《妳做咩將成碗譚仔倒落我個頭上面！？》: 第十一章
第十一章
我訓係床上面，輾轉反側，徹夜難眠。
腦海浮現出既，係阿娜同佢新男朋友開心嬉戲既畫面。
唔知道呢個SAM係幾高架呢？係咪好靚仔？有無我畫畫咁叻？佢知唔知道阿娜唔中意食蕃茄？佢又知唔知道阿娜最中意水晶飾品？
唔知道……係我定係阿SAM，了解阿娜多D呢？
唔知道大家有無試過，自己愛一個人，然後望住佢去愛第二個人，個一種說不出的壓力呢？
我唔可以擔保自己仲係好似以前咁深愛著阿娜。
但係佢既身影從分手個一日起，再無離開過我腦海。
混混噩噩既生活，就全靠每一日番學放學既時候，經過載滿同阿娜甜蜜回憶既地方，先令我既心再次回復生氣、感到甜絲絲。
但好諷刺既係，回憶終歸回憶。
記憶係甜美既，現實係苦澀既。
每當我一諗到阿娜已經離開左我，我就硬係覺得……
覺得……有D嬲。
我嬲佢點解要俾呢D回憶我，然後又狠狠拋低我。
不過望住呢封信既時候，我又算唔上係嬲。
我無嬲佢識左第二個男仔，反而係覺得，有D感慨。
或者應該話，我無資格去嬲、去呷醋。
呢種感情，好複雜、好複雜。
如果要形容既話，我只可以話係，
我見證住太陽一天既日出，去到最盛放既中午，再去到末梢既黃昏。
雖然明知太陽總會係黃昏後換成月光，但係自己總係唔想太陽太快消失。
月光終歸都係皎潔咁懸掛係半空上。
面對住太陽既絕情，我似怒卻不怒 ;
因為我知道，太陽必定要走。
望住面前既月亮，我似怒卻不怒 ;
因為我知道，月亮必定會黎。
最後，就只剩下作為旁觀者既我，獨個兒感慨。
*********************************************************************
「你老母搵你！你呀爸搵你！JOJO搵你！你姑媽搵你！你……」
屌！邊個較埋呢D咁撚嘈既鬧鐘鈴聲架！
我一野彈起身，閂左個鬧鐘佢。
「七點半……七點半！？弊！！」我勁驚訝咁講。
傻啦，我先唔係遲到！
嗯……我既意思係話，如果唔係約左芷翹7:50 a.m.去Canteen買檸檬茶既話，我應該唔算係遲到。
極速梳洗之後，我求其飲左杯暖水就出門口。
「唉屌遲到喇！！！」我望住手錶上面指向9字既分針，一路狂奔番學校。
最衰都係琴晚訓得唔好啦，搞到我遲左起身！！！如果遲到既話，要罰我請佢飲兩包檸檬茶架！！！
琴晚……阿娜……檸檬茶……？
*********************************************************************
我攞住阿娜拋俾我既5蚊，好開心咁彈下彈下落左去canteen。
「呀~~~姨~~~早~~~晨~~~！」我嘴角含春咁對住賣食物既呀姨講。
「早晨呀珞仔！~~~」因為我每日既小息一都會黎買早餐既關係，所以我同呀姨都幾好朋友下。
「今日好好精神咁bo！」呀姨攞起左我既專用早餐------腿蛋治熱咖啡，然後遞俾我。
「因為~~~私の心，被アンロック！」我勁開心咁同呀姨講。
呀姨佢擘大個口得個窿咁望住我。
「喔喔喔！」我指住個雪櫃講 : 「我要一包檸檬茶！甜既！」
「阿珞呀……包裝檸檬茶黎架……無得揀甜唔甜……」
「喔喔係wo！我想講凍既！」
「阿珞呀……包裝檸檬茶黎架……邊有熱架……」
就係咁，我攞住一包冰凍既檸檬茶番上課室上堂，等待小息二既黎臨！
Yeahhhhhhhhhhhhhhhhh~~~
***
「Goodbye class~」「goodbye and thankyou miss yeung！」
嗚呀呀呀呀！！！！等左咁耐，終於落堂喇！
