[教畜]私補通常都會補上床: 5.21

暑假走了，我這個暑假幹過什麼來了？我只記得發了一場淒美的夢，感覺好真實的夢。今天是開學第一個星期三，按照慣例我是翹課的。坐在家中玩著新買的PS4，不停地在按著手把上的鍵，雖然遊戲畫質很美，評價很高，劇情動人。可是還是比不上與阿藍一起遊玩藍白百事人那個簡單的小遊戲。

「鈴鈴鈴」我的電話響了，是傻佬東的來電。

「做咩事？」我問。

「你今日有無返學呀？」傻佬東問。

「無呀，做咩？」



「你唔係要Retake 新聞道德與法規咩？」

「係呀，今日走左堂，咁又點？」

「出左通告話轉左教授教喎，睇下你知唔知咋嘛。」

「下，個派Grade 呀伯去左邊？」

「好似話身體有事唔再教喎，轉左個法學碩士黎教。」



「咁誇張？個碩士咩料先？嚴唔嚴架？」我問。

「聽讀Law D Friend 講話佢極嚴格，堂堂都有功課，每份都佔好重分數，你今堂無返就好自為知啦。」傻佬東竊笑。

「頂！」我望一望時間，才上堂半個小時，應該趕得上在下課前回去。「我依家返先！」

「個Professor 靚女黎，遲左可以用美男計求佢比份功課你......」

「痴線！係咁啦！我出門口」



我換上便裝，然後提起袋子便跑。

截了一架的士，然後在車上一邊聽著哥哥的歌。剛巧又聽到哥哥的今生今世，馬上就想起阿藍離別的那一幕，是那麼的歷歷在目。縱使這個故事是個幻想，我也覺得此生無悔了，畢竟與超自然事物談了一場轟轟烈烈的戀愛，這種經歷一定不是常人能明白的。自阿藍離開之後那天，我就沒有再遇到「朋友」了，看來，阿藍的一切，果然是我幻想出來的。

苦笑一下，然後下車奔跑到課室。

打開班房門，只有一位身穿正裝的長髮女人垂頭整理著文件，全個課室沒有我以外的學生。看來是我遲了很多吧，都坐的士了，還是遲到了。反正也是遲，早知道就坐地鐵回來好了。

https://www.youtube.com/watch?v=Uc3-GV7G0po

「Professor ......I am sorry …...」教授轉過頭來，我一下子沒能反應過來，甚至呼吸不了。

「你做咩咁遲呀？無得點名架啦喎。」她向我微笑。

她的臉蛋稍圓，雙眸水汪汪，加上微笑時露出尖尖的虎牙......



「阿藍......」我說。

「下？你點會知我花名......」阿藍問。

阿藍還是依舊的美麗動人，只是沒有了以前那種純真的可愛感覺，反而加添了幾分成熟的韻味。

「你......你無死到......」我說。

「呢位同學，你知唔知咁樣好無禮貌......」

我衝上前抱著她，此刻的興奮實在難以用筆墨形容。

「你......」阿藍好像氣不出話來。



「阿藍！你知唔知我好掛住你！」我在阿藍耳邊說。

「你再唔放手我報警架！」

「阿藍......」

阿藍用力推開我，然後用懷疑的眼光望著我。

「無乜人知我花名，你到底係點樣知道架？」阿藍手扶著講台，似乎很害怕我這個熱情學生。

「我仲知你好多野架，藍若惜。」我說。

「我個名，可以係網上搵到丫。」她說。

「你係十優狀元，最鍾意聽哥哥既歌。」



「呢D 好多學生都知。」阿藍說。

「你中四果年仲買左哥哥既《Forever》CD，然後排隊去拎比哥哥簽名。」

「你......」

阿藍好像很詫異為何我會知道這些。

「你以前間房牆上面仲有一張哥哥既親筆簽名海報。」

「你有齊哂哥哥所有既CD ，你亦有儲菲姐既CD 。」

「你仲有一部Sony 既CD 機，每晚你都會聽住哥哥既歌黎訓。」



「你中學既時候好鍾意玩PS1，其中一隻Game 係控制一個藍白色百事人。」

「你父母好不幸係旅遊期間過左身......」

「你考完CE 之後第一份兼職就係係Green Box 到做。」

「仲有，你左邊大脾，係唔係有一個細細地既紅色胎記？」

阿藍臉上一直掛著驚訝的表情，問道：「你......你到底係咩人？」

我微笑一下，對她說：「我叫馮傲男，好Kai 呀呢？」

阿藍笑了一聲，然後我與她異口同聲說：「好Kai 呀。」

「我唔知你係咩人，但係你都幾有趣丫，你點會知咁多野既？」阿藍說。

「阿藍，我想知道你CE 放榜果日到底最後點樣？」

阿藍眉頭一皺，然後又以疑惑的眼神望向我。

「CE 放榜果日......我咪返學校拎Cert 囉。」

「唔係有架貨車......」

阿藍望了我一眼，說：「我無同任何人提起喎......」

她繼續說：「本身我打算等前面架貨車行過先過馬路，點知係耳機到聽到一把好微弱既聲音，不停咁嗌我，開頭我以為自己撞鬼，點知再聽真D ，耳機入面有個人係到講野，不停叫我走呀走，又唔講要走去邊，係最後一刻架貨車埋到黎既時候先叫我過馬路......」

我聽得緊張萬分。

阿藍又說：「其實把聲我果刻係第一次聽，完全唔知係邊個黎。但係既然佢不停求我，我就打算準備等架貨車一過左就立即過馬路啦，點知一望架貨車，就發現佢撞緊埋黎。好彩有果個人不停叫我走，我先有心理準備，即刻衝出馬路位避開佢咋。如果我仲傻下傻下咁無留意架車，應該就比架車撞死左啦。」

我上前走近，問：「咁你有無打算要感謝救左你果個人？」

「哈哈，我之後都不停聽返隻碟，發現根本就無果把聲，可能果刻咁岩有幻聽，或者第六感啦。再唔係就係有天使保護住我。」

「如果你係咁諗既話......」我走近阿藍，抱著她的腰，她的身子就像一個常人一樣溫暖。雖然她現在比我大了十年。可是，在我眼中她仍是那個中五的小妹妹。我在她面前說：「我就係你既天使。」

阿藍呆了一樣望著我，過了良久，才開口：「你把聲......真係有少少似......」

這個當然，那是我早一個月前的聲音來呀。

阿藍推開我，垂頭背向我說：「雖然我單身......但你想追我都要比少少誠意架......氹人講故仔比你聽之後夾硬塞自己落個故仔到......你唔比個故仔係我作出黎架......」

「呃......真係我叫你睇車架......」我說。

「你起碼都請我飲杯咖啡，然後傾下計先啦......」阿藍還是唸唸有詞地自言自語。

「藍若惜小姐，唔知賞唔賞面陪我去飲杯咖啡呢？」我左腳擺後右膝微彎向前鞠躬。

「嘻嘻......o靚仔人細鬼大學人溝姐姐......行啦......」阿藍甜笑時又露出那雙可愛的虎牙。

阿藍拿起文件，然後與我一同離開課室。