【真人真事】當年中七AL，我打左成年天堂二，但我無悔！: 72-D-Day (一)
十一月十六日，攻下巴列斯既三日後，亦係攻破亞丁城堡既兩星期後，係一個好特別既日子－－亞丁守城戰。
呢一日，係值得記下既一日，佢既意義遠超於守城戰本身。
……………
今日既例行伺服器維護有少少耐，維護左成個鐘，仿佛係為黎緊既大戰做好準備一樣。
登記攻守城既NPC上面，列出左所有參加戰爭既血盟：
攻城方：日殺、狼來了
守城方：紅樹葉、可愛家族
單憑呢個登記名單，根本就睇唔出邊邊係真正交戰既雙方，更加睇唔出交戰雙方既實力差距。
真正既名單，其實應該係咁：
攻方：理想世界、日殺
守方：紅樹葉、壬生一族、狼來了、風之谷、夢幻無限、可愛家族
壬生一族既人，同上次攻城一樣，全數歸入狼來了，係系統上屬於攻城方。而風之谷、夢幻無限，礙於佢地分別佔有狄恩城堡同古魯丁城堡，佢地全數歸入可愛家族，係系統上屬於守城方。
人數上，我地守方比攻方多好多，但實力上，恐怕冇乜分別。
為左方便，風之谷、夢幻無限、可愛家族呢個同盟，我俾個名佢叫"可夢風同盟"。(真心唔記得左佢地當時個同盟叫咩名，唔好意思。)
"可夢風同盟"係一眾基層玩家既代表，佢地唔識穿牆bug，唔知有贊助武器。佢地就好似當初既我一樣，+100武器已經覺得係神物、遙不可及，因為佢地大部份都只有安定值既+20武同+6防。佢地係最多數既玩家，亦係活在金字塔既底層既玩家，係紅樹葉同理想世界呢兩個金字塔頂端者既戰爭當中，呢一班平民既戰鬥力根本可有可無。一個+2000，一個+20，點打？+20既就算再多都只係一群螞蟻。
但係螞蟻要爬上塔頂，其實好容易。關鍵只在於，有冇一個位於塔頂既人附佢一把，講一個秘密俾佢地聽。
呢個秘密，gm唔會想公開，理想世界都唔會想公開。
正因為咁，可夢風同盟，呢一班最低層既螞蟻，可夢風同盟，就係我既守城計劃入面既關鍵！
七點半，離攻城仲有半個鐘，但係雙方人馬一早已經齊集係亞丁城堡。
我打個招呼：「咁早到，食左飯未？」
韓修修回答：「早就食左，有心。」
我繼續"閒聊"：「我地請左可愛家族黎幫手守城，你唔介意丫麻？」
韓修修：「你真係多朋友。」
我細心地核對緊我既情報網，順手回應：「可能我靚仔掛！」
as放係我地同盟入面既針"超級小刀"依舊係狼來了入面，安心地扮演佢既劉建明。但我丁點兒都唔關心佢，一隻現左形既無間道，仲有咩好驚？我關心既唔係劉德華，而係林家棟－－未現形既無間道，比現左形既可怕十倍。
一路核對雙方人員既在線名單，果然又比我發現一隻，同日殺入面一個叫"寶貝"既人同ip，呢個人既分身居然就係我地紅樹葉入面！紅樹葉攻佔亞丁後就開始吸納新血，呢隻無間道正正係呢段時期混入黎，仲要係我親自所收，叫做"尖頭拉瑞"。
我即刻click入去寶貝既profile睇，創建日期只係個靚月前，係相對新既玩家，立時心生一計。
「又俾我搵到隻鬼，係尖頭。」我同樹講。
「踢？」
「唔洗。」我答。
我用火星人Γπ(Gamma pi)，係呢刻佢係狼來了既盟主，向盟內成員下令：
「你地而家聚係正門既橋上面先。陣間攻城開始我就會係城門前插旗，用支旗做根據點係正門同佢地打。到時可愛家族會負責打頭陣，一定要死守支旗。仲有尖頭會係同盟頻道隨時放料俾我地，一定要留意，唔好關同盟頻道。」
「啊！尖頭即係尖頭拉瑞？」小綠問。
「係，理想世界班人on99以為放左隻內鬼入我盟，殊不知佢本來就係我放入去既。」
結果係開戰前既三分鐘，我就見到寶貝消失於日殺既血盟名單上。
日殺既盟主早就換成一身鐵甲既韓信。而巴列斯介指，俾韓修修bid走左後，唔洗問都係韓信手上。
巴列斯介指同其他boss飾物唔同既地方，在於其他boss飾物帶兩個只會發揮一個既效果，而巴列斯呢粒，係可以壘加效果。自從三日前我地第一次攻破巴列斯後，呢隻王就俾韓信包左。同其他王唔同，巴列斯最麻煩既地方只係擋唔到，只要擋到，兩team人就夠殺。係呢三日，韓信好可能已經打齊兩粒巴列斯介指，魔防壘加，12%再12%=25%，絕對係一個大麻煩，但係我地無計可施，完全吹佢唔漲，唯一既辦法係－－圍佢。
