《妳做咩將成碗譚仔倒落我個頭上面！？》: 第一章

「鈴鈴鈴~~~」由開學至今四個幾月，呢個放學鐘聲雖然都唔知聽過幾多次。但今日聽落去，就好似奏鳴曲咁，每鈴一下都扣人心弦。
 
      「喂阿珞，一陣唔好咁怯！心裡面咩都唔洗諗，然後學我咁一手捉佢埋黎，然後咀落去！咁就得米架喇！」蛋撻跑過黎坐左係我隔離，然後搭住我膊頭將我扯過去佢到，仲DO起嘴好似想咀我咁示範我睇。
 
        「蛋撻」，全名丘但達，係我中學生涯裡面認識既最佳損友。因為佢個名好撚難讀既關係，我地攞佢諧音改左「有蛋撻」呢個名。
 
蛋撻佢由中一開始已經眉清目秀，身材挺拔，驟眼睇落同羅仲謙都有幾分相似。雖然平日淨係識得吃喝玩樂，但有「萬能運動員」稱號既佢，田徑球類樣樣皆精，所以佢係我地班級裡面就係絕對男神級既筍盤。想食左佢既女仔……甚至係男仔，都猶如天上繁星咁多。
 
        「屌！死開啦GAY佬！」我係佢既強暴下掙扎左出黎，然後調番轉箍實佢條頸 : 「你咁多女溝、拍過咁多次拖，就梗係講得易啦！你有無諗過我呢個無拍過拖既小毒毒既感受！」
 




        「挑係你唔受班女仔溝咋WO！」蛋撻一臉痛苦咁講。
 
        如果，要將蛋撻比喻為又打得又靚仔既「馬超」既話，咁我諗我就係頭腦聰明，而且臉如冠玉既「孔明」------所以其實我同蛋撻都係屬於受歡迎個一堆。
 
惟一唔同既係，我由中四開始先受歡迎。
 
中一至中三，我個樣都好薯仔，衰D講句真係幾柒下。但係升中四既呢個暑假裡面，一黎我為左唔想留係個個只有老豆既屋企，二黎我心裡面已經有一個好想達到既目標，終於驅使我每日都好努力咁做運動。
 
結果今年一開學，個個都跌晒眼鏡，心諗 : 阿珞你去整容黎呀！？同沈震軒同一個餅印WO屌你！
 




本來藝術才華已經出類拔萃既我，加埋個帥氣樣，同蛋撻一文一武，成功俘虜左萬千少女既心。而身邊既男仔就得個葡萄，都咪話唔爽。
 
不過我從來都唔贊成蛋撻個種「美女廚房」既愛情觀。我唔想求其就展開一段感情，到頭來因為性格不合而分手。傷害對方之餘，更加會傷害自己對愛既睇法同取態。
 
        或者，呢個心態就係父母既故事留低俾我既反思。
 
        「屌我講過幾多次我唔拍拖既原因俾你聽啊先生！」我鬆開左雙手，等蛋撻可以呼吸一下新鮮既空氣。
 
        「我知我知，我都係講下姐。」蛋撻稍為抖番順條氣個陣，企番起身對住我講 : 「咁啦，身為你老死，我一定會支持你既。不過係人都知個個阿娜眼角好鬼高架啦，就算我地籃球隊隊長阿風咁靚仔，佢都唔受溝既。話唔埋……佢有D咩不為人知既暗黑化性格架！唉，都唔知點解你仲要舂個頭落去，勸你又唔聽，預定食檸檬啦你！」
 




        「錯喇你！咁只係代表佢唔隨便，同我一樣對愛情係講FEEL、有要求！阿娜佢同我講過佢只係拍過一次拖，咁就代表左佢好認真對待每一段感情！仲有啊雙魚座既女仔就係咁有性格架啦！呢D正正就係佢吸引我既地方……」
 
正所謂「情人眼裡出巴斯光年」，我一輪嘴咁將阿娜D優點講晒出黎俾蛋撻聽。
 
        「夠喇屌！知你女神好撚正喇唉，我就岩MK妹多D。」蛋撻終於忍唔住停止我對阿娜既讚美，然後擺出一臉恥笑我既表情 : 「不過咁，我地既珞珞依家靚仔左咁多，話唔定阿娜會因為咁而紆尊降貴受你溝呢係咪先！等你好消息！」
 
        就係呢個時候，班門口個邊忽然嚷起一輪哄動。
 
        「嘩嘩嘩！有人要黎搵阿珞喇！」「睇下個邊阿珞紅都臉晒喇！咪玩佢啦我地都係快D走！」
 
        就係咁，本來係班房既人都係幾秒之內猶如潮退般------唔撚見晒。蛋撻跟隨住呢股人流撤退既時候，仲扮口型咁同我講左聲 : 「加油呀屌你老母！」
 
        蛋撻呢條友，真係唔話得。
 
係呢個時候，我先見到原來阿娜已經一早企左係門口。




 
        「你地班D人今日搞咩啊，個個都古靈精怪，好似好趕咁既？」阿娜行左埋黎，同我雙目而視，然後莞爾一笑。
 





        『友情的真諦，就是明知前面是懸涯峽谷，只要你願意，他們還是會樂於推你一把。』
        『但在這之後，他們必定會陪你跳下去。』