我攞住包野飲，雞咁腳行過去a班既窗口。
係窗口望落去，個個講書悶到抽筋既呀sir仲係到解緊黑板上面既數學題。我keep住橫掃成個班房，見到好多隻訓左既懶豬，同好多隻發緊呆既喪屍，仲有一班期待緊小息落去canteen買野食既餓狼。
「啊……點解唔見架呢……」我四周打量阿娜既身影。
「喂~~~！」
突然間！後面有條友拍我背脊！
「嘩！！！」由於我太專心搵阿娜既關係，俾呢下莫名既觸碰同聲音嚇親。
我一拎轉頭，一個活潑既身影同我貼得非常近，而且一陣陣清新既花香味不斷傳入我既鼻裡面。
「洗唔洗咁快黎搵我呀，傻仔！」
阿娜哄前左個頭，搞到我地彼此間既距離，近到連佢眼中倒映出黎既我都見到咁濟。
「你…你…你點解會出左黎既！？都未落堂！」我望住眼前既阿娜，心跳不斷加速。
「我岩先去洗手間咋麻！」阿娜伸一伸條脷出黎，甚是可愛。
佢繼續講 : 「好喇好喇，我要入去上埋堂先喇，呢個呀sir講野勁慢成日霸住我地小息！」
「咁……我係到等你定係……」我遞左包檸檬茶俾佢。
「噢……」阿娜望住包檸檬茶，好似若有所思咁。
「不如……」阿娜思考左一陣之後，望住我講 : 「不如，你等我上完堂先俾我啦！因為……你都唔會淨係想俾包檸檬茶我咋下話！？」
欵？點解我唔多明佢up乜既！？
「下下下？」我一頭霧水咁望住阿娜。
「你好蠢呀！」阿娜伸左隻右手出黎，敲一敲我個頭。
哎呀！點解唔痛架！？好撚正wo我覺得！不如打多幾鑊呀，好無呀！？
阿娜補充一句 : 「我意思係話呀，你俾完檸檬茶我就諗住就咁走架喇！？」
「咁唔係有咩做呀？」我仲係唔多明。
阿娜展出一個哭笑不得既表情俾我，然後講 : 「睇黎你真係未追過女仔架wo！女仔俾呢d機會你，梗係R水吹啦！！」
下？即係點呀喂？即係你俾機會我呀！？好呀好呀！
「好呀好呀！」我將心裡面個句講左出黎。
「你真係呢……懵佬！好喇我番入去喇，一陣見啦，拜拜！」阿娜講完之後，一個快步就行左入課室。
佢既側面，就好似一幅畫咁，輪廓好鮮明、顏色好豐富，好靚。
***
「咕嚕咕嚕……」阿娜幾啖就將包檸檬茶飲晒，得番d吸空氣既聲音。
「好味呀！！」阿娜露出一個小孩子既笑容，望住包飲完既檸檬茶係到笑。
我同佢挨係走廊既欄柵上，一齊望住操場上打緊籃球既學生。
「乜你好中意飲lemon tea架咩？」望住阿娜個個天真樣子，真係好想攬住佢。
「係啊！」佢拎轉過黎望住我，然後舉起左包飲晒既檸檬茶。
佢補充 : 「阿珞你知唔知呀，檸檬茶好特別架！好似好立克、咖啡咁，加糖落去，就只會得番甜。但係呢就算加幾多糖落去檸檬茶到，佢本身既酸味都唔會被遮蓋，好有層次架！」
「嘩，你好有研究咁wo！」
拿拿拿，我呢句唔係敷衍阿娜架！只係我望住佢勁正經咁講，覺得好好笑，一時間俾唔到反應佢姐！
「車你hea應我既！」阿娜裝起一個嬲樣，遞左個空盒俾我。
「罰你，日日請我飲！」阿娜講完之後，眼神有d怕羞咁。
「梗係好啦，收道！呀唔係，應該係話……」
「遵 ‧ 命！」我同阿娜異口同聲咁講左出黎。
「傻瓜！！！我地好夾wo！」阿娜笑住咁拍左一下我既手臂。
我都覺呀！！我覺得，我地會好夾。
*****************************************************************
「嘩嘩嘩對唔住！」我狂奔番學既期間，都唔知撞過幾多個路人既膊頭，同人講過幾多次呢句野。
芷翹小姐，真心俾你玩死喇！我都係唔小心抽左你水姐，就要日日請你飲檸檬……茶……
唉先唔計呢樣，講到尾呀我都係為左救你先抽你水姐！呀唔係，係唔小心抽你水姐！！！依家咁都賴我！！冤枉呀！！！