仲有兩分鐘。
兩軍人員早已開始施buffs，駐紮靜待。
面對正門，係廣場上駐紮既，就係日殺、理想世界大軍。
面對呢班聯軍，我方係正門既防守人員，係可夢風同盟以及壬生一族。
一分鐘…
所有buffs都施完，兩軍縱橫列隊、屏息靜氣，等侯系統宣判。
八點正。
《亞丁攻城戰開始》
韓信係廣場上揚起日殺既血盟旗，Γπ亦都係正門前，護城河上既橋揚起狼來了既旗幟。
Γπ，亦即係我，舉劍向天，望住正前方，果支隨風飄揚，日殺既紅色血盟旗，大叫：「Goooooooooooo！」
一聲令下，兩軍衝前，總數過百人，就係亞丁城堡正門前既廣場互雙衝鋒！
憑藉人數，我軍居然將日殺既衝鋒硬生生地擋下，日殺被逼於廣場上交戰，與我軍撕殺。礙於"贊助武器不得殺普通玩家"既規則，係"可夢風同盟"面前，理想世界就只能夠使用+100武器。經過靜心同樹兩次泄露贊助武器既秘密，大家都知道呢d火係玩唔起，gm原來真係會del武器，結果金字塔底既螞蟻到頭來卻成為我地紅樹葉既守護牆！
但武器唔用得，防具卻完全冇問題。撕殺數分鐘，亂軍中忽然殺出三人，衝向正門，正正係最強既盾韓信，以及光頭和尚同韓修修！
韓信無敵既鐵甲如箭衝前、勢不可擋，帶領其餘二人，完全無視可愛家族+20巫師群既魔法球，頭也不回一味向前死衝，佢地既目標，唔洗問當然係拆旗！我係橋上睇住佢地三人畢直地衝前，一眼就明白，呢招係聖騎士既得意技"信念之盾"，加防之餘再幫隊友硬食90%傷害，用係韓信身上簡直係犯規！
「退！番黎圍韓信！！！」我控制既火星人Γπ身先士卒，就係橋上，第一個……閃走－－係說話既同時，我已經被係封印室入面待機既小草召走左。
而廣場上既可愛家族、狼來了兩盟大軍，就係為左韓信等三人，完全不顧撕殺中既敵軍，係亂軍當中抽身向後方撤退，守護盟旗。
一時之間，本來膠著既大勢，就隨住三人衝鋒被完全打破！
紅已經等到唔耐煩，係電話入面問：「到我出場未？」
我已經切換成騎住飛龍，依偎係亞丁城堡最頂既Σα，亦即係紅樹葉盟主。地下既大軍去勢盡在我監察之中。我軍一後退撤回橋上，日殺眾人就起勢窮追猛打，不消數十秒既工夫，戰場已經由大廣場收窄至橋前……
「到。」我以單字回應紅。
話畢，一直埋伏係外城牆外面，由紅所帶領既紅樹葉贊助部隊，就用穿牆橫空而降於日殺既旗前！企係旗前護旗既亞格斯同蒼日，面對突如其來既贊助部隊，一下子驚慌失措手忙腳亂，立時被圍殺。贊助部隊就係大軍既後方，偷襲日殺既盟旗！被引至橋前既大軍已經趕唔切返回後方，居然把心一橫全軍湧上橋，要拆番狼來了支旗，打算同歸於盡！！
第一個衝上橋既光頭，換出果把黃光弓，不停向狼來了盟旗放箭，雙方猛攻下，兩軍既盟旗連半秒都頂唔到，一瞬間，攻城名單上既兩個血盟同時失去左自己既血盟旗！
亦意味住，由呢一秒鐘開始，狼來了、日殺兩個血盟死亡既人員，將唔可以係戰場重生，而要去到"獵人村莊"復活。
我依舊係塔頂，默默望住地上一眾螞蟻。
韓信果套唔知+幾既防具，係一群+20為主、少數+100既玩家當中，實在萬夫莫敵，縱然我方人多，卻只能任佢橫行。
身在"可愛家族"既風之谷盟主美國風同我講：「你話佢可以一打一百，喇果陣我睇完巴列斯都仲係半信半疑，但係岩岩我個水爆，扣佢幾十咋喎！而家信晒喇！」
我回答：「哈，你估你地六十億咁易賺既咩？」
冇錯，"可夢風同盟"係我用每個盟二十億，總數六十億買番黎既傭兵。相熟還相熟，冇啦啦人地點解要幫手守城？只有金錢先係最能夠打動人既方法；金錢先係最直接既說服理由。用六十億買一個"禁贊助武器"既防護罩，守住下兩個星期將會得到既百幾億收入，好化算。
重點係，呢個防護罩，係單向防護罩。
拆完旗，我軍既贊助部隊就從後殺回橋上，憑藉手上既2000、1000、500……向理想世界眾大開殺戒！