《我，就係踩單車跌落渠果個肥仔》: 14

第二朝起身呀汶已經出左門口。

我諗呀汶應該係唔想同我一齊出門口比人見到。

「叮噹！」有人按鐘喎，居然係呀汶。

「呀冬早晨呀！我買左早餐比你食呀。」

哇！女神幫我買早餐？！





「我？早餐？」

「係呀～」

「姨姨話去打牌呀，今晚我地兩個人食飯喎。」

同女神兩個人單獨食飯？點解幸運可以黎得咁快既？

但係一諗起聽日要幫個靚女向第二個男仔表白我又有Ｄ唔開心。





係喎呀汶同果個呀俊同班架喎，問下都好。

「係呢呀汶…你識唔識…陳俊逸呀？」

「呀俊？點解咁問，我識呀。」

「佢份人係點架？」

「嗯…都幾好架，讀書好好，同幾有風度囉。」





「咁係咪好多女仔都鍾意佢架？」

「下……我…我諗係掛…」

呢個時候ＶＥＮＵＳ居然又出聲

「檢測鍾智汶身體機能異常。心跳快速，定義為緊張。」

「即係點呀？佢唔舒服呀？」

屌妳唔撚係下話…妳意思即係……

「傻仔，人地都鍾意陳俊逸呀！」

俊？邊撚到俊呀？！！！！！





我按捺住自己既怒氣，同汶繼續對話。

「係呀…咁佢又真係幾靚仔既，可？」

「嗯………」

我有預感，呢個呀俊，會係我中學生涯中最大既敵人！

到左夜晚，我都開始肚仔餓，所以就諗住問下一路溫緊習既呀汶食咩好。

「呀汶妳想出去食？…定係落街食呀？」

「你傻左呀阿冬？出去食咪即係落街食囉。」呀汶笑起上黎對眼有臥蠶架。





「呀…又係喎…哈哈。」始終第一次同女神咁近，真係好易講錯野。

「不如我煮野比你食啦！」

？！？！？！？！

「妳…妳煮野比我食？」咁大個仔唔係講笑，除左男人版本呀雪同呀媽之外，真係無第二個女仔會煮野比我食。

「係呀…以前呢我都好鍾意煮野食架，成日煮比媽咪試架！」唔知係咪提起左佢媽媽，我感覺到佢語氣又開始沉左落黎…

「好呀！妳放心啦我一定會食曬佢架。」癡線，肥仔最叻係咩呀？食囉屌你。