如果唔係想攞番幅畫，我先唔會應承你！
啊，btw，芷翹姓咩架呢……
係我個腦不停咁罵芷翹既同時，我已經跑到學校門口。
我抬頭望一望個鐘，
「七點四十九分！仲有廿秒！」我向住canteen狂奔。
我諗呢個時候既我，應該快到可以出到惡魔蝙蝠騰衝。
「safe！」我一個dup big lag，出現係企係canteen門口既芷翹後面。
「咦咦咦~~~！乜咁都無遲到呀抽水怪！仲以為第一日就有兩包檸檬茶飲咁開心添！」芷翹裝出一個失望既樣，但係嘴角卻向上揚。
「但係睇你個樣，似係開心多d喎！」我熱到仆街，不停抖大氣。
「咁係因為，」芷翹係裙袋攞左包紙巾出黎，抽左一張然後fing開左佢。
「咁係因為，我當初仲估你會反口，今日唔會黎架麻！話晒……琴晚又搞到咁僵……」芷翹伸出佢攞住紙巾既右手，向我塊面伸埋黎。
唔x係掛，有個靚女幫我抹汗！？
「唔洗喇我自己……」當我正想講話自己抹既時候，芷翹突然將右手向前一伸，勁大力咁將成塊紙巾核落我塊面到。
「嗚嗚嗚！！」我俾芷翹不停咁卒我塊面，搞到我出唔到聲。
「話說琴晚有個人扮晒野咁將我當左第二個人黎攬又唔講係邊個，但係又要抽我水喎！你話呢d人應該要點樣罰佢先岩呢？？？」芷翹把聲聽起上黎根本唔似嬲，而似係想玩弄我既感覺。
「好啦好啦我認輸！」我掙扎左出黎。
「喔喔喔！！咁快自首喇？咁快講黎聽下，你琴晚當左我係邊個姐！？」芷翹一臉期待既樣，哄前個身埋黎我到，就好似細路等聽故事既樣子咁。
「不如咁啦，你俾我問左你一個問題先。」我拍一拍芷翹個頭。
「做咩拍我wo！」芷翹鼓脹塊臉個陣又幾可愛。
「好啦，你想問咩？」芷翹補充。
「想問下呢，你係咪好中意檸檬茶？」
「係呀！！做咩咁問？乜你都好中意架咩？」
「唔係呀……只係……我個ex好中意。」
「唔係掛！？」芷翹個樣好驚訝咁講 : 「即係你因為我同你個ex都好中意飲檸檬茶既關係，就將我當左做佢！！？」
「喂喂喂你點知我當左你做佢架！？」我仲驚訝咁講。
「你係咪傻架，你咁樣問得，係人都知啦！！」
啊，你又講得岩喎。
「之但係我唔會就咁就當左你係阿娜囉！只係你地既笑容有d相似姐……」我為自己辯駁。
其實，都唔只係有d，係有七成相似。
「你個ex就係叫阿娜呀？」芷翹踏前左一步，哄前個頭乘勝追擊咁問 : 「我同佢……邊個靚d啊！？」
「喂，我識左你幾日咋喎小姐，點解你可以好似已經同我好熟咁架呢！？」我哄番前個頭埋去佢到質問佢。
不過我做左呢個動作之後，先發覺我同芷翹兩個依家既動作就好似鬥緊氣既情侶一樣。
「咁係因為！……」芷翹欲言又止。
我地雙眼對望住，而我隱約咁係眼角處見到，芷翹既雙頰已經不知不覺變得通紅。
「喂，你唔想講姐，都唔洗激動到臉紅既！」我退後番個人，見到芷翹個紅卜卜既臉蛋，真係好可愛。
「咁『或者』係因為……我一早就識你呢！」芷翹講完之後，就拎轉身行入canteen。
「下！？」係我腦海裡面，係無存在過芷翹呢個女仔。
如果佢出現過既話，我點會唔記得呀咁靚女！話唔定佢早過阿娜出現既話，我會中意左佢都未定。
天真爽朗既性格，笑容甜美，聲線動人，都真係幾無懈可擊。
惟一要挑剔既，咪就係佢間唔中出現既黑化性格囉。
不過，老實講，始終只係識左幾日都無，我對呢個女仔都只係好表面既認識，甚至連佢個姓都未知。
「喂係wo！」我追左上前，行係芷翹既右邊。
「我想問呢，你其實姓咩架？」
「歐陽。」
「咩話！！？」
「學第一日識你個陣你話齋------做咩呀你，第一次見人複姓呀？哈哈！」
『我們在從前就相識？』
『或者，就像我也知道誰是周星馳一樣呀！我懂他，他不懂我而已。』