：「有冇方法可以搶番黎？」
冇人回話，
心知肚明，其實火龍已經搶唔番。
我趁空閒，企係競技場中心用無限遠望一望出面班人。唔知係錯覺定咩，感覺閃白光+1000既，又多左。而蒼日，居然用緊一把黃光弓，都唔知到底光頭果把弓，定係新買番黎。
再click一click果隻係橋面凸出黎既火龍頭，只見身中無數封印既火龍巴拉卡斯瘋狂噴血，面對光頭爆狂狂斬，加上一眾贊助怒射，噴血速度同我地自己打札肯蟻后等小王局然相差無幾。
我同樹講：「唔洗搶喇。等我地集合得黎佢地大概已經開完餐，散埋band。」
樹回話：「睇緊，同意。」
我地兩個都冇再出聲，亦冇向同盟回報，由得壬生一族繼續召喚盟友。
結果，理想世界以破記錄極速二十分鐘食左條龍，注意，當初全服屠龍用左超過一小時，而且，佢地今日仲要係唔齊人。
壬生一族只不過剛剛補好晒彈藥，都未召齊人同娃娃，條龍就冇左。
理想一食完龍就拉大隊走人，大概去左分寶物……留低我地一班人係競技場內發呆。
話檢討戰事，唔係。話商量對策，又唔係。話一齊玩，都唔係。
總之，就係發呆。
一個人經歷完大事，情緒難以平伏，就需要一D時間，坐係到，發呆。
壬生一族首戰，幾乎完敗。
良久之後，蒼日係世界頻道講一句：
「我呢句說話，送俾不指名既某人，要管人先管好自己！乜野叫我地食晒D龍？我都就快成個月冇食！你有種就大聲D，講多次！」
我回應：「？」
佢個不指名，我真係唔知邊個，可能有人密頻鬧佢？可惜蒼日唔理我。
大綠係白頻問：「佢係咪係到發神經？」
樹都係白頻回答：「唔洗理佢。」
只不過，火爆既人何其多，就算唔計我地盟，壬生入面一樣有火爆人士，一場嘴炮大戰就係世界頻道展開，然後好自然光頭等人又再次參戰……
我睇見就心煩，索性關左世界頻道。
其他人一早已經走晒，仲留係競技場既，就只得番我地幾個核心人物，算係可以談心既人係到。成班人發完呆，又冇心機打怪，就順著話題係到用白頻傾計。
紫幽：「你地應該有發現，我最近上線時間，愈黎愈少。」
大綠：「我呢幾日一直係到掛網。」
小明：「我都幾乎只係掛網……」
大家都知原因係乜，我地紅樹葉一早就進入左呢個狀態。
大綠：「我仲差一隻暴君就練晒咁多職業，到時可能就唔玩了。」
樹：「你地都諗住走？」
小明：「個服咁樣搞法，玩起黎冇意思呀。」
大綠：「其實呢幾個月黎，感覺上線人數一直都下滑緊。」
soso：「嗯，感覺以前比較多人。」
莎莎：「因為風之谷散左麻。」
大綠：「唔止喇，有好多人都冇再玩，而家奇岩亞丁見黎見去都係得我地三個盟。」
突然小明爆出一句風馬牛不相及：
「啊，光頭又show左出黎，仲要係世界頻道！」
到底show左d乜野可以引起小明咁驚訝，仲要用個"又"字？我唔洗開世界頻道都估到。
大綠：「佢好似錯頻……」
樹：「影相！」
莎莎：「又係咁……」
soso：「買完武器，一定要耀下武揚下威，佢班人就係咁既心態。」
樹：「冇錯，如果唔係光頭呢班人咁既心態，三盟其實唔洗開戰。」
紫幽：「有可能再回歸三盟和平嗎？」
樹：「坦白講，而家同以前情況唔同。以前有紅、有戰神係到，佢地唔夠打先冇咁惡。而家紅又冇玩，戰神又消失左，佢地咩人都唔怕，我地根本冇本錢再去傾。」
樹講完呢句，突然間，白頻出現一個大家好熟悉，卻又好陌生既人，講左一句：
「仲有我。」
我心裡暗吃一大驚，同時間白頻已經連續彈出幾句：
「GM！！你幾時係到！？！」
「GM大大！」
………